राजनीति

झाँक्री पक्राउका साढे ५ घण्टा : प्रहरीका ४ प्रश्नमा झाँक्रीको लिखित उत्तर, अनि खुल्यो रिहाइको बाटो

रातभरको निगरानीपछि दिउँसो पक्राउ

नारायण अधिकारी बिहीबार, माघ २९, २०७७ २१:१३

काठमाडौं- नेकपा नेता रामकुमारी झाक्री साढे ५ घण्टा प्रहरी नियन्त्रणमा रहेर छुटिन्। राष्ट्रपति विद्यादेवी भण्डारीविरुद्ध गोरखामा अभिव्यक्ति दिएको आरोपमा बिहीबार दिउँसो १ बजे झाँक्री आफ्नै निवास शंखमूलबाट पक्राउ परेकी थिइन्।

अनमेसंघले गृहमन्त्रीलाई ज्ञापनपत्र बुझाउँदै झाँक्रीमाथि कारबाहीको माग गरेको थियो। उक्त ज्ञापनपत्रसहित गृहले प्रहरीलाई 'कानुन बमोजिम कारबाही गर्नू' भनी लेखी पठाएको थियो। गृहको निर्देशनअनुसार नै बिहीबार महानगरीय प्रहरी अपराध महाशाखाले झाँक्रीलाई पक्राउ गरेको हो।

गृहको निर्देशनपछि झाँक्रीको निगरानीका लागि बुधबार रातिबाटै प्रहरी परिचालन भएको थियो। झाँक्रीको निगरानी नभई उनी उपत्यका बाहिर गएको अवस्थामा प्रहरीले गृहलाई दिने जवाफ थिएन। जसकारण रातभर निगरानी गरी पक्राउ गरिएको प्रहरी स्रोतको भनाइ छ।

बिहीबार बिहान करिब ९ बजेतिर महाशाखाका एसएसपी दीपक थापाले झाँक्रीलाई फोन गरेर प्रहरी कार्यालयमा उपस्थित हुन भनेका थिए। तर झाँक्री उपस्थित नभएपछि उनलाई पक्राउ गर्न प्रहरी उनको घरमै पुगेको थियो। त्यसविरुद्ध नेकपाका कार्यकर्ताले अवरोध गरेपछि झाँक्री पक्राउ गर्न केही समय ढिला भएको थियो।

दिउँसो १ बजे प्रहरीले घरबाटै उनलाई पक्राउ पुर्जी थमाएर नियन्त्रणमा लिएको थियो। सवा १ बजे उनलाई महाशाखा ल्याइयो।

महाशाखामा करिब ५ घण्टा राखिएपछि उनी रिहा भइन्। उनलाई भेट्न नेकपा प्रवक्ता नारायणकाजी श्रेष्ठ, नेताहरू योगेश भट्टराई, सुरेन्द्र पाण्डेलगायत पुगेका थिए।

झाँक्रीलाई लिखित सोधपुछ गरेर छाडिएको महाशाखाका एसएसपी थापाले बताए। सोधपुछका क्रममा उनलाई ४ वटा प्रश्न सोधिएको र त्यसको लिखित जवाफ दिएपछि रिहा गरिएको थापाको भनाइ छ।

प्रहरीका ४ सवालमा झाँक्रीका जवाफ
सवाल १ : तपाईले मिति २०७४।१०।१६ गते गोरखा जिल्ला सिरानचोक गाउँपालिकामा भएको राजनीतिक भेलामा दिनु भएको सार्वजनिक अभिव्यक्तिको भिडियो देखाइन्छ, के कसो हो? कुन सन्दर्भमा उक्त अभिव्यक्ति व्यक्त गर्नु भएको हो? खुलाई लेखी दिनुहोस्।
जबाफ १ : मिति २०७७/१०/१६ गते गोरखा जिल्लाका सिरानचौक गापामा भएको राजनीतिक भेलामा मैले बोलेको भिडियो देखाउँदा देखी सुनी पाएँ। म नेकपाको केन्द्रीय सदस्य भएकाले राजनीतिक भेलामा संसद् विघटन पछिको राजनीतिक परिवेशको विषयमा राजनीतिक अभिव्यक्ति दिएकी हुँ। म एक जिम्मेवार पदमा रहेकी राजनीतिकर्मी भएकाले नेपालको संविधान २०७२ को धारा १७ ले दिएको अभिव्यक्ति स्वतन्त्रता, राजनीतिक स्वतन्तताको हक अन्तर्गत रही आफ्नो अभिव्यक्ति दिएकी हुँ।

सवाल २ : अखिल नेपाल महिला संघले माननीय गृहमन्त्रीज्युलाई सम्बोधन गरी मिति २०७७।१०।२१ गते दिएको ज्ञापन पत्र पढी वाची सुनाइन्छ। ज्ञापनपत्रको व्यहोरा के कसो हो? खुलाई लेखी दिनुहोस्।
जवाफ २ : अखिल नेपाल महिला संघले माननीय मन्त्रीज्यूलाई सम्बोध गरी दिएको ज्ञापन पत्र मैले पढी वाची सुनी हेरी पाएँ। व्यहोरा बुझेँ। उक्त ज्ञापनपत्र दिने व्यक्तिहरूलाई म खासै चिन्दिनँ। निजहरूले ज्ञापनपत्र के कुन अभिप्रायले दिएका हुन् मलाई थाहा भएन। मुलुकका सबै संवैधानिक निकाय र संघीय लोकतान्त्रिक गणतन्त्र प्रति मेरो सदैव सम्मान छ र रहने छ।

सवाल ३ : तपाईले गोरखा जिल्लाको सिरानचोक गाउपालिकामा भएको राजनीतिक भेलामा सम्माननीय राष्ट्रपतिज्युको बारेमा व्यक्त गरेको अभिव्यक्तिले सम्मानित संस्था एवं सम्माननीय राष्ट्रपतिज्युको गरिमामाथि नै आँच पुर‍याउने, धम्की दिने किसिमका अभिव्यक्तिहरु हुन/होइनन्। खुलाई लेखी दिनुहोस्।

जवाफ ३ : मैले गोरखा जिल्लामा भएको राजनीतिक भेलामा गरेको अभिवक्यक्तिहरू राजनीतिक अभिव्यक्ति हुन्। संवैधानिक राष्ट्रपति प्रतिको मेरो सम्मान हिजो, आज र भोलि पनि उत्तिकै रहने छ। सबै निकायले नेपालको संविधान तथा ऐनको परिपालना गर्नुपर्छ भन्ने मेरो जोड छ।

सवाल ४ : तपाईको अन्य केही भन्न बाँकी भए खुलाई लेखी दिनुहोस्।
जवाफ ४ : मैले नेपालको संविधान, प्रचालित कानूनको पालना गरी अभिव्यक्ति स्वतन्त्रताको हक, राजनितिक स्वतन्त्रताको हकको उपयोग गरेकी हुँ।

000

प्रहरीको प्रश्न र झाँक्रीको उत्तर टिपोट तयार पारी उक्त पत्रमा हस्ताक्षर गरेपछि साढे ५ घण्टापछि उनी रिहा भएकी हुन्।

नेकपाका नेताकार्यकर्तालाई झाँक्रीको जिम्मा लगाएर प्रहरीले छोड्न खाजेको थियो। तर नेताहरुले जिम्मा लिन मानेनन्।

'भोलि प्रधानमन्त्री पक्राउ पर्लान् रे! रिहा हुने बेलामा प्रहरीले कसैको जिम्मामा छाड्नुपर्ने अवस्था आउला। त्यसको जिम्मा कुनै नेताले लिने कुरा हुन्छ?,' नेकपा नेता सुरेन्द्र पाण्डेले प्रहरीलाई प्रतिप्रश्न गरेका थिए।

अन्ततः नेकपा नेताले जिम्मा नलिएपछि उनका श्रीमान् पशुपति पुरीको जिम्मा लगाएर झाँक्रीलाई रिहा गरिएको छ। रिहाइपछि झाँक्रीले छोटो प्रतिक्रिया दिँदै प्रतिगमनविरुद्ध पुनः लड्ने बताइन्।

थप समाचार:
'राज्यद्रोह'को आरोपमा समातिएकी रामकुमारी झाँक्री प्रहरी हिरासतमुक्त

झाँक्री पक्राउ : अभिव्यक्ति स्वतन्त्रता तर्साउने सरकारको दाउ

रामकुमारी झाँक्री पक्राउ परेपछि बाबुरामले भने- सरकारको काल आएकै हो ?

प्रहरी नियन्त्रणमा रहेकी झाँक्रीले भनिन्- यो अन्तिम लडाईं हो

झाँक्रीको पक्राउ अभिव्यक्ति स्वतन्त्रतामाथि नांगो हस्तक्षेप : रामचन्द्र पौडेल

प्रधानमन्त्रीको ठाडो आदेशमा झाँक्री पक्राउ : प्रचण्ड

रामकुमारीलाई भेट्न अपराध महाशाखा पुगे नारायणकाजी र योगेश

‘राज्य विरुद्धको कसुर’ लाग्ने गरी गोरखामा के भनेकी थिइन् झाँक्रीले?

गगन थापाले भने- प्रश्न गर्नेलाई रोक्ने उहिले महाराजा, अहिले राष्ट्रपति !

रामकुमारी झाँक्रीलाई अपराध महाशाखा लगियो [तस्बिरहरू]

नेकपा नेता झाँक्रीविरुद्ध लगाइएको कसुर के, सजाय कति ?

हामीले कहिल्यै नखोसिने लोकतन्त्रका लागि लडेका थियौं : झाँक्री