काठमाडौं- नेकपा (प्रचण्ड-माधव पक्ष) नेतृ रामकुमारी झाँक्रीले आफूहरुले कहिल्यै नखोसिने लोकतन्त्रको लागि लडेको बताएकी छिन्। बिहीबार प्रहरीलाई गिरफ्तारी दिनुअघि गरेको सम्बोधनमा उनले लोकतान्त्रिक अधिकार खोसिएको संकेत गरिन्।
'हामीले कहिल्यै नखोसिने लोकतन्त्रको लागि लडेका थियौं। सात दशकको क्रान्तिबाट हामीले धेरै कुरा प्राप्त गरेका थियौं भन्ने लागेको थियो', उनले भनिन्।
केही दिनअघि गोरखामा आयोजित एक कार्यक्रममा उनले राष्ट्रपति विद्यादेवी भण्डारी विरुद्ध अभिव्यक्ति दिएका कारण प्रक्राउ गर्न प्रहरी उनको निवासमा पुगेको थियो। तर, प्रहरीले पक्राउ पूर्जी नलगेको कारण उनले सुरुमा गिरफ्तार दिन अस्वीकार गरेकी थिइन्। पछि प्रहरीले पक्राउ पूर्जी थमाएको थियो। उनलाई राज्य विरुद्धको कसुर लगाइएको छ।
'आज जनताको प्रतिनिधिमूलक थलो प्रतिनिधि सभालाई विघटन भएर प्रतिगमन भएको छ। हामी त्यसको पुनर्वहालीका लागि सडकमा संघर्ष गरिरहेका छौं', उनले भनिन्।
संघर्षकै क्रममा आफूले व्यक्त गरेको विचारको आधारमा सरकारले अभिव्यक्ति स्वतन्त्रतामाथि अंकुश लगाउँदै राज्य विरुद्धको कसुरको आधारमा पक्राउ पूर्जी थमाएको उनले बताइन्। उनले आफू इमान्दार नागरिक भएकाले निवासबाट गिरफ्तारी दिएको बताइन्।
उनले आफ्नो निवासमा उपस्थितलाई धन्यवाद दिइन्। उनले राज्यको आदेश तामेल गर्ने सुरक्षाकर्मीलाई पनि धन्यवाद दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
