प्रधानमन्त्रीको ठाडो आदेशमा झाँक्री पक्राउ : प्रचण्ड

राजनीति

नेपाल लाइभ बिहीबार, माघ २९, २०७७ १४:४२

काठमाडौं- नेकपाका अध्यक्ष पुष्पकमल दाहाल ‘प्रचण्ड’ले रामकुमारी झाँक्रीलाई प्रधानमन्त्रीको ठाडो आदेशमा पक्राउ गरिएको बताएका छन्।बिहीबार आदिवासी जनजाति मगर संघ, नेपालको राष्ट्रिय भेलामा सम्बोधन गर्दै उनले झाँक्रीलाई हिजै पक्राउ गर्ने तयारी भएको पनि बताए।

‘रामकुमारी झाँक्रीलाई पुलिसले पक्रिन हिजैदेखि बल गरिरहेको थियो। तथाकथित राष्ट्रपतिको बारेमा गलत बोल्यो भन्ने नाममा प्रधानमन्त्रीको ठाडो आदेशमा पुलिसलाई पक्रनै पर्‍यो, जसरी पनि पक्र भनेको छ भन्ने थियो। हामीले रोक्न बल गर्‍यौं हिजो बेलुकादेखि अहिले बिहानसम्म पनि’, उनले भने।

प्रचण्डले झाँक्री छिट्टै छुट्ने विश्वास व्यक्त गरे। ‘तर, उनीहरुको नियत देखियो। जसले लोकतन्त्रको पक्षमा प्रखर ढंगले आफ्नो विचारहरु राख्ने काम गर्‍यो। त्यसकारण त्यो विचारमाथि, लोकतन्त्रमाथि ताला चाबी लगाउने षडयन्त्र भएको छ’, उनले भने।

बिहीबार बिहान झाँक्रीलाई पक्राउ गर्न प्रहरी उनको निवास पुगेको थियो। तर, प्रहरीले पक्राउ पूर्जी नलगेको र झाँक्रीका समर्थक बाक्लो संख्यामा उपस्थित भएकाले प्रहरी पछि हटेको थियो। तर, झाँक्रीले पक्राउ पूर्जी ल्याए आफू गिरफ्तारी दिन तयार रहेको भनेपछि सोही अनुसार उनी गिरफ्तार भएकी थिइन्।

गिरफ्तारी दिनुअघि झाँक्रीले समर्थकलाई सम्बोधन गरेकी थिइन्। आफूहरुले कहिल्यै नखोसिने लोकतन्त्रको लागि लडेको बताएकी थिइन्। सम्बोधनमार्फत् उनले लोकतान्त्रिक अधिकार खोसिएको संकेत गरेकी थिइन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

बालिकालाई सामूहिक बलात्कार गरेको आरोपमा चार जना पक्राउ

सेयर धितो कर्जाको जोखिम भार घट्यो

अनेरास्ववियुमा ३२ वर्षे उमेर हद लगाउने एमालेको निर्णय