काठमाडौं– सुन तस्करी नियन्त्रण जाँचबुझ आयोगले माओवादी केन्द्रका उपाध्यक्ष तथा पूर्वसभामुख कृष्णबहादुर महराको मोबाइल डिजिटल फरेन्सिक ल्याब (डीएफएल)मा पठाएको छ।
सुन तस्करीमा जोडिएका चिनियाँ नागरिकसँग महराको कनेक्सन देखिएपछि आयोगले उनको मोबाइल नियन्त्रणमा लिएर डीएफएलमा पठाएको हो। आयोग स्रोतका अनुसार गत शुक्रबार महराको मोबाइल जाँचका लागि प्रहरीको डीएफएलमा पठाइएको हो।
डीएफएलले रिपोर्ट आउन कम्तीमा पनि १० दिनको समय लाग्ने आयोग स्रोतले नेपाल लाइभलाई जानकारी दियो। ‘यसअघिको अनुसन्धानबाट सुन तस्कर चिनियाँ नागरिकसँग महराको कनेक्सन देखिएको भन्ने विषय सार्वजनिक भएकाले त्यसलाई थप पुष्टि गर्न र नयाँ केही तथ्य आउन सक्ने आधारहरुलाई मध्यनजर गर्दै उहाँको मोबाइल डीएफएलमा पठाइएको हो’ आयोग स्रोतले नेपाल लाइभसँग भन्यो।
यता आयोगका अध्यक्ष डिल्लीराज आचार्यले भने महराको नामै नलिई संकास्पद देखिएका केही व्यक्तिको मोबाइल डीएफएलमा पठाइएको बताए। ‘हामीले संकास्पद व्यक्तिहरुको मोबाइल नियन्त्रणमा लिएर डीएफएलमा पठाएका छौं। अन्तिम पटक गत शुक्रबार डीएफएलमा पठाइएको छ’ आचार्यले नेपाल लाइभसँग भने।
गत माघ २५ गते मात्रै आयोगको सिंहदरबारस्थित कार्यालयमा बोलाएर महरासँग बयान लिइएको थियो। सिंहदरबारस्थित कार्यालयमा करिब डेढ घण्टा महरासँग आयोगको टोलीले बयान लिएको थियो। त्यतिबेलै आयोगको टोलीले महराको मोबाइल समेत लिएको थियो। उक्त मोबाइल गत शुक्रबार अर्थात फागुन ४ गते डीएफएलमा पठाइएको छ। मोबाइल जाँचबाट कम्तिमा १० दिनपछि मात्रै रिपोर्ट प्राप्त हुने जानकारी आएको आयोगले जनाएको छ।
विद्युतीय चुरोट भेपमार्फत भएको ९ किलो सुन तस्करी प्रकरणमा केन्द्रीय अनुसन्धान ब्यूरो (सीआईबी)ले समेत महरासँग गत असोज १५ गते बयान लिएको थियो। असोज १५ गते साँझ पौने सात बजेदेखि साढे सात बजेसम्म करिब ४५ मिनेट सीआईबीले महराको बयान लिएको थियो।
भेममार्फत भएको सुन तस्करीमा जोडिएका चिनियाँ नागरिक दाओजिन वाङ्गसँग महराको फोन सम्पर्क भएको देखिएको थियो। उक्त कुरा महरा स्वयमले समेत स्वीकार गरेका थिए। दाओजिनसँग आफ्नो पुरानो चिनजान रहेको महराले सीआईबी समक्ष स्विकारेका थिए। वाङ्गले मलाई आफू एउटा फलफूल व्यापारीको रूपमा नेपालमा व्यापार गर्ने भनी चिनाएकाले त्यही रुपमा लिएर विमानस्थलको तत्कालीन भन्सार प्रमुख अरुण पोखरेललाई फोन गरेको भन्दै सुन तस्करीबारे जानकारी नै नभएको दाबी गर्दै बयान दिएका थिए।
यता सोही भेपमार्फत भएको ९ किलो सुन तस्करीमा भने महराका छोरा राहुललाई पक्राउ गरेर सीआईबीले मुद्दा चलाएको थियो। उनी अहिले पुर्पक्षका लागि कारागारमा छन्। राहुलसँग यसअघि नै आयोगले बयान लिइसकेको छ। गत साउन २ गते त्रिभुवन अन्तराष्ट्रिय विमानस्थलको भन्सारबाट पास भएर बाहिरिँदै गरेको ६१ किलो सुन राजश्व अनुसन्धान विभागको टोलीले बरामद गरेको थियो। उक्त सुनको अनुसन्धानपछि सीआईबीले गरेको थियो।
प्रमुख प्रतिपक्ष दल नेकपा एमालेले भने सुन तस्करी प्रकरणको अनुसन्धानका लागि छुट्टै स्वतन्त्र आयोग गठन गर्नुपर्ने भन्दै संसद् अवरुद्ध गरेपछि भदौ ६ गते एमालेसहित सात दलबीच आयोग गठन गर्ने सहमति भएको थियो। सीआईबीको अनुसन्धान सकिएपछि असोज १४ गते सरकारले आयोग गठन गरेको थियो।
पूर्वन्यायाधीश आचार्यको अध्यक्षतामा नेपाल प्रहरीका पूर्व अतिरिक्त महानिरीक्षक (एआईजी) सहकुलबहादुर थापा, अर्थ मन्त्रालयका पूर्वसहसचिव किशोरजंग कार्की र गृहमन्त्रालयका पूर्वसहसचिव प्रेमराज जोशी सदस्य रहेको चार सदस्यीय आयोग गठन गरेको थियो।
पुस १६ गतेसम्मको म्याद आयोगलाई दिइएको थियो। तर त्यतिबेलासम्म काम नसकिने भन्दै आयोगले म्याद थपका लागि प्रस्ताव गरेपछि थप दुई महिना अर्थात फागुन १५ गतेसम्मको म्याद पाएको थियो। अब आयोगको म्याद सकिन एक साता मात्रै बाँकी छ। अब छानबिनका कामहरु सकेर आयोगले प्रतिवेदन तयार पार्न लागेको छ। प्रतिवेदनमा क–कसको भूमिका के देखिन्छ, कसलाई कारबाही गर्नका लागि सिफारिस गर्नेसम्मको विषयहरु उल्लेख गरिने आयोगले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
