काठमाडौं– नक्कली कागजात बनाएर भिजिट भिसामा सेटिङमार्फत् विभिन्न मुलुकमा मान्छे पठाउने काममा संलग्न रहेको आरोप लागेपछि फरार भएका ६ अध्यागमन अधिकृत सुटुक्क अदालतमा उस्थित हुँदै धरौटीमा छुटेका छन्।
प्रहरीले अनुसन्धान सुरु गरेपछि पक्राउ पर्ने डरले ७ जना अध्यागमन अधिकृतहरु फरार भएका थिए। त्रिभुवन अन्तर्राष्ट्रिय विमानस्थलस्थित अध्यागमन कार्यालयमा विभिन्न समयमा कार्यरत रहेका ७ अध्यामगन अधिकृत फरार रहेपछि उनीहरुलाई फरार प्रतिवादी बनाउँदै जिल्ला अदालतमा काठमाडौंमा मुद्दा दर्ता गरिएको थियो।
गत मंसिर २६ गते अध्यागमन अधिकृत नरवीर खड्कालाई भिजिट भिसामा सेटिङ गरेवापत २ लाख रुपैयाँ घुस लिँदै गर्दा काठमाडौं उपत्यका अपराध अनुसन्धान कार्यालयको टोलीले पक्राउ गरेको थियो। अध्यागमन अधिकृत खड्का पक्राउ परेपछि आफूहरु पनि तानिने भन्दै ७ जना अध्यागमन अधिकृतहरु फरार भएका थिए।
फरार हुनेहरुमा अध्यागमन अधिकृतहरु ताराबहादुर कुँवर, कुशल बराल, शैलेन्द्र ढकाल, विमल पौडेल, विष्णु अर्याल, विकास डंगोल, पीताम्बर रिमाल र सुजन फागो थिए। उनीहरुसहित जम्मा २२ जनालाई प्रतिवादी बनाउँदै काठमाडौं जिल्ला अदालतमा मुद्दा दर्ता भएको थियो।
त्यतिबेला जम्मा १० जना पक्राउ परेका थिए। अध्यागमन अधिकृत नरवीर खड्कासँगै अरुण दाहाल, सरोजकुमार यादव र काभ्रे घर भएका निमा छिरिङ ट्राभल्स एजेन्सीका सञ्चालक मनोज तामाङलाई माघ २३ गते जिल्ला अदालत काठमाडौंका न्यायाधीश कपिलमणि गौतमका इजलासले पुर्पक्षका लागि कारागार चलानको आदेश दिएको थियो।
त्यसैगरी पक्राउ परेका गीता शाहसँग ५ लाख रुपैयाँ, पदम लामासँग १ लाख, विनोद कार्कीसँग २ लाख, दिनेश ज्ञवाली र रामप्रसाद भण्डारीसँग ७/७ लाख र रविन अर्याललाई १ लाख रुपैयाँ धरौटी रिहा गर्न आदेश दिएको थियो। प्रहरी अनुसन्धान सुरु भएपछि मंसिर देखि फरार रहेका वहालवाला कर्मचारी भने तीन महिनापछि फागुनमा अदालतमा उपस्थित हुँदै सुटुक्क रिहा भएका हुन्।
उनीहरु फागुन ९ गतेदेखि १६ गतेसम्म लगातार १/१ जनाको दरले अदालतमा उपस्थित हुँदै रिहा भएको पाइएको छ। फागुन ९ गते न्यायाधीश सुमन कुमार न्यौपानेको इजलासले एक जना अध्यागमन अधिकृतलाई धरौटीमा रिहाका लागि आदेश गरेको थियो।
एक जना अध्यागमन अधिकृत धरौटीमा रिहा भएपछि भोलिपल्ट फागुन १० गते अर्का अध्यागमन अधिकृत अदालतमा उपस्थित भएका थिए। फागुन १० गते न्यायाधीश दीनबन्धु बरालको इजलाले अर्का अध्यागमन अधिकृतलाई पनि धरौटीमा रिहा गर्ने आदेश दिएको थियो। त्यसपछि फागुन १३ गते अर्का फरार अध्यागमन अधिकृत अदालतमा उपस्थित भएका थिए। न्यायाधीश डा राजेन्द्रकुमार आचार्यलको इजलासले ती अध्यागमन अधिकृतलाई पनि धरौटीमा रिहा गर्ने आदेश दिएको थियो।
त्यसको भोलिपल्ट फागुन १४ गते अर्का अध्यागमन अधिकृत अदालतमा उपस्थित भएका थिए। न्यायाधीश शिवलाल पाण्डेयको इजलासले उनलाई पनि धरौटीमा रिहाका लागि आदेश दिएको थियो।
यसको भोलिपल्ट फागुन १५ गते फेरि कपिलमणि गौतमकै इजलासले अर्का अध्यागमन अधिकृतलाई धरौटीमा रिहाका लागि आदेश दिएको थियो। यसको भोलिपल्ट फागुन १६ गते अर्का अध्यागमन अधिकृत अदालतमा उपस्थित भएका थिए। उनलाई न्यायाधीश पदमराज पाण्डेयको इजलासले धरौटीमा रिहा लागि आदेश दिएको थियो।
अदालत स्रोतका अनुसार उनीहरु सबै जना जनही ७ लाख धरौटीमा रिहा भएका हुन्। फरार रहेका ७ जना अध्यागमन अधिकृत मध्ये अब ताराबहादुर कुँवर मात्रै अदालतमा उपस्थित हुन बाँकी छ। पक्राउपुर्जी जारी भए पनि उनी किरियामा रहेको भन्दै प्रहरीले त्यतिबेला पक्राउ गरेको थिएन। पछि उनी किरिया सकिनासाथ फरार भएका थिए।
भिजिट भिसामा विदेश जाने व्यक्तिहरुका शंकास्पद कागजातहरु देखिएपछि त्रिभुवन अन्तर्राष्ट्रिय विमानस्थल प्रहरी सुरक्षा कार्यालयले अनुसन्धानका लागि भन्दै अपराध अनुसन्धान कार्यालयमा सुरुमा १ हजार ३२ थान कागजात पठाएको थियो। ती कागजात भेरिफाइ गर्ने क्रममा नक्कली भेटिएपछि नक्कली कागजात बनाउने र सेटिङमा विदेश पठाउने गिरोहमाथि प्रहरी अपरेशन चलाएको थियो।
नक्कली प्रहरी रिपोर्ट, नक्कली श्रम स्वीकृति, प्लस टुको सर्टिफिकेट, नक्कली नाता प्रमाणित कागजातहरु, कोभिडको नक्कली रिपोर्ट, नक्कली बैंक स्टेटमेन्ट, लगायतका कागजातहरु नक्कली बनाएर गिरोहले सेटिङमा भिजिट भिसामा विदेश पठाउने गरेको थियो।
अहिलेसम्म यो प्रकरणमा अध्यागमन विभागका अधिकृत, वायु सेवा निगमका कर्मचारी, प्रहरी, नेपाल एअर लाइन्सका कर्मचारी र ट्राभल्स एजेन्सीका कर्मचारी संलग्नता रहेको खुलेको थियो। २२ जनालाई प्रतिवादी बनाउँदै मुद्दा दायर गरिएको थियो। उनीहरुविरुद्ध लिखत कीर्ते र संगठित अपराधविरुद्धको कसुरमा मुद्दा चलाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750494315.png)
-1749826086.png)
