काठमाडौं– मानव बेचबिखन तथा ओसारपसार कसूर र बाल यौन दुर्व्यवहारको कसूर गरी दुईवटा मुद्दामा ग्लोबल भिषाज् कन्सल्टेन्सीका सञ्चालक मनोज पाण्डे (मनोज कुमार जैसी) विरुद्ध मुद्दा दर्ता भएको छ।
कपिलवस्तुको वाणगंगा नगरपालिका–२ घर भई काठमाडौं बानेश्वर बस्दै आएका ४१ वर्षीय पाण्डेविरुद्ध जिल्ला सरकारी वकिल कार्यालय काठमाडौंले बुधबार काठामाडौं जिल्ला अदालतमा मुद्दा दर्ता गरेको हो।
दुई छुट्टा–छुट्टै कसूरमा १८ वर्षसम्मको कैद सजाय माग दाबी गरिएको छ। मानव बेचबिखनको कसूरमा १५ वर्ष र बाल यौन दुर्व्यवहारको कसूरमा ३ वर्ष गरी १८ वर्ष कैद सजाय माग दाबी गर्दै मुद्दा दायर भएको जिल्ला सरकारी वकिल कार्यालयका सहन्यायाधीवक्ता गंगाप्रसाद पौडेलले बताए।
पीडित एक किशोरीले आफूलाई पाण्डेले बलात्कार गरेको भन्दै सामाजिक सञ्जाल टिकटक भिडियोमार्फत ८ वर्ष पुरानो घटना सार्वजनिक गरेकी थिइन्। त्यसपछि काठमाडौं उपत्यका अपराध अनुसन्धान कार्यालयले गत जेठ ७ गते पाण्डेलाई स्वयम्भूबाट पक्राउ गरेको थियो। पाण्डेमाथि थप अनुसन्धान र कारबाही प्रक्रियाका लागि जिल्ला प्रहरी परिसर काठमाडौंको जिम्मा लगाइएको थियो।
सो क्रममा पाण्डे हिरासतमा रहेका बेला अर्की एक नाबालिग पनि आफू पाण्डेबाट पीडित भएको भन्दै प्रहरीको सम्पर्कमा पुगेकी थिइन्। त्यसपछि ती नाबालिगलेसमेत जाहेरी दिएपछि बाल यौन दुर्व्यवहारकाे कसूरमा पाण्डेविरुद्ध अनुसन्धान अघि बढेको थियो। काठमाडौं प्रहरीले २५ दिन लामो अनुसन्धान सकेर अनुसन्धान फाइल जिल्ला सरकारी वकिल कार्यालयमा पेस गरेको थियो।
सरकारी वकिल कार्यालयले फाइल अध्ययन पश्चात बुधबार मुद्दा दर्ता गराएको हो। उनीविरुद्ध लगाइएका आरोपलाई पुष्टि गर्नका सहयोग पुग्ने प्रमाण पनि अभियोगपत्रमा उल्लेख गुर्नपर्ने हुन्छ। तर, पाण्डेलाई लागेको आरोप पुष्टि प्रमाणमा मुख्यगरी पीडित युवतीले टिकटकमार्फत सार्वजनिक गरेको भिडियो र बयानलाई मात्रै आधार लिइएको छ।
अभियोगपत्रमा उल्लेख गरेअनुसार पीडित भनिएकी युवतीले टिकटकमार्फत सार्वजनिक गरेको भिडयोलाई प्रहरीले मानव बेचबिखन तथा ओसार पसारको बलियो सबुदका रुपमा पेस गरेको छ। सन् २०१४ मा भएको सौन्दर्य प्रतियोगितामा आफूमाथि यौन हिंसा भएको भन्दै सामाजिक सञ्जाल टिकटकमा एक युवतीले २० वटा भिडियो सार्वजनिक गरेकी थिइन्।
उनले कार्यक्रममा आयोजकमध्येका पाण्डेले आफूलाई जबरजस्ती करणी गरेको बताएकी थिइन्। नग्न तस्बीर र भिडियोसमेत खिचेर ६ महिनासम्म बलात्कार गरेको पीडितले बताएकी थिइन्। त्यसैगरी पाण्डेकै योजना अनुसार ब्ल्याक मेलिङ गरेर अर्का एक युवकलेसमेत आफूलाई बलात्कार गरेको टिकटिकमार्फत सार्वजनिक गरेकी थिइन्।
टिकटकमार्फत पीडित युवतीले सार्वजनिक गरेको उक्त भिडियोलाई प्रहरीले सिडीमा राखेर मुख्य प्रमाणका रुपमा पेस गरेको छ। अन्य प्रमाणको रुपमा प्रहरीले तीन डाक्टरसहितको बयान पेस गरेको छ। तीन डाक्टर, पूर्वमिस नेपाल माल्भिका सुब्बा, कार्यक्रमका फोटोग्राफार श्रीधर पौडेल र पीडित किशोरीको बयानलाई मुख्य आधार मानिएको छ।
तीन डाक्टरको रुपमा निजा राजभण्डारी, मेट्रो अस्पताल महाराजगञ्जमा कार्यरत मनोचिकित्सक रामपुकार साह र नर्भिक इन्टरनेशन अस्पतालका कन्सल्टेन्ट साइक्याटे«स्ट यादव विष्टको बयानलाई प्रमाणको रुपमा पेस गरिएको हो।
पीडित युवती स्वास्थ्य जाँचका लागि आएको र त्यसबेला अण्डासयमा सिस्ट देखिएको भनि डाक्टर राजभण्डारीले गरेको बयानलाई प्रमाण बनाइएको छ।
उता पूर्वमिस नेपाल माल्भिका सुब्बाले ‘सौन्दर्य प्रतियोगिता भएको अन्दाजी ३ महिनापछि पीडितले फोन गरी तपाईसँग कसूरदार मनोजको बारेमा केही कुराहरू गर्नुछ’ भनेको कुरालाई पनि आधार मानिएको छ। फोटोग्राफर श्रीधर पौडेले दुर्व्यवहार भएको भन्ने जानकारी गराएपछि पाण्डेलाई त्यतिबेलै क्यालेन्डरले कुटेको बयान दिएका छन्।
परीक्षणका लागि पठाइएको पाण्डेको अफिसमा भेटिएको ल्यापटपलाई पनि प्रमाण बनाइएको छ। उक्त ल्यापटबाटसमेत केही प्रमाण जुट्नसक्ने औंल्याउँदै प्रहरीले परीक्षण रिपोर्ट आएपछि पेस गरिने भन्दै ल्यापटपलाई दसी बनाएको छ।
यीनै कुरालाई आधार मानेर प्रहरीले उनीविरुद्ध मानव बेचबखिन तथा ओसार पसारको कसूर आकर्षित हुने दाबी गर्दै सरकारी वकिल कार्यालयमा फाइल पेस गरेको थियो। सक्सेस पार्टीको बाहनामा बोलाएर बलात्कार गर्ने, अश्लिल भिडियो बनाएर सार्वजनिक गरिदिने धम्की दिँदै वेश्यावृत्तिमासमेत लगाउने, बन्धक बनाउने लगायतका कसूर मानव ओसारपसार अन्तर्गतको अपराध भएकाले उक्त कसूर आकर्षित हुने दाबी गरिएको छ।
मानव बेचबिखन तथा ओसार पसार (नियन्त्रण) ऐन, २०६४ को दफा ३ ले निषेधित गरेको र दफा ४ को उपदफा (१) को खण्ड (ख) बमोजिम वेश्यावृत्तिमा लगाउने र वेश्यावृत्तिमा लगाउने उद्देश्यले ओसार पसार गरेकाले उक्त कानून आकर्षित हुने भएको हो।
कमजोर अनुसन्धान, खुलेनन् अर्का पुरुष
पीडित भनिएकी युवतीले पाण्डेसँगै अर्का एक जनाले पनि आफूलाई बलात्कार गरेको दाबी गरेकी थिइन्। पाण्डेले आफूले बलात्कार गरेपछि अर्को व्यक्तिलाई पनि युवतीसँग यौन सम्पर्क राख्न लगाएको आरोप लगाइएको थियो। सोही कारण पाण्डेले वेश्यावृत्तिमा लगाउनका लागि युवतीलाई ओसार पसार गरको आरोपसमेत अभियोगपत्रमा उल्लेख छ।
तर, आरोप लगाइएका ती अर्का व्यक्ति को हुन् भन्नेबारे प्रहरी अनुसन्धानबाट केही खुलेको छैन। उक्त व्यक्तिका बारेमा प्रहरीले कुनै तथ्य, प्रमाण नजुटाई अनुसन्धान सकेर फाइल पेस गरेको छ।
‘ती अर्का व्यक्तिका बारेमा पछि खुलेका बखत मुद्दा दर्ता हुने भन्दै फाइल पेस गरिएको छ। पीडितलाई जबरजस्ती वेश्यावृत्तिमा लगाउँदाको अवस्थामा वरदातमा संलग्न रहेका उचाई अन्दाजी ५ फिट ७ इन्च, गहुँगोरो वर्ण, मझौला शरीर, बाक्लो कपाल अन्दाजी ३१÷३२ वर्षको नामथर थाहा नभएको व्यक्ति, पछि पत्ता लाग्न आएमा थप प्रमाणहरू फेला पारी पेस गरिने’ अभियोगपत्रमा उल्लेख गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
