सुरक्षा/अपराध

बम्जनबाट बलात्कृत किशोरीको बयान : सहनै नसकेपछि आत्महत्या गर्न खोजें

दुर्गा दुलाल शनिबार, असार २०, २०७७ १३:२१

काठमाडौं-आफूलाई तपस्वी भन्ने रामबहादुर बम्जनले आश्रममा आनी बन्न आएकी किशोरीलाई पटक–पटक बलात्कार गर्नुका साथै मानसिक र शारीरिक यातनासमेत दिएको खुलेको छ ।

अनुसन्धानका क्रममा प्रहरीलाई दिएको बयानमा उनले बम्जनको बलात्कार सहन नसकेर आत्महत्याको असफल प्रयाससमेत गरेको बताएकी छन्।

बम्जनविरुद्ध बिहीबार १४ वर्ष कैद तथा क्षतिपूर्तिको माग गर्दै सर्लाही जिल्ला अदालतमा मुद्दा दायर भइसकेको छ। प्रहरीले पक्राउ गर्न तीन पटकसम्म अप्रेसन चलाए पनि उनी उम्कँदै आएका छन्। त्यसपछि प्रहरीले फरार अभियुक्त भन्दै उनीविरुद्ध मुद्दा दायर गरेको छ।

यो पनि पढ्नुहोस्

बम्जनविरुद्ध दुई अभियोग, १४ वर्ष कैद र क्षतिपूर्ति भराउन मागशुक्रबार, असार १९, २०७७

बयानमा किशोरीले आफूलाई बम्जनले पटक–पटक बलात्कार गरेको र घटना अरुलाई जानकारी भएपछि त्यसलाई लुकाउन आफूमाथि ८ लाख रुपैयाँ चोरीको आरोप लगाएको बताएकी छन्। गुरु मानेको व्यक्तिबाट बलात्कृत भएपछि आफूले आश्रमभित्रै आत्महत्या गर्ने प्रयास पनि गरेको तर साथीहरुले थाहा पाएर सफल हुन नसकेको बयान उनले दिएकी छन्।

अनुसन्धानका क्रममा प्रहरीलाई दिएको बयानमा उनले आफू आश्रमबाट निस्कन चाहेको बताउँदा पटक–पटक कुटपीट गर्ने अनि मानसिक र शारीरिक यातना दिइएको बताएकी छन् । बलात्कारपछि बम्जनकी श्रीमती दीपशिखा बम्जनले समेत कुुटपीट गरेको बयानमा उल्लेख छ।

पीडित किशाेरीकाे बयान

२०७१ साउन २८ मा गुरुको दर्शनका लागि पुगेको आफूलाई बुबाले आनी बनाउन उक्त आश्रममा छाडेर गएको र त्यसपछि सिन्धुपाल्चोकको आश्रममा २ वर्ष बसेर सर्लाहीको पत्थरकोट आश्रममा पुगेको उनले बयानमा उल्लेख गरेकी छन्। ‘गुरुको उक्त कार्यको विरोध गर्दा एक्कासी बुबालाई झिकाएर ८ लाख चोरीको आरोप लगाए, अनि म र मेरो भाइलाई आश्रमबाट निकालिदिए,’ बयानमा उनले भनेकी छन्।

पीडित किशाेरीकाे बयान

घटनास्थलको मुचुल्का भन्छ-फकाएर कोठामा बोलाए अनि जबर्जस्ती गरे

सरकारी वकिलको कार्यालयले जिल्ला अदालतमा दायर गरेको अभियोगपत्रमा बम्जन तपस्वी नभई ‘यौन शोषक’ भएको दाबी गरिएको छ। अनुसन्धानका क्रममा प्रहरीले तयार पारेको घटनास्थलको मुचुल्कामा १८ वर्षकी अनुयायीलाई फकाएर काम छ भन्दै बोलाउने अनि कोठाभित्र छिरेपछि चुकुल लगाएर जबर्जस्ती गर्ने गरेको उल्लेख छ।

सर्लाही लालबन्दी नगरपालिका १२ पत्थरकोटस्थित महासम्बोधी धर्म संघको आश्रममा रहेको टायलको छाना भएको २ तल्ले घरमा बम्जन बस्ने, खाने, पुजा गर्ने र सुत्ने कोठा रहेको प्रतिवेदनमा उल्लेख छ।

‘२०७३ साउन २० गते १८ वर्षकी ‘क’ (नाम परिवर्तन) लाई ललाईफकाई आफू सुत्ने कोठामा बोलाएको देखिन्छ,’ प्रतिवेदनमा भनिएको छ, ‘कोठामा आएपछि बम्जनले चुकुल लगाए र कोठाभित्र रहेको प्लाष्टिकको कार्पेटमा लडाइ रुन–कराउन नदिई, हार गुहार गर्न नदिई मुख थुनि दुवै हात समाएर जबर्जस्ती करणी गरेको,’ प्रतिवेदनमा उल्लेख छ।

पीडितका दाजुको बयान-मलाई तिम्रो शरीर चाहिन्छ भन्थे बम्जन

बम्जनले आफ्नी बहिनीलाई पटक–पटक बलात्कार गर्ने गरेको बयान पीडितका दाइले दिएका छन्। उनले (अदालतको बयानमा ‘क ४’ नाम उल्लेख) गरेको कागजमा बहिनीलाई बम्जनले किचनमा सुतेको अवस्थामा बोलाएर बलात्कार गरेको उल्लेख छ।

पीडितका दाजुले गरेको कागज

‘मलाई तिम्रो शरीर चाहिन्छ भन्दै बम्जनले संवेदनशील अंगमा छुने, सम्सुम्याउने र फकाउने गरेको बहिनीले मलाई बताइन्,’ पीडित किशोरीका दाजुले भने, ‘बम्जनले दिएको पीडा सहन नसकी काठमाडौं भागेर आएकी थिइन्।’ आनी बन्न गएकी आफ्नी नाबालक बहिनीलाई जबर्जस्ती करणी गरेकाले हदैसम्म सजाय हुनुपर्ने उनले गरेको बयानको कागजमा उल्लेख छ ।

याे पनि

असफल अपरेसनको अन्तरकथा : तालिमप्राप्त कुकुरदेखि अत्याधुनिक मेसिनसम्म फेल

'लिटिल बुद्ध' दाबी गर्ने बम्जनको आश्रममा १० घण्टा प्रहरीको 'सर्च अपरेसन', नतिजा रित्तै

आश्रममा बम्जन नभेटिएपछि पक्राउ गर्न ७७ जिल्लामा सर्कुलर

सिन्धुलीको आश्रममा भेटिएनन् बम्जन, अन्य आश्रममा पनि खोजी सुरु

बम्जनलाई पक्राउ गर्न अदालतको अनुमति, प्रहरी आश्रममा

बम्जनमाथि अनुसन्धान सुरु, सिआइबीको टोली पुग्यो सिन्धुपाल्चोक

बम्जनपीडित भन्छन्– आश्रममै मरेको भए लास पाऊँ , बाँचेको भए भेट्न पाऊँ

तपस्वी बम्जनलाई बलात्कारको आरोप

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।