बझाङ- बझाङको बुङ्गल नगरपालिका–१० टुमेडास्थित भित्री कच्ची सडक खण्डमा अटो दुर्घटना हुँदा मृत्यु हुनेको संख्या चार पुगेको छ। दुर्घटनामा परी तीन जनाको घटनास्थलमै मृत्यु भएकोमा थप खोजीका क्रममा एक बालिकाको शव फेला परेपछि मृतकको संख्या चार पुगेको हो।
सोमबार बिहान टुमेडा गाउँबाट बुङ्गल नगरपालिका–११ स्थित हिड्नेगडा बजारतर्फ जाँदै गरेको सुदूरपश्चिम प्रदेश ०१–००१ ह ७९९८ नम्बरको अटोको ब्रेक फेल भई सडकबाट करिब ९०० मिटर तल भिरमा खसेर दुर्घटना भएको प्रहरीले जनाएको छ। अटोमा चालकसहित ६ जना सवार थिए।
दुर्घटनाको जानकारी प्राप्त हुनासाथ अस्थायी प्रहरी पोस्ट पुतलीलेकबाट प्रहरी सहायक हवल्दार उत्तम सिंह बोहराको कमाण्डमा चार जनाको प्रहरी टोली घटनास्थलमा खटिएको थियो। त्यसैगरी, इलाका प्रहरी कार्यालय बुङ्गलबाट प्रहरी नायब निरीक्षक तेजबहादुर रावलको कमाण्डमा चार जनाको टोलीसमेत उद्धार तथा खोजी कार्यका लागि परिचालन भएको थियो।
थप खोजी तथा अनुसन्धानका लागि जिल्ला प्रहरी कार्यालय बझाङबाट प्रहरी निरीक्षक उपेन्द्र तिमिल्सैनाको कमाण्डमा सात जनाको टोलीसमेत घटनास्थल पुगेको थियो।
दुर्घटनामा मृत्यु हुनेमा बुङ्गल नगरपालिका–१० की अन्दाजी ३५/४० वर्षीया राजमति महरा, १५/१६ वर्षीया तारा महरा, ५/६ वर्षीया डल्ली महरा र अन्दाजी चार वर्षीया रियास महरा रहेका छन्।
यस्तै, सोही ठाउँका अन्दाजी १२/१३ वर्षीय बिक्रम महरा सकुशल घरतर्फ गएको बुझिएको छ। दुर्घटनाग्रस्त अटो भने घटनास्थलमै रहेको प्रहरीले जनाएको छ।
अटो चालक बुङ्गल नगरपालिका–११ निवासी २५ वर्षीय टेकबहादुर पातलीलाई प्रहरीले नियन्त्रणमा लिएको छ। दुर्घटनाबारे थप अनुसन्धान भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।