फाइल फोटो
काठमाडौं- पश्चिम रुकुमको चौरजहारी नगरपालिका-८ स्थित सोतीमा ६ जनाको ज्यान गएको घटनाको छानबिन गर्न गएको उच्चस्तरीय समिति काठमाडौं फर्किएको छ। स्रोतका अनुसार गृहमन्त्रालयद्वारा गठित उच्चस्तरीय छानबिन समिति बिहीबार काठमाडौं फर्किएको हो।
गृह मन्त्रालयले बनाएको छानबिन समितिमा सहसचिव जितेन्द्र बस्नेत एसएसपी जनक भट्टराई, राष्ट्रिय अनुसन्धानका सहअनुसन्धान निर्देशक ओमबहादुर खड्का, उपसचिवद्वय वशिष्ट घिमिरे र माधव ढकाल छन्। बस्नेत नेतृत्वको उक्त टोलीले घटनास्थलको अध्ययन, आरोपित, प्रत्यक्षर्शी, पीडितका परिवार, घाइते, स्थानीय जनप्रतिनिधि, प्रहरीलगायतसँग सोधपुछ गरेको थियो।
घटनास्थलको अध्ययन गरेर फर्किएको उक्त टोलीले अब प्रतिवेदत तयार पारेर गृहमन्त्रालयलाई पेश गर्ने तयारी गरेको छ।
यो छानबिन समितिले काठमाडौं फर्किए पनि प्रहरीले घटनाको अनुसन्धान गरिररहेको छ। प्रहरीको केन्द्रीय अनुसन्धान ब्यूरो सिआइबीबाट खटिएको प्रहरी टोलीले पनि स्थानीय प्रहरीलाई अनुसन्धानमा सहयोग गरिरहेको छ। सिआइबीले विभिन्न ‘टेक्निकल पार्ट’का बारेमा अनुसन्धान गर्न सकिने विषयमा र अनुसन्धानका गाँठाहरु फुकाउन सहयोग गरेको सिआइबीले जनाएको छ।
घटना कसरी भयो, आरोपित युवतीले फोन गरेर नवराज विकलाई आफ्नो घर बोलाएको कि होइन, घटनाको कारण जातीय हो कि अरु पनि छ जस्ता प्रश्नमा केन्द्रित रहेर प्रहरीले अनुसन्धान गरिरहेको छ।
थप ७ जना पक्राउ
६ जनाको ज्यान गएको उक्त घटनामा संलग्न भएको आरोपमा रुकुम प्रहरीले चौरजहारी नगरपालिका–८ का वडाध्यक्ष डम्बरबहादुर मल्ल, केटीका बुवा वीरबहादुर, आमा प्रकाशी मल्ल, तुलबहादुर मल्ल, मानबहादुर मल्ल, डिल्ली मल्ल, सन्तोष मल्ल, रमेश मल्ललगायत १२ जनालाई सुरुमा नियन्त्रणमा लिएर अनुसन्धान सुरु गरेको थियो। उक्त घटनामा संलग्न भएको आरोपमा थप ६ जना केही दिनपछि पक्राउ परेका थिए। यसरी पक्राउ पर्नेको संख्या १८ पुगेको थयो।
यता पीडित परिवारले भने २० जना विरुद्ध जाहेरी दिएका थिए। उनीहरुले जाहेरी दिएकामध्ये बाँकी २ जना फरार छन्।
तर बिहीबार राति प्रहरीले घटनामा संलग्न भएको आरोपमा थप ७ जनालाई पक्राउ गरेको छ। पक्राउ पर्नेमा चौरजहारी नगरपालिका–८ सोतीका ४० वर्षीय नेत्रबहादुर मल्ल, २४ वर्षीय रमित पुन, २१ वर्षीय नवीन घर्ती, ३० वर्षीय रेशम मल्ल, २१ वर्षीय धनराज राना, २४ वर्षीय विराज पुन र २२ वर्षीय भीम पुन रहेका छन्।
पक्राउ परेका अन्य व्यक्तिको बयानका आधारमा उनीहरुलाई पक्राउ गरिएको पश्चिम रुकुमका डिएसपी ठकबहादुर केसीले जानकारी दिए।
‘हामीले पक्राउ परेकाहरुको धमाधम बयान लिइरहेका छौं। सो क्रममा उनीहरुको पनि नाम जोडिएपछि पक्राउ गरिएको हो। अब अनुसन्धानले पुष्टि गर्ला उनीहरुको संलग्न भए नभएको’, केसीले भने।
उनीहरु पक्राउ परेसँगै यो घटनामा संलग्न भएको आरोपमा अहिलेसम्म २५ जना पक्राउ परिसेकका छन्। बिहीबार मात्रै दोस्रो पटक १० दिन हिरासतमा राखेर अनुसन्धान गर्न अदालतले म्याद दिएको छ। उनीहरुविरुद्ध कर्तव्य ज्यानको कसुरमा अनुसन्धान भइरहेको छ।
आयोगको टोली घटनास्थलमै
यस घटनाको छानबिन गर्न गएको राष्ट्रिय मानव अधिकार आयोगको टोली पनि अहिले रुकुममै छ। अन्तरजातीय विवाहको विषयमा विवाद हुँदा भएको उक्त चौरजहारी घटनाको छानबिन गर्न आयोगको टोली गत आइतबार घटनास्थल गएको थियो।
आयोगका उपनिर्देशक चन्द्रकान्त चापागाईंको नेतृत्वमा रहेको आयोगको टोलीले उक्त घटनाको पृष्ठभूमि, जातीय विभेदको अवस्था, घटनाको तत्कालीन कारण, घटनापश्चात् शान्तिसुरक्षा र सामाजिक सद्भावको अवस्था तथा स्थानीय प्रशासन र प्रहरीबाट भइरहेको निष्पक्ष अनुसन्धान एवम् शान्तिसुरक्षाको कार्य सम्बन्धमा अनुगमन तथा अनुसन्धान गर्ने गरिएको जनाएको छ।
जातीय विभेदसँग सम्बन्धित उक्त अमानवीय तथा आपराधिक घटनालाई कुनै पनि पक्षले तरंगित र अतिरञ्जित बनाउने कार्य नगर्न तथा घटनाको निष्पक्ष अनुसन्धान गरी दोषीहरुलाई कानुन बमोजिम कारबाही गर्ने प्रक्रियामा आवश्यक सबै प्रकारको सहयोग पुर्याउन आयोग जनप्रतिनिधिहरु, राजनीतिक दल, मानव अधिकारकर्मी, नागरिक समाज र स्थानीय बासिन्दा समेतलाई आयोगले यसअघि नै आग्रह गरेको थियो। आयोगको टोलीले केही दिनमै छानबिन सकेर काठमाडौं फर्कने जनाएको छ। त्यसपछि आयोगले आफ्नो प्रतिवेदन सार्वजनिक गर्नेछ।
यस्तो थियो घटना
जाजरकोटको भेरी नगरपालिका–४ रानागाउँका २१ वर्षीय युवक नवराज विक र छिमेकी जिल्ला पश्चिम रुकुमको चौरजहारी नगरपालिका–८ सोतीकी १७ वर्षीया मल्ल थरकी एक किशोरीबीच प्रेम बसेको थियो।
तल्लोको जातको केटा भएको भन्दै केटीका परिवारले उनीहरुको विवाह अस्वीकार गरेको आरोप छ। त्यसपछि केटीकै आग्रहमा नवराजसहित १९ जना युवा ती किशोरीलाई लिन जेठ १९ गते उनको घर जाँदा परिवार र स्थानीयले लखेटीलखेटी कुटेको आरोप लागेको छ।
कुटाइकै क्रममा नवराजको मृत्यु भएपछि नदीमा फालेको आरोप नवराजको परिवारको छ।
उक्त घटनामा नवराजसहित टिकाराम सुनार, गणेश बुढा, लोकेन्द्र सुनार तथा सञ्जु विक, भेरी नगरपालिका–११ का गोविन्द शाहीको हत्या भएको थियो। उनीहरुको पोष्टमार्टम रिपोर्टमा समेत शरीरभर निलडाम देखिएको थियो।
सम्बन्धितः
वडाध्यक्षसहित १८ जनालाई १० दिन थुनामा राख्न अदालतको अनुमति
थुनामा रहेकाको म्याद थप गर्न जिल्ला अदालत पेश
चौरजहारी घटनाको अनुसन्धान गर्न सिआइबीको टोली खटाइयो
चौरजहारी घटना: छानबिन गर्न मानव अधिकार आयोगको टोली घटनास्थल प्रस्थान
चौरजहारी घटनाको विरोधमा कांग्रेस भ्रातृ संस्थाको विरोध
चौरजहारी घटनाका दोषीलाई कारबाहीको दायरामा ल्याइन्छ : गृहमन्त्री थापा
चौरजहारी घटनाको छानबिन गर्न कांग्रेसद्वारा संसदीय समिति गठनको माग
चौरजहारी घटनालाई बिग्रन दिन्नौं : महान्याधिवक्ता खरेल
चौरजहारी घटनाको अनुसन्धान गर्न सिआइबी टोली पठाउने तयारी
खेलकुदले जुराएको प्रेममा जात तगारो, कसरी मारिए नवराज?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
