काठमाडौं- रामबहादुर थापा (बादल) गृहमन्त्री हुन्। उनका सहोदर भाइ नरेश थापा भने जेलमा छन्। डिल्लीबजार कारागारका जेलर अरुण पोखरेलका अनुसार नरेश फागुन १९ देखि कारागारको 'क' ब्लकमा छन्।
व्यापारीलाई धम्क्याएर रकम असुलीमा सक्रिय समूहमा संलग्न देखिएका उनलाई प्रारम्भमा काठमाडौं जिल्ला अदालतले धरौटीमा रिहा गरेको थियो। तर उच्च अदालत पाटनले सोही मुद्दामा सुनुवाइ गर्दै जिल्लाको आदेश उल्टाएर धरौटी खारेज गरिदिएपछि नरेशले जेल बस्नु पर्ने भएको हो।
‘हामीलाई नरेश गृहमन्त्री थापाका भाइ हुन् भन्ने समेत थाहा थिएन,’ जेलर पोखरेलले भने, ‘मिडियाले साधेपुछ गर्न थालेपछि मात्रै गृहमन्त्रीका भाइ भएको जानकारी पाइयो। अहिलेसम्म भेटघाट गर्न कोही आएका पनि छैनन्।'
निर्माण व्यवसायी महासंघका अध्यक्ष शरदकुमार गौचनको २०७४ असोज १३ गते गोली हानी हत्यामा संलग्न भएको आरोपमा पक्राउ परेका समीरमान बस्नेत अहिले केन्द्रीय कारागारमा जेल जीवन बिताइरहेका छन्। उनकै समूहसँग नरेशको संलग्नता देखिएको हो।
जेलमै रहँदा समेत बस्नेतको आपराधिक काम रोकिएन। बस्नेतल जेलबाटै धम्क्याएर व्यवसायीबाट रकम असुल्ने योजना बनाए। उनकै समूहका सदस्य काठमाडौं स्युचाटारका पवन खड्का र इचंगुनारायणका सुरेन नगरकोटीमार्फत् व्यवसायीलाई धम्क्याएर रकम असुल्ने योजना बनाएका थिए। धम्क्याउँदै रकम माग गरेको भन्दै व्यवसायी जयराम लामिछानेले केन्द्रीय अनुसन्धान ब्युरो सिआइबीमा जाहेरी दिए। प्रहरीले पवन र सुरेनलाई पक्राउ गरेपछि दुवैसँग गृहमन्त्रीका भाइ नरेशको पटकपटक कुराकानी भएको देखिएको र ‘मिलेर काम गर्नुपर्छ’ भन्ने सन्देश समेत आदानप्रदान भएको पाइएपछि सिआइबीले नरेशलाई गत भदौमा पक्राउ गरेको थियो।
प्रहरीले उनीहरूविरुद्ध ७७ पुष्ठ लामो अभियोगपत्र दायर गरेको थियो। जसमा समीरमानसँगको मिलेमतोमा व्यवसायीलाई धम्क्याएर पैसा उठाउन खोजिएको उल्लेख थियो। तर व्यवसायीबाट रकम उठाएको कुरा उल्लेख थिएन।
त्यसबेला नरेशले प्रहरीको बयानमा आफू समीरलाई भेट्न नगएको, धम्क्याउने काममा आफ्नो कुनै पनि संलग्नता नरहेको र कुनै निर्देशन नदिएको बताएका थिए।
केन्द्रीय कारागारको सुरक्षार्थ खटिएका तत्कालीन इन्स्पेक्टर विपिन ओझाले भने नरेशले बस्नेतसँग जेलभित्रै भेटेको आफूले देखेको बयान दिएका थिए।
जेलको फोनबाट पटकपटक सम्पर्क गर्दा आपराधिक योजना सार्वजनिक हुने भन्दै केही प्रलोभन पारेर समीरमानले कारागारमै खटिएका प्रहरी जवान वीरबल भट्टराईको मोबाइलमार्फत् पनि नरेश र अन्य व्यक्तिसँग सम्पर्क गरेको अनुसन्धानबाट खुलेको थियो।
जेलमा फोनमा बोल्न कडाई गरिएपछि बस्नेतले प्रलोभनमा पारेर प्रहरीकै जवानको मोबाइलबाट फोन गर्ने गरेका थिए।
यी तथ्यले नरेश पनि अभियुक्त बनेका थिए। तर जिल्ला अदालतले उनलाई धरौटीमा छोड्ने आदेश दियो। धरौटीविरुद्ध उच्च अदालत पाटनमा परेको पुनरावेदनमा आदेश उल्टिँदा धरौटी खारेज भयो। मुद्दा किनारा नलागेसम्म नरेशले जेल बस्नुपर्ने भयो। आदेश उल्टिएपछि नरेश आफै हाजिर भएका थिए।
अर्का अभियुक्तको दुबईमा मस्ती
संगठित अपराध र आपराधिक लाभको कसुरमा नरेशसहित जेलमा रहेका समीरमान बस्नेत, पवन खड्का, सुरेन नगरकोटी, काठमाडौं भेडासिंहका शैलेश प्रजापति, काठमाडौं नागार्जुनका विनोद लामा, वीरबल भट्टराई, मनबहादुर पुनमगर, बाग्लुङका जावेद अनवरदिनलाई विपक्षी बनाएर जिल्ला अदालत काठमाडौंमा गत भदौ अन्तिम साता मुद्दा दायर भएको थियो।
सोही कसुरमा गृहमन्त्रीका भाइ नरेशबाहेक अन्यलाई पुर्पक्षमा राख्न जिल्ला अदालतले आदेश दिएको थियो। नरेश भने १ लाख धरौटीमा असोज १ गते रिहा भएका थिए।
उनलाई रिहा गर्ने आदेशविरुद्ध सरकारी वकिलको कार्यालय उच्च अदालत पाटन पुगेको थियो। अन्ततः उच्च अदालत पाटनले जिल्लाको आदेश उल्टाउँदै नरेशलाई थुनामै राख्न गत माघ २३ गते आदेश दियो।
उच्चले थुनामा राख्ने आदेश दिएको एक महिनापछि फागुन १९ गते प्रहरीमार्फत् अदालत पुगेका नरेशसहित सोही कसुरमा प्रतिवादी बनाइएका अन्य ६ जनाले अहिले जेलजीवन बिताइरहेका छन्।
सोही मुद्दाका अर्का एक प्रतिवादी भने अहिलेसम्म पक्राउ पर्न सकेका छैनन्। उनी हुन्, जावेद अनवरदिन।
जावेद भने दुबईमा बसेर इन्टरनेटमार्फत् नेपाली व्यवसायीहरूलाई धम्क्याउँदै रकम असुलेको आरोप सिआइबीले पेश गरेको अभियोग पत्रमा उल्लेख छ। तर उनी भने अहिलेसम्म पक्राउ पर्न सकेका छैनन्। यद्यपि उनीविरुद्ध रेड नोटिस जारी गरेर पक्राउ गर्ने तयारी सुरु गरिएको प्रहरी स्रोतले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
