काठमाडौं जिल्ला अदालतको थुनुवाका लागि बस्ने कक्ष (कोठा नम्बर २०)। बयान चलिरहेका बेला खाजा खाने ब्रेकका समयमा गृहमन्त्रीका भाइलाई यही कक्षमा राखिएको थियो।
काठमाडौं- बिहीबार गृहमन्त्री रामबहादुर थापा ‘बादल’का साहिँला भाइ नरेशकुमार थापा पक्राउ परेको खबर सामाजिक सञ्जालदेखि मिडियासम्म भाइरल बन्यो।
बहालवाला गृहमन्त्रीकै भाइमाथि जेलमा रहेका कैदी समीरमान बस्नेतसँग मिलेर व्यवसायीलाई धम्क्याउँदै पैसा असुल्ने कार्यमा संलग्न भएको आरोप लागेको थियो।
उनीसहित पक्राउ परेका अन्य व्यक्तिको बयान बिहीबार काठमाडौं जिल्ला अदालतमा भयो।
जिल्ला अदालत काठमाडौंको पश्चिम दक्षिणतर्फको ४ नम्बर इजलास। दिउँसो ठिक १ बजे पुग्दा इजलासका न्यायाधीश मेदिनीप्रसाद पौडेलले विभिन्न मुद्दाका फाइल पल्टाउँदै अध्ययनमा व्यस्त थिए।
न्यायाधीशको बारभन्दा अगाडि एक महिला इजलास अधिकृत फाइल मिलान गर्न र लेखनमा व्यस्त थिइन्।
४ नम्बर इजलासको मूल ढोका छेउ नजिकैको कठघरा नजिक अर्का इजलास सहायक एक कर्मचारी कम्युटरमा अभियुक्तका बयान टाइप गरिरहेका थिए।
उनको अगाडि खडा भएका थिए, एक युवा। छोटो कपाल, फ्रेन्च कटको मसिनो दाह्री, सेतो सर्ट र पाइन्ट, ती युवाको हुलिया यही थियो।
यसरी इजलास सहायकको अगाडि खडा भएर बयान दिने ती युवा थिए, प्रहरी जवान वीरबल भट्टराई। जसलाई आरोप लागेको छ, जेलमा रहेका कैदी समीरमानलाई फोन गर्न आफ्नो मोबाइल दिएको।
४ नम्बर इजलासको दायाँतर्फको अन्तिम बेन्चभन्दा माथिल्लो बेन्चमा पट्यारलाग्दो पाराले बसेका छन्, अर्का खाइलाग्दा ज्यान भएका अधवैंशे पुरुष।
मसिनो तिलचामले केस। रातो अनुहार। निलो टिसर्ट। कालो कपडाको पाइन्ट। खुट्टामा छालाका जुत्ता। सोचमग्न अवस्थामा हात बाँधेर बसेको। दुवै खुट्टा च्याप्प पारेर जाडिएको छ। बेन्चमा अढेस नलागी एकोहोरो टहलिएका छन्। यसरी निकै चिन्तित मुद्रामा जिल्ला अदालतका ४ नम्बर इजलासमा बस्ने ती व्यक्ति थिए, गृहमन्त्री थापाका साइला भाइ नरेश थापा।
पंक्तिकार करिब आधा घन्टा इजलासमा बस्दा उनले दाँया बायाँ र पछाडि मुन्टो फर्काएर कतिबेलै हेरेनन्। एकोहोरो न्यायाधीतर्फ र घोसेमुन्टो लगाएर भुँइतिर मात्रै हेरिरहे।
नरेशकै सिधा अगाडि उनकै साइडमा थिए, अर्का अग्लो कद, लामो कपाल र हट्टाकट्टा ज्यान भएका युवा। उनी हुन् पवन खड्का। उनकै बयानले नरेशलाई पोलिएपछि नरेश अभियुक्त बनेर बयान दिन अदालत पुगेका थिए।
‘आफूले फुटकोट क्याफे सञ्चालन गरेको। त्यही धम्क्याएर पैसा उठाउने योजना बनेको। समीरमानलाई भेट्न गृहमन्त्रीका भाइ नरेशसमेत गएको, नरेशसहितको संलग्नतामा व्यवसायीलाई धम्क्याएको हो’ पक्राउ परेका पवनले प्रहरीसमक्ष बयानका क्रममा भनेका थिए।
प्रहरी जवान भट्टराईको बयान सकिएपछि खाजा ‘ब्रेक’ भयो। त्यसबेला साढे १ बजिसकेको थियो। त्यसपछि इजलासको पछिल्लो ढोकाबाट निकालियो, धम्क्याएर पैसा उठाएको आरोपमा पक्राउ परेका काठमाडौं नागार्जुनका विनोद लामा, प्रहरी जवान वीरवल भट्टराई, मनबहादुर पुन मगर, पवन खड्का, सुरेन नगरकोटी र नरेशलाई।
सोही आरोपमा पक्राउ परेका शैलेश प्रजापतिको हिजै बयान सकिएकाले उनलाई उपस्थित गराइएको थिएन।
इजलासको ढोकाबाट निस्कने बित्तिकै नरेशसहित सबैले आफ्नो खल्तीबाट मेडिकल मास्क निकालेर मुख छापे। सायद उनीहरुलाई लाज र इज्जतको भय थियो। मास्क लगाउनुभन्दा पहिला नरेशको अनुहार नियाल्दा अन्य अभियुक्तको भन्दा निकै पश्चताप गरेजस्तो देखिन्थ्यो।
बर्दीका प्रहरीले नेरेशलाई हत्कडी लगाउन हात मागे। प्रहरी जवानको त्यो भनाई मान्दै नरेशले आज्ञाकारी छात्र जसरी सहजै हात तेर्स्याए। उनका दुबै हात जोडिए र हत्कडी लाग्यो।
नरेशकै जसरी पवनको हातमा पनि हत्कडी लगाइयो। बाँकी ४ जनालाई दुई/दुई जना गरेर प्रहरीले हत्कडी लगायो। २/४ मिनेट उनीहरु ४ नम्बर इजलास अघि आफन्तसँगै टहलिए।
प्रहरीकै पछि लुरुलुरु एक तलामुनि दक्षिण पूर्वतर्फ रहेको थुनुवा कोठा २० नम्बर उनीहरु ६ जना नै पुगे। त्यसबेला उक्त कोठा खाली थियो। ढोकाको छेउको बेन्चमा पवन बसे। त्यसपछि नरेश, विनोद क्रमशः बसे। उनीहरुको अनुहारको मास्क भने खुलेको थिएन। प्रायः सबैजसो एकअर्कासँग कुराकानी गर्थे।
तर गृहमन्त्रीका भाइ नरेशले भने एक शब्द कसैसँग कुरा गरेनन्। उनी निकै चिन्तित देखिन्थे। सबैजसो अभियुक्तका आफन्त अदालतमा उनीहरुलाई भेट्न जंक फुड लिएर आएका थिए। तर नरेशलाई भेट्न कोही आएको देखिएन।
एकछिन अघि खाली रहेको जिल्ला अदालतको थुनुवा कक्ष एकैछिन पछि भरियो। वर्गाकार कोठा चारैतर्फ राखिएका बेन्चले भरिए। खाली रहेको बीच भुँइमा पनि अभियुक्त थच्याकथुचुक बसे। हेर्दिनँ भन्दा पनि एकले अर्कासँग आँखा जुध्ने अवस्था थियो
थुनुवा कक्षको बाहिर आहोरदोहोर गरेका केही जानकार व्यक्ति इसारा गर्थे, ‘ऊ ती निलो टिसर्ट लगएका मोटामोटा परेका मान्छे गृहमन्त्रीका भाइ रे!’
१ घन्टा लामो खाजा ‘ब्रेक’ सकिएपछि प्रहरीले पुनः ६ जनै अभियुक्तलाई ४ नम्बर इजलासमा पुर्यायो। त्यसपछि बयान दिने पालो आयो- अर्का अभियुक्त विनोद लामाको।
प्रहरीको जस्तै हेयर-स्टाइल। ब्रिन्जल कलरको टिसर्ट। जिन्सको पाइन्ट। खुट्टामा चप्पल लगाएका लामा बयान दिन अघि बढे।
झन्डै तीन घन्टा लामो समय उनकै बयानमा बित्यो।
बिहीबार अन्य अभियुक्तको बयान लिन सक्ने अवस्था नभएपछि प्रहरीले उनीहरुलाई बा २ क ५६४ नम्बरको सेतो हाइसमा राख्यो।
चालकलगत्तै पछाडिको झ्यालतर्फको सिटमा नरेश थचक्क बसे। गाडीभित्र बसेपछि अन्य अभियुक्तले मास खोलिसकेका थिए। आफ्नो लाज त्यही मेडिकल मास्कले ढाकेको महसुस गरेका नरेशले गाडीभित्र पनि मास्क खोलेनन्।
अन्य अभियुक्त कानेखुसी गर्दै गाडीमा बसे। तर नरेश मास्क लगाएर गाडीभित्रै घोसेमुन्टो लगाइरहे।
बयान सकिएपछि आफन्तलाई 'बाई' गर्दै विनोद लामा पनि गाडी चढे।
दिउँसो ५ बजेर १७ मिनेटमा जिल्ला अदालतबाट गृहमन्त्रीका भाइ नरेशसहित ६ अभियुक्त बोकेको हाइस बाहिरियो।
उनीहरु फेरि अर्को दिन बयानका लागि खडा हुनेछन्।
प्रहरीले उनीहरुविरुद्ध ७७ पुष्ठ लामो अभियोगपत्र दायर गरेको छ।
जसमा समीरमानसँगको मिलेमतोमा व्यवसायीलाई धम्क्याएर पैसा उठाउन खोजिएको उल्लेख छ।
तर अहिलेसम्म कुनै पनि व्यवसायीबाट रकम भने उनीहरुले उठाएको कुरा उल्लेख छैन।
स्रोतका अनुसार नरेशले प्रहरीको बयानमा आफू समीरलाई भेट्न गएको स्वीकार गरेका छन् तर धम्क्याउने काममा आफ्नो कुनै पनि संलग्नता नरहेको र कुनै निर्देशन नदिएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752504514.jpg)
-1752390485.png)
-1749826086.png)
