कुर्मीलाई गोली हान्ने भारतीय सुटर भन्छन्- २ राउण्ड हवाई फायर गर्दा पैसा दिएको भए उनी बाँच्थे

नेपाल लाइभ

दीपक घिमिरे शुक्रबार, कात्तिक १, २०७६ १५:०२

रुपन्देही– समय गत भदौ २९ गते गते। बिहानको साढे १० बजेको थियो। रुपन्देहीको रोहिणी गाउँपालिका–३ ओमसतियाका महेन्द्र प्रसाद कुर्मी, श्रीमती विजयलक्ष्मी कुर्मी र दूधे बालकलाई लिएर हिमालयन बैंकमा पुगे।

कुर्मी परिवार सिद्धार्थनगर नगरपालिका–८ मा रहेको हिमालयन बैंक पुग्नु अगावै भारतीय मुलका ३/४ जना नागरिक बैंकमै थिए। बैंकमा भइरहेको आर्थिक कारोबारको गतिविधि सिकारी कुकुरझैं चनाखो भएर उनीहरुले नियालिरहेका थिए। मानौं उनीहरुको ड्युटी नै कसले के गरिरहेको छ भनेर नियाल्न राखिएको छ।

कुर्मीले बैंकबाट ५ लाख रुपैयाँ निकाले। बैंकमै रहेका ती अपरिचित भारतीयले कुर्मीले ५ लाख रुपैयाँ निकालेको सुइको पाइसकेका थिए। उनीहरु अब उक्त रकम लुट्न उपयुक्त समय र ठाउँको पखाईमा थिए।
रकम निकालेपछि कुर्मी श्रीमती र बच्चासहित बैंकबाट बाहिरिए। उनीहरुकै पथचाप पच्छ्याउँदै दुईवटा भारतीय मोटरसाइकल पछि लागे।

बैंकबाट करिब ५ किलोमिटर पर रोहिणी गाँउपालिका–३ बैकुण्ठपुरमा पुगेपछि मोटरसाइकलमा गएका ३ जना व्यक्तिले कुर्मीको साथमा रहेको ५ लाख रुपैयाँ लुट्न खोजे। कुर्मीले प्रतिकार गरे।

त्यसपछि लुटेराहरुले चेतावनीको संकेत गर्दै २ राउण्ड हवाई फायर गरे। लुटेराको चेतावनीको कुर्मीले प्रवाह गरेनन्। त्यसपछि कुर्मीलाई गोली हानेर ५ लाख रुपैयाँ लुटेर लुटेराहरु फरार भएका थिए।

गाेली प्रहारबाट हत्या गरिएका महेन्द्र प्रसाद कुर्मी

उनै लुटेरामध्येका मुख्य नाइके भारतीय नागरिक ४० वर्षीय मनिष हरिजन (चमार) लाई प्रहरीले एक महिना पछि गत बुधबार पक्राउ गर्न सफल भएको छ।

भारत उत्तर प्रदेश जिल्ला गोरखपुर थाना कम्पियरगन्ज मछरी गाँउ बस्ने चमारलाई प्रहरीले बिशेष सुराकीका आधारमा सिद्धार्थनगर नगरपालिका–२ मेउडिहवाबाट पक्राउ गरिएको रुपन्देही प्रहरी प्रमुख प्रहरी उपरीक्षक (एसपी) हेमकुमार थापाले बताएका छन्।

सेतो रंगको हेलमेट लगाई युपी ५३ डिबी ९९८३ नम्बरको कालो रंगको पल्सर मोटरसाइकलमा भारत तर्फबाट नेपालतर्फ आउँदै गरेका हरिजन अन्तत पक्राउ परे पनि हत्यामा संलग्न अन्य २ जना भने अझै फरार छन्।

पक्राउ परेका हरिजनले चेतवानीमुलक हवाई फायरलाई बेवास्ता गरेकाले हत्या गर्नुपरेको बयान प्रहरी समक्ष दिएका छन्। हरिजनको बयान सुनाउँदै एसपी थापाले नेपाल लाइभसँग भने, ‘कुर्मीलाई लुटपाट मात्र गर्ने उदेश्य थियो। २ राउण्ड हवाई फायर गर्दा पैसा दिएको भए उनी बाँच्थे।’

हवाई फायरलाई समेत नटेर्दा गोली हान्न बाध्य भएको लुटेराको बयान छ।

प्रहरीको केन्द्रीय अनुसन्धान ब्यूरोको प्राविधिक सहयोगमा लामो अनुसन्धानपछि यो सफलता हात लागेको प्रहरी प्रमुख थापाले बताए। बिभिन्न बैंकका सीसीटिभी फुटेज, फोन डिटेल लगायतको गहन अध्ययन गरिएको र अपराधी पक्राउ गर्न बिभिन्न टोली परिचालन गरिएको थापाले बताए।

पक्राउ परेका हरिजनलाई भारतीय प्रहरीले खोजी गरिरहेको नेपाल प्रहरीको दाबी छ। पक्राउ परेका हरिजन यसअघि रुपन्देहीकै गैड्हवा गाउँपालिकामा भएको लुटपाटमा संलग्न रहेको प्रहरीले जनाएको छ।

प्रहरीको अनुसन्धानबाट कुर्मीको हत्यामा अहिलेसम्म कुनै पनि नेपाली पक्षका व्यक्तिको संलग्नता नदेखिएको प्रहरीको भनाइ छ। उनीहरु तर्साउने र लुटपाट गर्ने उद्देश्यका साथ नेपाल छिर्ने र लुटेपछि पुनः भारत प्रबेश गर्ने गरेको प्रहरीको अनुमान छ।

प्रहरी प्रमुख थापाले अब बैंकले पनि आफ्ना ग्राहकहरु प्रति निगरानी बढाउन आवश्यक रहेको बताए।

भारतका विभिन्न स्थानमा अपराधमा सक्रिय हुँदै नेपाल प्रबेश गरेका ती अपराधीक गिरोहले नेपालका बैंक तथा बित्तिय संस्थाहरुमा प्रबेश गरी निगरानी गर्ने सजह तरिकाले लुटपाट गर्न सक्नेमाथि लुटपाट गर्ने काममा सक्रिय रहेको प्रहरीले जनाएको छ।

रुपन्देहीका बिभिन्न बैंक तथा बित्तिय संस्थामा छिरेर मौका हेर्ने र बैंकबाटै धेरै पैसा र सजह तरिकाले लुटपाट गर्न सक्नेको पहिचान गरेपछि उनीहरुले पिछा गरेर एकान्त स्थान पाएपछि लुटपाट गर्ने गरेको प्रहरीले जनाएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।