भैरहवा- महामारीको रुपमा फैलिएको कोरोना भाइरसका कारण भारतबाट स्वदेश आउने नेपालीको संख्या बढेपछि भैरहवामा होल्डिङ सेन्टरको स्थापना गरिएको छ। स्वदेश फर्किने नेपालीको चाप बढेसँगै सीमा क्षेत्रमै अलपत्र हुन नपरोस् भन्दै भैरहवाको प्रतिमान निमा स्मृती प्रतिष्ठानमा होल्डिङ सेन्टर निर्माण गरिएको छ।
होल्डिङ सेन्टरको व्यवस्थापन नेपाली सेनालाई दिइएको छ। सेनाको समूहले स्वदेश फर्किएका नागरिकको पहिचान राख्ने र गन्तव्यमा पुर्याउनका लागि सहजीकरण गरिरहेको छ। उनीहरुलाई सवारी साधनको व्यवस्थापन गरी गन्तव्यमा पुर्याइने जिल्ला प्रशासन कार्यालय रुपन्देहीका प्रशासकीय अधिकृत ध्रुबप्रसाद नेपालले जानकारी दिए।
भारतका विभिन्न राज्यहरुमा लकडाउनलाई खुकुलो बनाउँदै रेलसेवा सञ्चालन गरिएपछि रोजगारीका लागि भारतमा रहेका नेपालीहरु दैनिक सयौंको संख्यामा नेपाल फर्किएका छन्। भारतबाट फर्किएका नेपालीको सङख्या दिनानु दिन बढ्दै गएको र सीमा नाकामा भिड बढ्न जाँदा नागरिकले सास्ती भोग्न परेपछि होल्डिङ सेन्टर निर्माण गरी नागरिकलाई गन्तव्यमा पुर्याउन लागिएको जिल्ला प्रशाशन कार्यालय रुपन्देहीले जनाएको छ।
आइतबारबाट सुरु गरिएको होल्डिङ सेन्टरमा पहिलो दिन भारतबाट आएका ५ सय ९२ जना नेपालीहरुलाई गन्तव्यमा पुर्याइएको छ।
जिल्ला प्रशासन कार्यालय रुपन्देहीको आग्रह अनुरुप होल्डिङ सेन्टर निर्माण गर्न दिइएको प्रतिष्ठानका निर्देशक धर्म केसीले जानकारी दिए। सरकारले लिएको होल्डिङ सेन्टरको नीतिले नेपालीहरुले अब थप दुःख पाउनुनपर्ने भन्दै उनले खुसी व्यक्त गरे। उनले नेपाली नागरिक सीमामा अलपत्र पर्दा आफूहरुलाई निकै पीडा महसुस भएको भन्दै होल्डिङ सेन्टरले आम नागरिकलाई सहजता थपेको बताए।
प्रतिष्ठानमा रहेको क्वारेन्टाइनमा अहिले ४० जना नेपाली नागरिकहरु रहेको छन्। यसअघि नेपालमा रहेका भारतीय मजदुरलाई राख्न प्रतिष्ठानको कार्यालय भवनलाई क्वारेन्टाइनको रुपमा प्रयोग गरिएको थियो।
प्रतिष्ठानमा बनाइएको क्वारेन्टिनमा २ सय ३० भन्दा बढी भारतीय मजदुरहरु क्वारेन्टाइन अवधि पूरा गरी भारत फर्किएका छन्।
भारतको कलकत्ताबाट आएका स्याङजाका रमेश गुरुङले होल्डिङ सेन्टरका कारण आफूहरुलाई सहज भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
