अनुसन्धान

भुटानी शरणार्थी बनाएर ठगी धन्दा :बादलको सुरक्षा सल्लाहकार बनेलगत्तै राईले किनेका थिए ठेचोमा घर, बुवालाई थुनाएर छोरा फरार

नारायण अधिकारी बुधबार, वैशाख २०, २०८० २०:३३

काठमाडौं– नेपाली नागरिकलाई भुटानी शरणार्थी बनाएर अमेरिका लैजाने भन्दै करोडौ रुपैयाँ ठगी गरेको आरोपमा विगत दुई दिनदेखि तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई प्रहरी हिरासतमा छन्।

यो ठगी प्रकरणमा पक्राउ परेकाहरुमाथि गरिएको एक महिना लामो अनुसन्धानपछि राई पनि अनुसन्धानमा तानिए। पक्राउ परेकाहरुको बयान तथा विभिन्न प्रमाणले राईमाथिसमेत अनुसन्धान गर्नुपर्ने देखिएपछि प्रहरीले उनलाई ललितपुरको ठेचोस्थित घरबाटै पक्राउ गरेको थियो।

पक्राउ परेका राईले पीडितहरुको साढे ५ करोड रुपैयाँ बुझेको देखिएको छ। अहिलेसम्मको प्रारम्भिक अनुसन्धानको क्रममा नगद र चेकमार्फत गरेर राईका छोरा निरजले उक्त रकम बुझेको देखिएको अनुसन्धानमा संलग्न प्रहरी अधिकारीहरु बताउँछन्।

राई गृहमन्त्री बादलको सुरक्षा सल्लाहकारमा नियुक्त भएपछि उनले त्यसको केही समयमै ठेचोमा घर किनेकोसमेत खुलेको छ। अमेरिका पठाउने भन्दै नेपाली नागरिकलाई भुटानी शरणार्थी बनाएर करोडौं रुपैयाँ उठाएको पैसाबाट उक्त घर किनिएको प्रहरीको दाबी छ।

नेपाली नागरिकलाई भुटानी शरणार्थी बनाएर अमेरिका लैजाने भन्दै ठगी भएको बेला राई तत्कालीन गृहमन्त्री बादलका सुरक्षा सल्लाहकार थिए। उनै राईले नेपाली नागरिकलाई भुटानी शरणार्थी बनाएर अमेरिका लैजाने भन्दै पैसाको डिल गर्ने गरेको पाइएको प्रहरी स्रोतले जनाएको छ।

यो प्रकरणमा राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरुले बताएका थिए। हाल पक्राउ परेका राई स्वयम्‌ले नै कतिपयलाई भेटेर आफूले सहयोग गर्ने बताएको भन्दै पीडितहरुले बयान दिएको तथा राईलाई रकम दिएकोसमेत बताएका थिए। राईले यो काम मन्त्रीस्तरबाटै हुने र माथिसमेत मिलाउनुपर्ने भन्दै मोटो रकम असुलेको आरोप लागेको छ।

बुवालाई हिरासत पठाएर छोरा फरार
इन्द्रजित राईसँगै उनका छोरा निरज राईविरुद्ध पनि पक्राउ पुर्जी जारी भएको प्रहरीले बताएको छ। तर निरज भने पक्राउ पुर्जी जारी हुनभन्दा पहिला नै फरार भएको पाइएको छ। एक महिनाअघि यो ठगी प्रकरणमा मान्छे पक्राउ पर्न सुरु भएदेखि नै निरज फरार रहेको पाइएको छ। पीडितहरुले अमेरिका जाने भन्दै निरजको खातामा तथा भेटेर नगदै रकम बुझाएको बताएका छन्।

वृद्ध बुवा हिरासत हुँदा जवान छोरा भने फरार भएका छन्। उनी नेपालमै नरहेको प्रहरीले निष्कर्ष निकालेको छ। यो प्रकरणमा अहिलेसम्म ७ जना पक्राउ परेका छन्। राईसँगै सचिव टेकनारायण पाण्डे, ललितपुर महानगरपालिका–२३ घर भएकी ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल र पाँचथरको फिदिम नगरपालिका–७ घर भएका ४५ वर्षीय टंककुमार गुरुङ, दाङ घर भएका सन्देश शर्मा, मोरङको पथरी शनिश्चरे नगरपालिका–१० का पूर्ववडाध्यक्ष सागर राई पक्राउ परेका थिए।

यही प्रकरणमा एमालेका सचिव तथा सांसद टोपबहादुर रायमाझी, उनका छोरा सन्दीप, एमाले नेता रामबहादुर थापाका छोरा प्रतीकविरुद्ध पनि पक्राउ पुर्जी जारी भइसकेको छ।

भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए।

तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।

तीमध्ये अधिकांश वास्तविक भुटानी शरणार्थी नभइ नेपाली नागरिक रहेको खुलेको थियो। नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरुले त्यही प्रतिवेदनमा ४४६ जना नेपाली नागरिकको नाम समेट्दै उनीहरुलाई अमेरिका लैजाने भनेर रकम उठाउने गरेको पाइएको छ।