काठमाडौं –गृहमन्त्री सुधन गुरुङको भिडिओ सार्वजनिक गर्ने एक युट्यूवरलाई प्रहरीले नियन्त्रणमा लिएको छ ।
कालीकोट घर भई भक्तपुर बस्ने छत्र बोगटीलाई भक्तपुरबाट पक्राउ गरिएको जिल्ला प्रहरी परिसर काठमाडौंका प्रवक्ता एसपी दानबहादुर थापाले बताए ।
प्रहरीले उनलाई वैयक्तिक गोपनीयताको हक हनन गरेको आरोपमा पक्राउ गरेको हो । काठमाडौं जिल्ला अदालतबाट पाँच दिनको म्याद थप गरी उनीमाथि अनुसन्धान भइरहेको प्रहरीले जनाएको छ ।
गृहमन्त्री गुरुङकी ४९ वर्षीया आमा ज्ञानु लामा (ज्वालादेवी चण्डिमाता) ले आफ्नो अनुमतिबिना भिडिओ खिचेर सामाजिक सञ्जालमा सार्वजनिक गरिएको भन्दै जिल्ला प्रहरी परिसर काठमाडौंमा उजुरी दिएकी थिइन् । सोही उजुरीका आधारमा बोगटीलाई पक्राउ गरिएको प्रहरी स्रोतले जनाएको छ ।
लामो समयदेखि घरबार त्यागेर धार्मिक जीवन बिताउँदै आएकी लामाको भिडिओ केही दिनअघि सामाजिक सञ्जालमा भाइरल भएको थियो । भिडिओमा उनले छोरा सुधनसँगको सम्बन्ध र पारिवारिक अवस्थाबारे कुराकानी गरेकी छन् ।
उनले आफ्ना दुई छोरी र एक छोरा रहेको बताउँदै छोरा गृहमन्त्री भएपछि भेट नभएको र कहिलेकाहीँ काम पर्दा फोन हुने गरेको उल्लेख गरेकी थिइन् । छोराछोरीको आर्थिक सहयोग आवश्यक नरहेको बताउँदै उनले आफूलाई कुनै समस्या पर्दा मात्रै उनीहरूले सहयोग गर्ने गरेको बताएकी थिइन् ।
छोरालाई भेट्न किन नजानुभएको भन्ने प्रश्नमा उनले आफ्नो व्यवस्था मिलिसकेपछि भेट्न बोलाउने बताएकी थिइन् ।
आफ्नो भिडिओ भाइरल भएपछि लामा आक्रोशित बनेकी थिइन् । उनले अर्को भिडिओ सार्वजनिक गर्दै आफूले अन्तर्वार्ता दिन अनुमति नदिएको र अनौपचारिक कुराकानीका क्रममा लुकेर भिडिओ खिचिएको दाबी गरेकी थिइन् ।
उनले कसैको व्यक्तिगत जीवनमा आँच आउने गरी भिडिओ सार्वजनिक नगर्न आग्रह गर्दै त्यसबाट सम्बन्धित व्यक्तिलाई मानसिक तनाव हुने बताएकी थिइन् । पैसा कमाउने उद्देश्यले अरूको निजी जीवन सार्वजनिक गर्नु गलत भएको उनको भनाइ थियो ।
गृहमन्त्री निकट स्रोतका अनुसार सुधन सानै हुँदा उनकी आमाले घर छाडेकी थिइन् । त्यसपछि उनलाई मावली परिवारले हुर्काएको थियो ।
पक्राउ परेका बोगटी कलाकारसमेत हुन् । उनी नेपाली लोक तथा देउडा गायक, संगीतकार र डिजिटल क्रिएटरका रूपमा परिचित छन् । उनले गायिका अञ्जु पन्तलगायतका कलाकारसँग गीत गाएका छन् भने आफ्नै युट्युब च्यानलमार्फत पनि सिर्जना सार्वजनिक गर्दै आएका छन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।