तत्कालीन गृहमन्त्रीको सुरक्षा सल्लाहकारको रुपमा गृह मन्त्रालयको कार्यकक्षमा राई
काठमाडौं– नेपाली नागरिकलाई भुटानी शरणार्थी बनाएर अमेरिका लैजाने भन्दै करोडौं रुपैयाँ ठगी गरेको आरोपमा तत्ल्कालीन गृहमन्त्री तथा नेकपा एमालेका नेता रामबहादुर थापाका (बादल) का सुरक्षा सल्लाहकार इन्द्रजित राई पक्राउ गरेका छन्। राईलाई जिल्ला प्रहरी परिसर काठमाडौंको विशेष टोलीले मंगलबार ललितपुरको ठेचोस्थित उनको घरबाट पक्राउ गरेको हो।
राईविरुद्ध वारेन्ट जारी भएपछि प्रहरी खोजीमा जुटेको थियो। अन्तत: उनी मंगलबार बिहान पक्राउ परे। प्रहरी टोली पक्राउ गर्न राईको घर पुग्दा राई भने सहज रुपमा प्रस्तुत भए। ‘तपाईहरु आउनुहुन्छ भन्ने मलाई थाहा थियो’ भन्दै राई सहजै प्रहरीको गाडी परिसर टेकु पुगेका थिए। प्रहरीले अहिले उनलाई हिरासतमा राखेर अनुसन्धान अगाडि बढाएको छ।
आफूविरुद्ध वारेन्ट जारी भएको जानकारी पाएपछि केही दिनदेखि निदाउन नसकेको राईले प्रहरीसमक्ष बताएका छन्।
राई पक्राउ पर्नुभन्दा पहिला प्रहरीले उनीविरुद्ध प्रमाण जुटाएको थियो। तिनै प्रमाणका आधारमा पक्राउ पूर्जी जारी भएपछि उनलाई नियन्त्रणमा लिइएको परिसर काठमाडौंका प्रमुख, प्रहरी वरिष्ठ उपरीक्षक (एसएसपी) दानबहादुर कार्कीले बताए।
नेपाली नागरिकलाई भुटानी शरणार्थी बनाएर अमेरिका लैजाने भन्दै ठगी भएको बेला राई तत्कालीन गृहमन्त्री बादलका सुरक्षा सल्लाहकार थिए। उनै राईले नेपाली नागरिकलाई भुटानी शरणार्थी बनाएर अमेरिका लैजाने भन्दै पैसाको डिल गर्ने गरेको पाइएको प्रहरी स्रोतले जनाएको छ।
यो प्रकरणमा राईदेखि अन्य नेता तथा गृह मन्त्रालयकै उच्च तहका कर्मचारीको संलग्नता रहेको पीडितहरुले बताएका थिए। हाल पक्राउ परेका राई स्वयम्ले नै कतिपयलाई भेटेर आफूले सहयोग गर्ने बताएको भन्दै पीडितहरुले बयान दिएको तथा राईलाई रकम दिएको समेत बताएका थिए।
राईले यो काम मन्त्रीस्तरबाटै हुने र माथि समेत मिलाउनुपर्ने भन्दै मोटो रकम असुलेको आरोप लागेको छ।
छोराविरुद्ध पनि पक्राउ पूर्जी
इन्द्रजित राईसँगै उनका छोरा निरज राईविरुद्ध पनि पक्राउ पूर्जी जारी भएको प्रहरी स्रोतले जनाएको छ। पीडितहरुले अमेरिका जाने भन्दै निरजको खातामा तथा भेटेर नगदै रकम बुझाएको बताएका छन्।
पक्राउ परेका अन्य व्यक्तिहरुसँगको बयानबाट समेत निरजको संलग्नता देखिएकाले उनीविरुद्ध पनि पक्राउ पूर्जी जारी भएको प्रहरीले जनाएको छ। निरज भने अहिलेसम्म फरार छन्।
‘पक्राउ पूर्जी जारी भएको सूचना पाएपछि निरज अहिलेसम्म फरार छन्। हामी उनको खोजीमा जुटिरहेका छौँ,’ परिसरका एक अधिकृतले भने। ती अधिकृतका अनुसार निरजसँगै अन्य केही व्यक्तिविरुद्ध पनि पक्राउ पूर्जी जारी भएको छ।
निरजको संलग्नता नेपालीलाई भुटानी शरणार्थीलाई बनाएर अमेरिका लैजाने भनेर भएको ठगीसँगै अन्य घटनामा पनि देखिएको प्रहरी स्रोतको भनाइ छ। उनले आफ्ना बाबु गृहमन्त्रीको सुरक्षा सल्लाहकार भएको बेला प्रहरीमा आएको उजुरी तथा मुद्दामा समेत मोलमोलाई गर्दै अनुचित लाभ लिने गरेको पाइएको प्रहरी स्रोतले जनाएको छ।
कतिपय व्यक्तिलाई छाड्न तथा थुन्न दबाब दिने, नमानेको अवस्थामा सरुवा तथा कारबाही सम्मका धम्की दिने गरेको पाइएको एक अधिकृतले बताए। ‘प्रहरीमा आउने उजुरी तथा मुद्दाहरुमा समेत निरजले अनुचित लाभ लिने गरेको देखियो। उनीविरुद्ध पक्राउ पूर्जी जारी भएपछि निरजबाट पीडित भएकाहरुले अहिले उक्त कुराहरु बताउने गरेका छन्,’ एक प्रहरी अधिकृतले भने।
संगिठत अपराधको कसुरमा अनुसन्धान
प्रहरीले यो ठगी प्रकरणमा संगठित अपराधको कसुरमा अनुसन्धान अघि बढाएको छ। सुरुवाती क्रममा ठगीको कसुरमा मात्रै अनुसन्धान अघि बढाइए पनि पछि अन्य व्यक्ति समेत पक्राउ परेपछि संगठित अपराधको कसुरमा अनुसन्धान भइरहेको छ।
संगठित अपराधको कसुरमा ६० दिनसम्म हिरासतमा राखेर अनुसन्धान गर्न सकिने प्रावधान छ। यो प्रकरणमा ५० करोड रुपैयाँ भन्दा बढी ठगी भएको पाइएको छ।
यो प्रकरणमा अहिलेसम्म ६ जना पक्राउ परेका छन्। राईसँगै यो प्रकरणमा ललितपुर महानगरपालिका–२३ घर ५० वर्षीय सानु भण्डारी, मोरङको पथरी शनिश्चरे नगरपालिका–१० घर भएका ४९ वर्षीय केशवप्रसाद दुलाल र पाँचथरको फिदिम नगरपालिका–७ घर भएका ४५ वर्षीय टंककुमार गुरुङ, दाङ घर भएका सन्देश शर्मा, मोरङको पथरी शनिश्चरे नगरपालिका–१० का पूर्ववडाध्यक्ष सागर राईलाई पक्राउ परेका थिए।
भुटानी शरणार्थी समस्या समाधानका लागि भन्दै गृहमन्त्री रामबहादुर थापाको पालामा २०७६ जेठमा एउटा कार्यदल नै गठन गरिएको थियो। गृह मन्त्रालयका पूर्वसहसचिव बालकृष्ण पन्थीको संयोजकत्वमा विज्ञको रुपमा गणेशबहादुर केसी र सदस्य सचिवको रुपमा गृहका तत्कालीन शाखा अधिकृत दीपकप्रसाद न्यौपाने थिए। तर, पन्थी नेतृत्वको कार्यदलले भने मिलेमतोमा नेपाली नागरिकलाई भुटानी शरणार्थीको सूचीमा राखेको खुलेको थियो। अमेरिका लैजाने र त्यसवापत मोटो रकम असुल्ने उद्देश्यसहित ४२९ जनालाई भुटानी शरणार्थीको सूचीमा समेटिएको थियो।
तीमध्ये अधिकांश वास्तविक भुटानी शरणार्थी नभइ नेपाली नागरिक रहेको खुलेको थियो। नेपाली नागरिकलाई नै भुटानी शरणार्थीको सूचीमा राखिएको विषय सार्वजनिक भएपछि उक्त प्रतिवेदन नै गुपचुप पारिएको थियो। गुपचुप पारिएको उक्त प्रतिवेदन भने अहिले पक्राउ परेको गिरोहको हातमा पुगेको थियो। उनीहरुले त्यही प्रतिवेदनमा ४४६ जना नेपाली नागरिकको नाम समेट्दै उनीहरुलाई अमेरिका लैजाने भनेर रकम उठाउने गरेको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
