सुरक्षा/अपराध

भुटानी शरणार्थी बनाएर ठगी धन्दा : पक्राउ पुर्जी जारी भएपछि सचिव पाण्डे लुकेका थिए रिसोर्ट, पक्राउ परेपछि नुहाएर आए प्रहरी हिरासत गृहसचिव भएलगत्तै पाण्डेले किनेका थिए पेप्सीकोलामा ३ करोडको घर

नारायण अधिकारी बुधबार, वैशाख २०, २०८० १८:५१

काठमाडौं– नेपाली नागरिकलाई भुटानी शरणार्थी बनाएर अमेरिका लैजाने भन्दै करोडौ रुपैयाँ ठगी गरेको आरोपमा पूर्वगृहसचिव तथा हाल उपराष्ट्रपति कार्यालयका सचिव टेकनारायण पाण्डे पक्राउ परेका छन्।

पाण्डेलाई जिल्ला प्रहरी परिसर काठमाडौंको टोलीले बुधबार पक्राउ गरेको हो। पक्राउ परेका पाण्डेमाथि अनुसन्धान गर्न जिल्ला अदालत काठमाडौंले ३ दिनको अनुमति दिएको छ।

आउँदो तीन दिनमा हालसम्म पक्राउ परेकाहरुको म्याद सकिने भएकाले सोही अनुसार म्याद मिलान गर्न अदालतले तीन दिनको म्याद दिएको हो। त्यसपछि पुनः म्याद लिएर अनुसन्धान प्रक्रिया अघि बढाइने जिल्ला प्रहरी परिसर काठमाडौंको मुद्दा फाँटका डीएसपी निरन्जनदत्त भट्टले बताएका छन्।

यो पनि पढ्नुहोस

सचिव पाण्डेलाई सिंहदरबार प्रहरी वृत्तको हिरासतमा राखियो

यसअघि हिजो मात्रै परिसरकै टोलीले तत्कालीन गृहमन्त्री तथा एमालेका नेता रामबहादुर थापा बादलका सुरक्षा सल्लाहाकार इन्द्रजीत राईलाई पक्राउ गरेको थियो। पक्राउ परेकाहरुको अहिलेसम्मको बयान र प्राप्त प्रमाणका आधारमा मंगलबार पाण्डेलाई पक्राउ गर्न अदालतले अनुमति दिएको थियो। अदालतले पक्राउ पुर्जी दिएलगत्तै पाण्डेको खोजीमा परिसरको टोली जुटेको थियो।

आफूविरुद्ध पक्राउ पुर्जी जारी भएको सूचना पाण्डेले पाएपछि उनी फरार भएका थिए। हिजो राति नै पाण्डेलाई प्रहरीले पक्राउ गर्ने तयारी गरे पनि उनी आफ्नो घर पेप्सीकोलामा थिएनन्। उनी भक्तपुरस्थित आशापुरी रिसोर्टमा पुगेका थिए। उनी रातभर त्यही रिसोर्टमा लुकेका थिए। आज बिहान प्रहरी टोली खोजी गर्दै भक्तपुरको आशापुरी रिसोर्टमा पुगेको थियो। प्रहरीले पाण्डेलाई रिसोर्टबाट उनकै गाडीमा राखेर उनको घर पुर्‍याएको थियो।

यो पनि पढ्नुहोस

टोपबहादुरको प्रतिक्रिया- कसैसित फोटो खिचेकै आधारमा जिम्मा लिने कुरा भएन

पाण्डेले प्रहरीलाई केही बयान तथा सोधपुछका लागि एकछिन उपस्थित हुनुपर्ने वा कि बस्नै पर्ने हो भनेर सोधेका थिए। प्रहरीले बस्नुपर्ने हुन्छ सर भनेपछि पाण्डेले नुहाएर जाने इच्छा व्यक्त गरेका थिए। त्यसपछि प्रहरीले उनलाई नुहाउन समय दिएको थियो। नुहाएपछि ड्रेस चेन्ज गरेर पाण्डेले सुट लगाए। झोलामा कपडाको पोका हाले। पाण्डेलाई गाडीको बीचमा राखेर छेउछेउमा प्रहरी बसेर परिसर टेकु पुर्‍याइयो।

लगत्तै उनलाई मेडिकल जाँचका लागि पठाइयो। त्यसपछि म्याद थपका लागि अदालत लगियो। म्याद थप गर्न अदालत लैजाने बेला पाण्डेले आफ्नै गाडीमा जाने इच्छा व्यक्त गरेका थिए। तर नमिल्ने भन्दै प्रहरीले आफ्नै भ्यानमा राखेर पाण्डेलाई अदालत पुर्‍याएको थियो। अदालतले ३ दिनको म्याद दिएपछि पाण्डेलाई कहाँ राख्ने भन्दै परिसरका अधिकारीहरुले छलफल गरे। अन्य ठाउँको भन्दा अलि राम्रो र धेरै थुनुवा पनि नभएको तथा मान्छेको जमघटसमेत कम हुने भन्दै तत्कालीन सभामुख तथा माओवादी केन्द्रका नेता कृष्णबहादुर महरा बसेको प्रहरी वृत्त सिंहदरबारको हिरासतमा पठाइयो।

यो पनि पढ्नुहोस

सचिव पाण्डेलाई सिंहदरबार प्रहरी वृत्तको हिरासतमा राखिने

गृहसचिव भएलगत्तै पाण्डेले किनेका थिए ३ करोडको घर
प्रहरी अनुसन्धानका क्रममा पाण्डेले गृहसचिव भएलगत्तै तीन करोड रुपैयाँको घर किनेको खुलेको छ। उक्त घर किन्ने रकम नै भुटानी शरणार्थी बनाएर अमेरिका लैजाने भन्दै पीडितहरुबाट उठाएको रकमबाट किनिएको प्रहरीको प्रारम्भिक अनुसन्धान छ।

प्रमाणले पुष्टि गरेपछि मात्रै पाण्डेलाई पक्राउ गरिएको प्रहरीको दाबी छ। एकाएक करोडौंका सम्पत्ति देखिनु र पक्राउ परेका गिरोहसँगको कनेक्सन देखिएकाले उनलाई पक्राउ गरिएको प्रहरी अधिकृतहरुले बताएका छन्।

यो पनि पढ्नुहोस

पक्राउ परेका पाण्डेविरुद्ध अदालतबाट तीन दिन म्याद थप

गिरोहका सदस्यहरुसँग कुराकानी गरेको रकेर्डहरु देखिएको, ठगी धन्दाका लागि सहजीकरण गरिदिएको प्रमाण नै फेला परेको प्रहरीको दाबी छ। पाण्डेसँग मुख्यगरी यो ठगी गिरोहका एक नाइके सानु भण्डारीसँग कनेक्सन देखिएको प्रहरीले जनाएको छ। पीडितहरुसँग सन्देश शर्माले रकम उठाउने र उक्त रकम पाण्डेलगायतकका व्यक्तिलाई नगदै दिने काम भने सानु भण्डारीले गरेको देखिएको प्रहरीले जनाएको छ।