काठमाडौं– नेपाल टी–२० लिग क्रिकेट प्रतियोगितामा भएको स्पट फिक्सिङको अनुसन्धान प्रतिवेदन जिल्ला सरकारी वकिलको कार्यालय काठमाडौंमा पुगेको छ। नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धान सकेर मंगलबार सरकारी वकिल कार्यालयमा फाइल पठाएको हो।
सरकारी वकिल कार्यालय काठमाडौंका प्रवक्ता अच्यूतमणि नेउपानेले फायल आइसकेको नेपाल लाइभलाई बताए। ‘प्रहरीबाट मंगलबार हामीकहाँ फाइल आइसकेको छ। अध्ययन गरिसकेपछि मुद्दा दायर गर्छौं,’ नेउपानेले नेपाल लाइभसँग भने।
कीर्तिपुरस्थित त्रिवि क्रिकेट मैदानमा केही समय पहिला भएको नेपाल टी–२० लिग क्रिकेट प्रतियोगितामा ‘स्पट फिक्सिङ’ भएको आशंकामा सीआईबीले अनुसन्धान गरेको थियो।
सो क्रममा फिक्सिङ भएको निष्कर्ष निकाल्दै नेपाली राष्ट्रिय टोलीका पूर्व क्रिकेटर मेहबुब आलम र मोहम्मल आदिल अन्सारीलाई पक्राउ गरेर अनुसन्धान गरेको थियो। त्यसपछि फिक्सिङका विभिन्न पाटाहरु खुलेको सीआईबीले दाबी गरेको थियो।
१२ जनालाई मुद्दा चलाउन सिफारिस
सुरुवाती अनुसन्धानको क्रममा सीआईबीले स्पट फिक्सिङमा १० जनाको संलग्नता रहेको बताएको थियो। केही दिन अघि पत्रकार सम्मलेन गर्दै १० जनाको संलग्नता रहेको बताएको सीआईबीले अनुसन्धानको क्रममा थप २ जनाको संलग्नता देखिएको भन्दै १२ जनालाई मुद्दा चलाउन सिफारि गरेको छ।
सीआईबीले बुझाएको अनुसन्धान प्रतिवेदनमा १२ जनालाई मुद्दा चलाउनुपर्ने राय आएको सरकारी वकिल कार्यालयले जनाएको छ। जसमध्ये ३ जना मात्रै पक्राउ परेका छन्।
सुरुवाती क्रममा सीआईबीले मेहबुब र आदिमलाई सीआईबीले पक्राउ गरेको थियो। पछि वीरगञ्जका क्रिकेटर नितेश गुप्तालाई पक्राउ गरेको थियो। बाँकी ९ जनालाई फरार अभियुक्त बनाइएको छ।
लिग सञ्चालनको जिम्मा पाएको भारतीय कम्पनी सेभेन थ्री स्पोर्टस्का सञ्चालकहरुलाई समेत प्रतिवादी बनाइएको छ। सञ्चालकहरु जतिन अहलुवालिया, अभिशेक सकलानी र विनोद धानीलाई समेत प्रतिवादी बनाइएको छ।
त्यसैगरी विराटनगर सुपर किंग्सका राहुल शर्मा, विराटनगर टिमको कप्तान रहेका वेस्टइन्डिजका खेलाडी एन्ड्री म्याकार्थीले बुकी, काठमाडौं नाइट्सका मालिक नवीन कँडेलसम्मलाई फरार प्रतिवादी बनाएर मुद्दा चलाउने तयारी गरिएको छ।
खेलकुद विकास ऐन आकर्षित
प्रतियोगिताका कमेन्टेटर सचिन तिम्सिनाले सामाजिक सञ्जाल फेसबुकमा एक भिडियो पोस्ट गर्दै प्रतियोगितामा फिक्सिङ हुने गरेकाले प्रतियोगिताबाट बाहिरिएको बताएका थिए। त्यसपछि काठमाडौं नाइट्सका कप्तान ज्ञानेन्द्र मल्लले पनि आफ्नो टोली एक जनालाई फिक्सिङको प्रस्ताव आएको र एन्टीकरप्सन युनिटमा जानकारी गराएको बताएका थिए।
फिक्सिङ भएको विषय सार्वजनिक भएपछि तत्कालीन गृहमन्त्री रवि लामिछानेले प्रहरीलाई अनुसन्धान गर्न निर्देशन दिएका थिए। त्यसपछि सीआईबीले डीएसपी सुन्दर तिवारीको कमाण्डमा एउटा समिति नै गठन गरेर छानबिन सुरु गरेको थियो। सो क्रममा फिक्सिङ भएको निष्कर्ष निकालिएको थियो।
आरोपित खेलाडीहरुलाई राष्ट्रिय खेलकुद विकास ऐन २०७७ अन्तर्गतको कसुरमा कारबाही गर्नुपर्ने राय दिइएको छ। उक्त ऐनको दफा ३१ अन्तर्गतको कसुर उनीहरुलाई आकर्षित हुने बताइएको छ।
दफा ३१ मा खेलमा मिलेमतो तथा अनियमितता गर्न नहुने उल्लेख छ। यसको व्याख्या गर्दै भनिएको छ, ‘नेपालभित्र वा नेपालको प्रतिनिधित्व गरी नेपालमा वा विदेशी मुलुकमा कुनै खेलाडीसँग प्रतिस्पर्धा गर्दा कुनै खेलसम्बद्ध खेलाडी वा पदलाधिकारीले त्यस्तो खेल प्रतिस्पर्धाबाट आउने स्वभाविक परिणामले प्रतिकूल हुनेगरी कुनै खेलाडी वा खेलाडीको समूहसँग मिलेमतो गर्न वा कसैको प्रलोभनमा पर्न वा कुनै बाजी जिताउने वा हराउने गरी त्यस्तो खेल खेल्न वा खेलाउने कार्य गर्न हुँदैन।’
स्पट फिक्सिङ गरेको पुष्टि भएमा ३ वर्ष कैद र ५० हजार रुपैयाँ जरिवाना हुने ऐनमा उल्लेख गरिएको छ।
सम्बन्धित सामग्री:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
