एजेन्सी–गाजा युद्धविरामको पहिलो दिन प्यालेस्टिनी लडाकु समूह हमासले तीन जना बन्धकलाई रिहा गरेको छ।
इजरायल डिफेन्स फोर्स (आईडीएफ)ले हमासको नियन्त्रणमा रहेका तीन जना महिला इजरायल फर्किएको जनाएको छ।
इजरायली सेनालाई बुझाउनुअघि हमासले उनीहरूलाई गाजास्थित रेडक्रसलाई सुम्पिएको थियो। इजरायल फर्किएका उनीहरूलाई तेल अबिबस्थित सेवा मेडिकल सेन्टरमा प्रारम्भिक उपचार गराइएको थियो। उनीहरूको स्वास्थ्य अवस्था स्थिर रहेको त्यहाँको स्वास्थ्य अधिकारीलाई उद्धृत इजरायली सञ्चारमाध्यमले जनाएका छन्।
पहिलो दिन रिहा भएका बन्धकमा ३१ वर्षीया इजरायली नागरिक डोरोन स्टेनब्रेचर, २४ वर्षीया रोमी गोनेन र २८ वर्षीया बेलायती–इजरायली नागरिक एमिली डमारी छन्।
यता, युद्धविराम सम्झौता अनुसार एक इजरायली बन्धकको बदलामा इजरायलले ३० प्योस्टिनीलाई रिहा गर्नुपर्ने हुन्छ। जसअन्तर्गत तीन इजरायली बन्धकको बदलामा इजरायलले ९० प्योलेस्टिनीलाई रिहा गरेको इजरायल प्रिजन सर्भिसले जनाएको छ।
४२ दिनसम्म चल्ने पहिलो चरणको सम्झौता अन्तर्गत हमासले समग्रमा ३३ बन्दी रिहा गर्नेछ। यस्तै पहिलो चरणको सम्झौता सही रूपमा कार्यान्वयन भए युद्धविराम भएको १६औं दिनमा दोस्रो र तेस्रो चरणको वार्ता हुने अन्तर्राष्ट्रिय सञ्चारमाध्यमले जनाएका छन्। अमेरिकी नवनिर्वाचित राष्ट्रपति डनल्ड ट्रम्पले तीन महिलाको रिहाइको स्वागत गरेका छन्।
अक्टोबर ७, २०२३ मा हमासले दक्षिणी इजरायलमा अप्रत्याशित रूपमा आक्रमण गर्दै २५१ जनालाई बन्धक बनाएर गाजातर्फ लगेको थियो। जसमा हमासले अझ पनि ९१ जना इजरायली बन्धकलाई आफ्नो नियन्त्रणमा राखेको बताइएको छ। त्यसमध्ये ६० जना जीवित रहेको इजरायलको विश्वास छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
