दुई वर्ष जेल बसेपछि प्रहरीसहित १२ जना निर्दोष!

इल्ताफ र निलेशविरुद्ध सम्पत्ति सुद्धिकरणले पनि चलायो मुद्दा

नारायण अधिकारी बुधबार, साउन ४, २०७९ १८:४३

काठमाडौं– साढे १५ किलो नक्कली सुन काण्डमा दुई वर्ष जेलपछि १२ जना निर्दोष ठहर भएका छन्। नक्कली सुन काण्ड र दुईवटा पेस्तोलसहित बरामद भएको घटनामा संलग्न भएको दाबी गर्दै मुद्दा चलाइएका १२ जना दुई वर्ष जेल बसेपछि निर्दोष ठहर भएका हुन्।

२०७७ साउन १३ गते सुन्धाराबाट दुई थान पेस्तोलसहित पहँेलो लेपन लगाएको साढे १५ किलो चाँदी (नक्कली सुन) र आधा किलो सक्कली सुन बरामद भएको थियो। उक्त घटनामा प्रहरी वृत्त दरबारमार्गका सादा पोशाकका दुई प्रहरी (जवान बहादुरसिंह कठायत र सादा पोशाकका प्रहरी जवान प्रशन्न श्रेष्ठ) समेतको संलग्नता रहेको भन्दै उनीहरुसमेतलाई फौजदारी मुद्दा चलाइएको थियो।

प्रहरीकै संलग्नता भएको भन्ने विषय सार्वजनिक भएपछि त्यतिबेला प्रहरीको चौतर्फी आलोचनासमेत भयो। तर, दुई वर्ष जेल बसेपछि यी दुई प्रहरीसहित १२ जना निर्दोष ठहर भएका छन्।

विजय पटेल भनिने विजयकुमार मगनलाल हर्सोडा, देवाङ पटेल, कौशल पटेल, मनिष मल्लिक, बहादुरसिंह कठायत, प्रशन श्रेष्ठ, उमेश श्रेष्ठ, श्रीनिवास उपाध्याय, विजय ताम्राकार, ऋषि ठाकुर, रुपेश बलामी एक बालिका निर्दोष ठहर भएका हुन्।

उनीहरु मध्ये श्रीनिवास उपाध्याय १ लाख, विजय ताम्राकार ७ लाख, ऋषि ठाकुर ७ लाख, रुपेश बलामी १ लाख रुपैयाँ यसअघि नै धरौटीमा रिहा भएका थिए। बाँकी ८ जनालाई पुर्पक्षका लागि थुनामा पठाइएको थियो। करिब २ वर्ष जेल बसेपछि उनीहरुलाई निर्दोष ठहर गरिएको छ।

यो घटनामा १७ जनालाई प्रतिवादी बनाउँदै चारवटा कसुरमा मुद्दा दायर गरिएको थियो। उक्त मुद्दाको गत फागुन ९ गते जिल्ला अदालत काठमाडौंका न्यायाधीश राजेन्द्र अधिकारीको इजलासले फैसला गरेको थियो। यसको पूर्णपाठ भने हालसालै सार्वजनिक भएको छ।

संगठित अपराध, हातहतियार तथा खरखजना, डाँका चोरी र अवैध सुनचाँदी चोरी पैठारी तथा चोरी निकासी गरी चार वटा मुद्दा चलाइएको थियो । जसमध्ये घटनामा प्रतिवादी बनाइएका १७ जनाविरुद्ध नै संगठित अपराधको कसुरमा मुद्दा चलाइएकोमा सबैले संगठित अपराधको कसुरबाट सफाई पाएका छन् ।

सफाई पाएका १२ जनासहित सञ्जय पटेल भनिने सञ्जय कुमार राजभाइ पटेल, राजु मुन्ना खान सदरुल अन्सारी र अलताफ अन्सारी उपनामले चिनिने इल्ताफ हुसेन अन्सारी, विकास अग्रवाल भनिने विकास कुमार चिरनिया, निलेश एल शखिया भनिने निलेश लबजीभाइ शखिया र यसे लोडाई लामाविरुद्ध संगठित अपराधको मुद्दा चलाइएको थियो।

अपराधिक समूहको स्थापना गरेर त्यसको सदस्य बनेर काम गरेको भन्दा पनि भन्सार छलेर सुनचाँदीको ओसार–पसार सञ्चार खरिद गर्ने उदेश्य देखिएको भन्दै उनीहरुलाई संगठित अपराधको कसुरबाट सफाई दिइएको छ।

प्रहरीलाई सेवामा फर्कने बाटो खुल्यो

दुईवर्ष जेल बसेर निर्दोष ठहर भएसँगै दुई प्रहरी सेवामा फर्किने भएका छन्। दुई प्रहरीसहित उनीहरुकै साथी उमेश श्रेष्ठविरुद्ध संगठितसँगै डाँका चोरी तथा हातहतियार खरखजनाको कसुरमा मुद्दा चलाइएको थियो। उनीहरुले तीन जनाले यी दुवै कसुरबाट पनि सफाई पाएका छन्।

उमेश श्रेष्ठको कोठामा बरामद भएको चाँदीमा कोही कसैको जाहेरी नपरेकाले डाँका चोरीको कसुर गरेर लुकाएर राखेको भन्न नमिल्ने भन्दै न्यायाधीश अधिकारीले फैसला गरेका छन्।

हातहतियार तथा खरखजनामा पनि यी तीनै जनाले सफाई पाएका छन्। बरामदी मुचुल्कामा उक्त पेस्तोल प्रशन्न र बहादुर सिंहसमेत बरामद गरेको र उनीहरुकै रोहबरमा बरामद भएको उल्लेख भएकाले हातहतियार तथा खरखजना ओसारपसारमा उनीहरुको संलग्नता नरहेको भन्दै सफाई दिइएको थियो। दुई प्रहरीलाई लगाइएका तीनवटै आरोपबाट सफाई पाएपछि उनीहरुलाई सेवामा फर्कने बाटो खुलेको हो।

दुई जनामात्रै दोषी, २३ महिना कैद

पक्राउ परेका १४ जनामध्ये २ जना मात्रै दोषी ठहर भएका छन्। निलेश लवजीभाई शखिया र र इल्ताफ हुसेन अन्सारीमात्रै दोषी ठहर भएका छन्। उनहिरुविरुद्ध संगठित अपराध, सुनचाँदी चोरी पैठारी, हातहतियार तथा खरखजना गरी तीनवटा कसुरमा मुद्दा चलाइएको थियो। जसमध्ये संगठित अपराधमा उनीहरुले सफाई पाएका छन्।

बाँकी दुईवटा कसुरमा भने दोषी ठहर भएका छन्। उनीहरुबाट बरामद भएको सुन चाँदीको मूल्य ५८ लाख ६५ हजार ९ सय देखिएकाले सो बराबरको बिगो असुल गर्नुपर्ने भन्दै जनही ३ महिना कैद र २९ लाख ३२ हजार ९५० रुपैयाँ जरिवाना सुनाइएको छ। सुनचाँदी पनि जफत हुने फैसलामा उल्लेख छ।

हातहतियार तथा खरखजनाको कसुरमा भने जनही १ वर्ष ८ महिना कैद र १६ हजार ५ सय जरिवानाको फैसला सुनाइएको छ। यी दुबै कसुरमा गरेर यी दुई जनालाई २३/२३ महिना कैदको फैसला गरिएको छ। उनीहरुबाट बरामद भएको बा ६ च ५५१९ नम्बरको गाडी फुलनाथ बेगमको नाममा दर्ता भएकाले उनीलाई फिर्ता गर्नुपर्ने फैसलामा उल्लेख छ।

अपराध पीडित संरक्षण ऐन २०७५ अन्तर्गत यी दुबै जनाले जनही क्षतिपूर्तिवापत १ लाख १७ हजार ९७८ रुपैयाँ पीडित राहत कोषमा जम्मा गर्नुपर्ने ठहर जिल्ला अदालत काठमाडौंले गरेको छ।

निलेश र इल्ताफविरुद्ध सम्पत्तिसुद्धिकरणमा पनि मुद्दा

जिल्ला अदालतले दोषी ठहर गरेका निलेश र इल्ताफविरुद्ध सम्पत्ति सुद्धिकरण विभागले पनि मुद्दा चलाएको छ। अवैध सुनचाँदीसहित पक्राउ परेपछि यी दुई जनाविरुद्ध सम्पत्ति सुद्धिकरणमा पनि अनुसन्धान गर्नुपर्ने भन्दै जिल्ला प्रहरी परिसर काठमाडौंले परिपत्र गरेको थियो।

त्यसपछि अनुसन्धान गरेको सम्पत्ति सुद्धिकरण विभागले यी दुईले सम्पत्ति सुद्धिकरणको कसुर गरेको निष्कर्ष निकाल्दै विशेष अदालतमा मुद्दा दायर गरेको छ। विभागका सूचना अधिकारी ऋषिराम पोखरेलका अनुसार उनीहरुविरुद्ध असार २१ गते नै विशेष अदालतमा मुद्दा दायर भएको छ।

यी दुई जनाबाट बरामद भएको अवैध सुनचाँदीको मूल्य ५८ लाख ६५ हजार ९ सय भएकाले बिगाको दोब्बर जरिवाना र कसुरको मात्रा अनुसार सजाय माग दाबी गरिएको छ। त्यसैगरी जिल्ला अदालतले फिर्ता गर्नु भनेको गाडीलाई सम्पत्ति सुद्धिकरण विभागले भने जफत गर्नुपर्ने माग राख्दै विशेष अदालतमा मुद्दा दायर गरेको छ।

योजनाकारसहित तीन जनाको मुद्दा मुल्तबीमा

यो घटनाका मुख्य योजनाकारसहित तीन जनाको मुद्दा मुल्तबीमा राखिएको छ। योजनाकार भारतीय नागरिक सञ्जय पटेल भनिने सञ्जय कुमार राजभाइ पटेल र नेपाली नागरिक काठमाडौं महानगरपालिका–१३ का विकास अग्रवाल भनिने विकास कुमार चिरनिया र यसे लोडाई लामा हालसम्म फरार छन्। जसकारण उनीहरुको मुद्दा भने मुल्तबीमा राखिएको छ।

नक्कली सुन तस्करका मुख्य योजानकार सञ्जय पटेलले सुन्धारामा प्रहरी जवान बहादुरसिंह कठायतलाई सुन र हतियार सुम्पिएर आफू चढेको गाडीसहित फरार भएको प्रहरी अनुसन्धानले देखाएको थियो।

सोही गाडीमासँगै फरार भएका राजु मुन्ना खान, सदरुल अन्सारी र अल्ताफ अन्सारी भनेर चिनिने बाराको सिमरा उपमहानगरपालिका–२४ का इलताफ हुसेन अन्सारी त्यसबेलै पक्राउ परे पनि सञ्जय पटेलबारे भने प्रहरीले अहिलेसम्म कुनै ‘क्लु’ फेला पार्न सकेको छैन।

त्यसबेलै प्रहरी अधिकारीहरुले सञ्जय भागेर भारत पुगिसकेको विश्लेषण गरेका थिए। फरार भएका तीनैजना भारतमा भएको हुनसक्ने प्रहरीले विश्लेषण गरे पनि अहिलेसम्म पक्राउ नपर्दा उनीहरुको मुद्दाको फैसला भएको छैन।