१५ किलो नक्कली सुन तस्करी प्रकरण : ९ जनालाई थुनामा पठाउन अदालतको आदेश

सुरक्षा/अपराध

नेपाल लाइभ मंगलबार, असोज २०, २०७७ १४:५३

काठमाडौं- जिल्ला अदालत काठमाडौंले सुन तस्करी र अवैध हातहतियार मुद्दामा पक्राउ परेकामध्ये ९ प्रतिवादीलाई पुर्पक्षका लागि थुनामा पठाउन आदेश गरेको छ। जिल्ला अदालतले तीन आरोपितलाई भने धरौटीमा रिहा गर्ने आदेश गरेको हो।

साढे १४ किलो नक्कली र आधा किलो सक्कली सुन तस्करी प्रकरणमा पक्राउ परेकामध्ये ९ जनालाई थुनामा पठाउने र ३ जनालाई धरौटीमा रिहा गर्ने आदेश न्यायाधीश कमलप्रसाद पोखरेलको इजलासले जारी गरेको काठमाडौं जिल्ला अदालतका स्रेस्तेदार भीन निरौलाले जानकारी दिएका हुन्।

जिल्लाले निलेश लवजी भाई शखिया, विजय पटेल भन्ने विजय कुमार मगनलाल हसोडा, बहादुरसिंह कठाडत काठमाडौं बुढानीलकण्ठका प्रशन श्रेष्ठ, सिन्धुपाल्चोक उमेश श्रेष्ठ, राजु मुन्ना खान, श्रदुल अन्सारी , हुसेन अन्सारी र कौशल पटेललाई पुर्पक्षका लागि थुनामा पठाउने आदेश गरेको छ।

जिल्ला अदालतले विजय ताम्राकारसँग ५ लाख, श्रीनिवास उपाध्यायसँग १ लाख धरौटी माग गरेको छ। मणिक मल्लिकलाई साधारण तारेखमा रिहा गर्ने आदेश जिल्ला अदालत काठमाडौंले आदेश गरेको छ। जिल्ला अदालतले फरार रहेका अभियुक्तहरुको हकमा अदालत उपस्थित हुन म्याद जारी गरेको छ। न्यायाधीश कमलप्रसाद पोखरेलको इजलाशले यस्तो आदेश जारी गरेको जिल्ला अदालत काठमाडौंका श्रेष्तेदार भिम निरौलाले बताए।

कमलादी सुन तस्करी प्रकरणमा प्रहरीले दुई ज्वलरी पसलेसहित १७ जना विरुद्ध मुद्दा दायर गरेको थियो । जिल्ला सरकारी वकिलको कार्यालय काठमाडौंले काठमाडौं जिल्ला अदालतमा असोज ११ गते पाँच अभियोगमा मुद्दा दायर गरेको थियो। उनीहरुलाई हतियार तथा खरखजना, अवैध सुन चाँदी चोरीपैठारी, चोरीनिकासी, डाँकाचोरी र संगठित अपराधमा सजाय हुनुपर्ने जिकीर अभियोगपत्रमा गरिएको थियो।

अभियोगपत्रमा ७ भारतीय नागरिकलाई समेत प्रतिवादी बनाइएको छ। प्रतिवादीहरूमा भारत गुजरातका निलेश एल शखिया भन्ने निलेश लवजी भाई शखिया, विजय पटेल भन्ने विजय कुमार मगनलाल हसोडा, भारत राजस्थानका देवांग पटेल, भारत कलकत्ताका मनिष मल्लिक, भारत राजस्थानका कौशल पटेल, भारत गुजराजको संजय पटेल भन्ने संजय कुमार राजभाई पटेल र राजस्थानका विकास अग्रवाल भन्ने विकास कुमार चिरनियालाई मुख्य अभियुक्तका रुपमा मुद्दा दायर भएको थियो ।

यस्तै, काठमाडौं कपुर्धारा बस्ने बहादुरसिंह कठायत, काठमाडौं बुढानीलकण्ठका प्रशन श्रेष्ठ, बारा जितपुरसिमरा उपमहानगरपालिको ईलताफ हुसेन अन्सारी, सिन्धुपाल्चोक उमेश श्रेष्ठ, धनुषाका श्रीनिवास उपाध्याय, काठमाडौंको विजय ताम्राकार, रसुवाकी सृष्टि डंगोल, मकवानपुरका रुपेश बलामीलाई पनि सुन तस्करीमा संलग्न भएको आरोपमा अभियोगपत्र दायर भएको थियो।

त्यस्तै अभियोगपत्रमा काठमाडौंका दुई सुन पसललाई तस्करीको सुन खरिद गरेको अभियोगमा मुद्दा दायर गरिएको थियो।

कमलपोखरीस्थित सिटी सेन्टरको पहिलो तलामा एस ज्वेलर्सका येसे लोडोई लामा र काठमाडौं न्युरोडको ग्रुप अफ लक्की ज्वेलर्स प्रालिका सञ्चालक ऋषि ठाकुरलाई मुद्दा दायर गरिएको थियो।

यस्तो थियो घटना
२०७७ साउन १३ गते बिहान ९ बजे कमलादीबाट महेन्द्र शालिकतर्फ आउने जाने सडक खण्डमा चेकजाँच गर्ने क्रममा कृष्ण पाउरोटीबाट कमलादीतर्फ तीव्र गतिमा आएका बा ६ च ५५१९ को सिल्भर रंगको स्कारपियो गाडीलाई रोक्न खोज्दा रोक्न नमानी भागेको थियो।

उक्त गाडी सुन्धाराबाट त्रिपुरेश्वर जाने सडकखण्डको नेपाल टेलिकम दूरसञ्चार कार्यालय सुन्धारा अगाडि पट्टीको सडकखण्डमा गाडी रोकी अपरिचित व्यक्ति झरी आकाशे पुलमा चढी म्याग्जिनसहितको पेस्तोल थान २, सुनजस्तो देखिने पहेलो रंगको धातु १७ थान, फुस्रो पहेलो रंगको धातु १८ थानसहितको झोला छाडेको थियो।

प्रहरीले उक्त गाडीमा चढी आएका पछि नाम खुल्न आएका निलेश एल शखियाले उक्त अवैध हतियारहरु, सुन समेतसुन्धारा स्थित आकाशे पुलमा छाडी भागेकोमा उक्त हतियार थान २, तौल ५०० ग्राम भएको सुनको ढिक्का थान९१ र १४.५ के.जी. सुनको जलप लगाएको चाँदीका ढिक्काहरु बरामद गरेको थियो।

घटनामा संलग्न भएको आरोपमा देवांग पटेल, निलेश एल शखिया, विजय पटेलसमेतका अभियुक्तहरु पक्राउ परेका थिए। उनीहरुले प्रहरीसँगको बयानमा चाँदी खरिद गर्नको लागि रकम दिएको बयान दिएका थिए।

काठमाडौंको किसि गल्लीस्थित मनिष मल्लिकले सञ्चालन गरेको पसलमा लगी मनिष मलिकले चाँदीमा सुनको जलप लगाएको उनीहरुको बयानमा खुलेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

कम्युनिस्टहरू नसुध्रिए ०८४ सालको चुनावमा जनताले बढार्छन् : झलनाथ खनाल

शुभमन गिल बने भारतको नयाँ टेस्ट कप्तान

जुम्लाका दुई पालिका पूर्ण खोप सुनिश्चितता घोषित