काठमाडौं– प्रहरीकै ‘मिलेमतो’ देखिएको साढे १५ किलो नक्कली सुन र दुई वटा पेस्तोल प्रकरणका मुख्य योजनाकार एक वर्ष बित्दा पनि पक्राउ पर्न सकेका छैनन्। महानगरीय प्रहरी वृत्त दरबारमार्गका दुई प्रहरीको मिलेमतो देखिएको उक्त घटनाका मुख्य अभियुक्त भारतीय नागरिक सञ्जय पटेललाई अहिलेसम्म प्रहरीले पक्राउ गर्न सकेको छैन।
भारतीय नागरिक सञ्जय पटेल भनिने सञ्जय कुमार राजभाइ पटेल र नेपाली नागरिक काठमाडौं महानगरपालिका–१३ का विकास अग्रवाल भनिने विकास कुमार चिरनिया हालसम्म फरार छन्।
गत वर्ष (२०७७) साउन १३ गते दरबारमार्ग वृत्तका दुई प्रहरी (जवान बहादुरसिंह कठायत र सादा पोशाकका प्रहरी जवान प्रशन्न श्रेष्ठ) सहितको मिलेमतोमा नक्कली सुन र पेस्तोल लुटिएको बहाना गरी सुन किन्न दिएको रकम पचाउने उद्देश्यले घटाइएको उक्त घटनाको वर्षदिन नाघ्दा समेत प्रहरी योजनाकारसम्म पुग्न सकेको छैन।
नक्कली सुन तस्करका मुख्य योजानकार सञ्जय पटेलले सुन्धारामा प्रहरी जवान बहादुरसिंह कठायतलाई सुन र हतियार सुम्पिएर आफू चढेको गाडीसहित फरार भएका थिए। सोही गाडीमा सँगै फरार भएका राजु मुन्ना खान, सदरुल अन्सारी र अल्ताफ अन्सारी भनेर चिनिने बाराको सिमरा उपमहानगरपालिका–२४ का इलताफ हुसेन अन्सारी त्यसबेलै पक्राउ परे पनि सञ्जय पटेलबारे भने प्रहरीले अहिलेसम्म कुनै ‘क्लु’ फेला पार्न सकेको छैन।
त्यसबेला अनुसन्धानमा खटिएको महानगरीय प्रहरी परिसर काठमाडौं र महानगरीय प्रहरी अपराध महाशाखाले सञ्जय भागेर भारत पुगिसकेको विश्लेषण गरेका थिए। प्रहरी जवान कठायतलाई सुन र हतियार सुम्पिएपछि ललितपुर नखिपोटमा स्कर्पियो राखेर फरार भएका उनी भारत छिरिसकेको प्रहरीले अनुमान गरेको थियो। पछि अनुसन्धानका क्रममा सञ्जय भारतमै रहेको पुष्टि भएको प्रहरीले दाबी गरेको थियो। तर, अहिलेसम्म उनलाई प्रहरीले पक्राउ गर्न सकेको छैन। जबकी यो घटनामा जोडिएका अन्य व्यक्ति भने पक्राउ परेर पुपक्र्षका लागि थुनामा छन्।
महानगरीय प्रहरी अपराध महाशाखाका अधिकारी पनि पटेल भारतमा हुनसक्ने बताउँछन्। ‘हामीले अनुसन्धान गर्दा त्यसबेला नै भारत पुगिसकेको देखिएको थियो। अहिले पनि उनी भारतमै रहेको भन्ने बुझिएको छ,’ महाशाखाका एक अधिकारीले भने, ‘जसकारण पटेल पक्राउ पर्न सकेका छैनन्।’
प्रहरी स्रोतका अनुसार पटेल फरार भएर भारत पुगेलगत्तै त्यसबेला उनको अवस्थामाबारे नेपाल प्रहरीले पत्ता लगाएको थियो। भारतमा रहेका पटेलले त्यतिबेला नेपाल प्रहरीकै अधिकारीसँग कुरा गर्दै घटनाको मुख्य योजनाकार आफू नरहेको दाबी समेत गरेका थिए।
पटेलजस्तै अर्का फरार अभियुक्त अग्रवाल पनि भारतमै रहेको प्रहरी निष्कर्ष छ। यी दुबै अभियुक्तको खोजी जारी रहेको महाशाखाका एसएसपी चन्द्रकुवेर खापुङ बताउँछन्।
१७ जनाविरुद्ध ४ मुद्दा
यस प्रकरणमा संलग्न भएको आरोपमा १७ जना विरुद्ध मुद्दा चलाइएको थियो। उनीहरुलाई चार वटा मुद्दा लगाइएको छ। उनीहरुमध्ये अधिकांशजसो पुपक्र्षका लागि थुनामा छन् भने केही फरार छन्। केही अभियुक्त भने समान्य तारिखमा रिहा पनि भएका छन्।
१७ प्रतिवादीहरुमा दुई प्रहरी (जवान बहादुरसिंह कठायत र सादा पोशाकका प्रहरी जवान प्रशन्न श्रेष्ठ), विजय पटेल भनिने विजय कुमार मगनलाल हर्सोडा, उमेश श्रेष्ठ, श्रृष्टि डंगोल, रुपेश बलामी, देवाँग पटेल, सञ्जय पटेल भनिने सञ्जय कुमार राजभाइ पटेल, कौशल पटेल, ऋषि ठाकुर, मनिष मल्लिक, विजय ताम्राकार, विकास अग्रवाल भनिने विकास कुमार चिरनिया, श्रीनिवास उपाध्याय, निलेश एल शखिया भनिने निलेश लबजीभाइ शखिया र यसे लोडाई लामा छन्।
उनीहरुविरुद्ध हातहतियार तथा खरखजना, अवैध सुन–चाँदी चोरी पैठारी तथा चोरी निकासी, डाँका चोरी र संगिठत अपराधको कसूरमा मुद्दा चलाइएको छ। यो मुद्दामाथि अहिलेसम्म पाँच पटक पेसी चढिसके पनि फैसला भने हुन बाँकी नै छ।
यस्तो थियो नक्कली सुन र पेस्तोल काण्ड
नक्कली सुन काण्डमा फरार रहेका मुख्य पात्र सञ्जय पटेलको योजना अनुसार चाँदीमा पहँलो जलप लगाएर सक्कली सुन भनेर बेच्ने योजना रहेको प्रहरीको अनुसन्धानबाट खुलेको थियो।
सोही योजनाअनुसार सञ्जयले यसको जिम्मा निलेश शखियालाई दिएका थिए। शखियाले काठमाडौंमै बस्ने पटेल दाजुभाई देवानसिंह र कौशललाई जलप लगाउने जिम्मा दिएका थिए। चाँदी खरिद र जलप लगाउन समेत पटेल दाजुभाइको केही रकम खर्च भएको थियो।
ठूलो मात्रामा चाँदीलाई सुन बनाएर भारत लैजाने काम अवैधानिक थियो। यसैलाई मौका बनाएर प्रहरीसँग मिलेर लुट्ने र आधा–आधा बाँड्ने योजना देवानसिंहले बनाएका खुलेको थियो।
चिनजान भएका प्रहरी जवान बहादुरसिंह कठायतलाई कौशलले योजना सुनाए। त्यसवापत १५ लाख कठायतलाई दिन कौशल तयार भए। त्यसपछि उक्त सामान लुट्ने योजना बन्यो।
घटनाको अघिल्लो दिन साउन १२ गते साँझ क्वीक रेस्पोन्स भेइकल (सिआरभी)का चालक कठायतले महानगरीय प्रहरी वृत्त दरबारमार्गका सादा पोशाकका प्रहरी जवान प्रशन्न श्रेष्ठलाई ‘ज्वेलरीको अवैध सामान आउँदै छ, पक्राउ गर्नुपर्छ’ भनेर सुनाए।
कठायतले दिएको सूचना श्रेष्ठले वृत्तका तत्कालीन प्रमुख डिएसपी रन्जन दाहाललाई सुनाए। कठायतकै सूचना अनुसार एम्बुसिङ गरेर चेकिङमा प्रहरी बस्यो। डिएसपी दाहाल आफैं फिल्डमा खटिए। डिएसपी दाहाललाई गलत लोकेशन दिइयो। सामान बोकेर गाडी आउने ठाउँमा जवान कठायत बसे। नक्कली सुन बोकेको बा ६ च ५५१९ नम्बरको स्कार्पियो कमलादीबाट घण्टाघर हुँदै बाहिरियो।
सुन्धाराको आकाशे पुल नजिक पुगेपछि गाडीमा सवार निलेशले झरेर जवान कठायतलाई सुन र पेस्तोलको झोला दिएका थिए। त्यसपछि कठायतले उनीहरुलाई भगाएका थिए। सोही गाडीमा रहेका इलताफ, सञ्जयहरु पनि फरार भए। पछि इलताफ पक्राउ परे पनि सञ्जय भने अहिलेसम्म फरार नै छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
