नक्कली सुन काण्डमा पक्राउ परेका इल्ताफ। इल्ताफको मोबाइलमा हतियार र सुन कारोबारका म्यासेज भटिएको छ।
काठमाडौं- साढे १४ किलो नक्कली र आधा सक्कली सुनसँगै पेस्तोल बरामद काण्डमा पक्राउ परेका अभियुक्त इल्ताफ हुसेन अन्सारीको माबोइलमा सुन र हतियार कारोबारका महत्वपूर्ण प्रमाण प्रहरीले फेला पारेको छ। ६० दिन लामो अनुसन्धान सकेर सरकारी वकिलमार्फत काठमाडौं जिल्ला अदालतमा दायर भएको अभियोगपत्रमा अन्सारीको मोबाइलमा हतियार र सुनको अवैध कारोबारको प्रमाण फेला परेको उल्लेख छ।
राजु, मुन्ना खान, सदरूल अन्सारी र अल्ताफ अन्सारी जस्ता उपनामले समेत चिनिने इल्ताफको मोबाइल प्रहरीले जाँचका लागि फरेन्सिक ल्याबमा पठाएको थियो। फरेन्सिक ल्याबले महानगरीय प्रहरी परिसर काठमाडौंलाई दिएको रिपोर्टमा सुनको अवैध कारोबार र हतियार कारोबारको पुष्टि गर्ने फोटा, म्यासेज आदानप्रदान भएको देखाएको छ।
‘मोबाइल परीक्षण भई प्राप्त भएको रिपोर्टमा रहेको डिभिडीमा बरामद भएको पेस्तोलको फोटो तथा विभिन्न मितिमा खिचेको सुनको फोटोहरू रहेका छन्। र, सुन, पेस्तोल खरिद बिक्रीसम्बन्धी कुराकानीसमेत भएको देखिन्छ,’ अभियोगपत्रमा उल्लेख छ।
महानगरीय प्रहरी परिसर काठमाडौंको अनुसन्धान टोलीले नक्कली सुन र हतियार काण्डमा संलग्न रही फरार भएका भारतीय नागरिक संजय पटेलको नेपाल एजेन्ट इल्ताफ भएको निष्कर्ष निकालेको छ।
परिसरले तयार पारेको अनुसन्धान प्रतिवेदनमा उल्लेख छ, ‘भारतीय नागरिक संजय पटेलको आदेश र निर्देशनमा नेपालमा अवैध सुनचाँदी र अवैध हातहतियारको चोरीपैठारी र चोरीनिकासीलगायतको काम इल्ताफले गर्दै आएका छन्।’
संजयकै निर्देशनमा इल्ताफले जयस सोलंकीलाई दुई किलो सुन किनेर दिएका थिए। त्यसको १५-२० दिनपछि फेरि ५ किलो सुन किनिएको थियो।अनुसन्धानकै क्रममा लकडाउनकै समयमा इल्ताफको वीरगञ्जस्थित घरमा पटेलसमेत गएर बसेको खुलेको छ। काठमाडौंबाट भारत फर्कने क्रममा संजयसहित निलेश शखिया इल्ताफको घर पुगेका थिए।
इल्ताफले बयानमा भनेका छन्, ‘संजय पटेलले मलाई फोन गरी हामी वीरगञ्जमा छौं। लिन आउनु होला भनेका थिए। म पैदल हिँड्दै वीरगञ्ज बजारसम्म गई संजय पटेल समेतलाई भेटी मेरो घरमा लिई गएको हुँ।’
निलेश र संजयले इल्ताफको घरमा एक रात बसेर भारत प्रवेश गरेका थिए। जसकारण पनि उनीहरुले लामो समयदेखि संगठित रुपमा हतियार र सुनको अवैध कारोबार रहेको देखाएको प्रहरीको निष्कर्ष छ।
अर्का प्रतिवादी निलेश शखियाले समेत इल्ताफको घरमा बस्ने गरेको कुरा स्वीकार गरेका छन्। ‘संजय पटेलले नेपालमा सुन खरिद गरी जयस सोलंकी मार्फत नेपालबाट भारतमा पठाउने गरेका थिए। नेपाल र भारत आवत–जावत गर्ने क्रममा इल्ताफ हुसेन अन्सारीको घरमा बस्ने र निजसँगै काठमाडौं आउने गरेका थियौं,’ निलेशको बयानमा उल्लेख छ।
कारोबारीको हुलिया नोटको अंक
अवैध हतियार र सुनको कोरोबार भने फिल्मीशैलीमा हुने गरेको अनुसन्धानले देखाएको छ। नक्कली सुन र हतियार कोरोबार गर्दा नेपाली नोटको अंकलाई हुलिया बनाएको पाइएको हो। अवैध नक्कली सुन र हतियार कारोबारमा पक्राउ परेका देवाँग पटेलको मोबाइलमा प्रहरीले नेपाली ५ रुपैयाँ नोटका एकतर्फको भागमात्रै भएको फोटाहरु फेला पारेको थियो।
जुन फोटाहरु भने तस्करहरुले हुलिया बनाएका थिए। ती फोटाहरु संजय पटेलले देवाँगलाई पठाएको अनुसन्धानबाट खुलेको छ। ‘संजय पटेलले नेपाली रू ५ दरका नोटको एकातर्फको भागको फोटो मेरो मोबाइलमा पठाएका थिए। उक्त नोटको नम्बर भएको नोटको आधा भाग लिएर आउने व्यक्तिलाई सामान दिनु भनी उक्त नोटको फोटोहरू पठाएका हुन्,’ देवाँगले बयानमा भनेका छन्।
आफ्नो मोबाइलमा आएको नोटसँग अंक मिल्ने नोटको आधा भाग लिएर आउने व्यक्तिलाई देवाँगले सामान दिने गरेको अनुसन्धानबाट खुलेको हो। यसरी लामो समयदेखि उनीहरूले सुनको अवैध कारोबार गरेको प्रहरीले जनाएको छ।
देवाँगकै मोबाइलमा ६ थान सुनका ढिक्काका फोटासमेत पाइएको थियो। ती फोटा निलेश शखियाले नेपाल आउनुभन्दा १५/२० अघि इल्ताफलाई सुन दिएपछि आफूले खिचेको देवाँगको भनाइ छ। 'उक्त ६ थान टुक्रा आधा आधा किलो सुन हो। जुन प्रहरीले बरामद गरेको थियो। फोटो खिचेको हुँ। उक्त ६ थान सुन जम्मा ५०० ग्राम हो। उक्त सुन मैले संजय पटेललाई दिएको हुँ,' उनले बयानमा भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
