प्रधानमन्त्री एवं नेपाली कांग्रेसका सभापति शेरबहादुर देउवा शुक्रबार भक्तपुरको सूर्यविनायक नगरपालिका कटुन्जेमा कांग्रेसको वडा अधिवेशन उद्घाटन गर्दै । तस्वीर: रोशन सापकोटा/ रासस
काठमाडौं- लामो समयको अन्योल पश्चात् अन्ततः नेपाली कांग्रेस १४ औं महाधिवेशनमा प्रवेश गरेको छ। ६ पटकसम्म सर्दै आएको महाधिवेशन कार्यतालिका यसपटक भने कार्यान्वयनको चरणमा पुगेको हो। शुक्रबारदेखि सुरु भएको वडा अधिवेशनसँगै कांग्रेस महाधिवेशमा होमिएको छ। यद्यपी, देशभरका सबै वडामा भने अधिवेशन शुक्रबार सुरु भएको छैन।
निर्वाचन समितिलाई प्राप्त विवरण अनुसार ५६ जिल्ला मध्ये अधिकांशमा आज वडा अधिवेशन भएको छ। २१ जिल्लाका क्रियाशील सदस्यता सार्वजनिक हुन सकेको छैन। क्रियाशील सदस्यता प्रकाशित नहुँदा ति जिल्लामा अधिवेशनको टुंगो छैन। गाउँ/नगरपालिका तहको संरचनामा भदौ २७ गते अधिवेशन हुने भएकाले त्यस अघि वडा अधिवेशन गर्नै पर्ने वाध्यता कांग्रेसलाई छ।
वडा तहको अधिवेशन सुरु भएपछि अब महाधिवेशन हुनेमा नेता/कार्यकर्ता ढुक्क देखिएका छन्। त्यसो त, केही दिन अघि उपसभापति विमलेन्द्र निधिले महाधिवेशन केन्द्रीत सम्पर्क कार्यालय खोलेपछि महाधिवेशन हुनेमा आशा पलाएको थियो।
निधिले सम्पर्क कार्यालय सञ्चालन गरेको ३ दिनपछि महामन्त्रीमा गगन थापाले उम्मेदवारी दिने घोषणा गरे। गगनको उम्मेदवारी घोषणासँगै महाधिवेशन हुनेमा धेरै ढुक्क देखिए।
उम्मेद्वारीको औपचारिक घोषणा गर्दै महाधिवेशन हुने कुरामा आश्वस्त बनाउने कार्य गरेको थापा स्वीकार्छन्। ‘यदि मेरो उम्मेद्वारी घोषणाले थप विश्वस्त बनायो भने त्यो मेरा लागि पनि सुखद् कुरा हो’ थापाले नेपाल लाइभसँग भने।
वडा तहको अधिवेशन सुरु भएपछि नेता तथा कार्यकर्तामा उत्साह थपिएको छ। महाधिवेशन हुने दिशामा पार्टी प्रवेश गरेसँगै शीर्ष तहका नेताहरुले शुभकामना सन्देश प्रवाह गरेका छन्।
महाधिवेशन गराउन आलटाल गर्दै आएको आरोप लाग्दै आएका सभापति शेरबहादुर देउवाले भिडिओ सन्देश मार्फत त्यसलाई चिर्ने प्रयास गरे। उनी भन्छन्, ‘पार्टीका साथीहरूले हरेक गाउँको मुद्दासँग आफूलाई गाँस्दै, हरेक टोलको भावनाको नेतृत्व गर्दै, ती सबै मुद्दा र भावना सम्बोधन गर्न बलियो कांग्रेस जरुरी रहेको सन्देश हरेक घर–घरमा पुर्याउनु हुनेछ।’ वडा तहको अधिवेशन शुभारम्भ गर्न देउवा शुक्रबार भक्तपुर पुगेका थिए।
सभापतिमा देउवा निर्वाचित भएपछि उनको सर्वाधिक आलोचना गर्नेमा वरिष्ठ नेता रामचन्द्र पौडेल पर्छन्। सभापति देउवाले विधि र पद्धति सभापतिले लत्याएको भन्दै आफ्नो समूहबाट उनले निरन्तर प्रतिवाद गर्दै आएका थिए/छन्। समयमा महाधिवेशन नगर्नुको मुख्य जिम्मेवार सभापति देउवा भएको आरोप पौडेलले लगाउँदै आएका छन्।
महाधिवेशन हुनेनै अवस्थामा पुगेपछि वरिष्ठ नेता पौडेलले कार्यकर्तालाई भने, ‘सबल नेतृत्वका लागि सानातिना कुरा बिर्सेर आफ्नो आत्माको पुकार सुन्नहोस्।’
सभापति देउवालाई उछिन्दै एक दिन अघि (बिहीबार) नै उनले भिडिओ सन्देश सार्वजनिक गरेका थिए।
ढिलै भएपनि १४ औं महाधिवेशन हुन लागेकोप्रति उनले खुसी व्यक्त गरे। वरिष्ठ नेता पौडेलले भिडियो सन्देशमा भनेका छन्, ‘हाम्रो पार्टीलाई एउटा सबल नेतृत्व र लोकतन्त्रप्रतिको निष्ठावान नेतृत्वको आवश्यक छ।’ पौडेलले ‘सबल र निष्ठावान नेतृत्व’ भन्दै त्यसका लागि आफू सक्षम रहेको सन्देश दिन खोजेका छन्। देउवाको निष्ठा र सबलताको पक्षमा उनले कयौं पटक प्रश्न उठाएका छन्।
संस्थापन पक्षबाटै सभापतिको उम्मेदवारी दिने घोषणा गरेका उपसभापति निधिले अन्य नेताको भन्दा व्यवस्थित सम्पर्क कार्यालय सञ्चालनमा ल्याएका छन्।
संस्थापन पक्षका नेताहरुसँगै तुलनात्मक रुपमा उनलाई सहयोग कम प्राप्त छ। १४ औं महाधिवेशनले कांग्रेसलाई ताजा बनाउने निधिको विश्वास छ। ‘वैचारिक रुपमा प्रष्टता र वैचारिक रुपमा प्रतिवद्धता भयोे भने जनताले हामीलाई भरोसा गर्नेछन्’ निधि भन्छन्।
आसन्न महाधिवेशनमा सभापतिको प्रत्यासी बन्ने दौडमा रहेका महामन्त्री डा शशांक कोइराला वडा अधिवेशनले पार्टीको गति निर्धारण गर्ने बताउँछन्।
‘महाधिवेशनले कांग्रेसको आगामी गति र परिचालनले मुलुकको भाग्य र भविष्य कोर्नुपर्नेछ। लोकतान्त्रिक व्यवस्थाको औचित्य र गरिमालाई उच्च राख्नु पर्नेछ।’ महाधिवेशन प्रक्रिया सुरु भएपछि कोइरालाको प्रतिक्रिया छ।
सभापति बन्ने लाइनमा रहेका अर्का नेता प्रकाशमान सिंह महाधिवेशनलाई उत्सवका रुप लिन्छन्। ‘महाधिवेशन कांग्रेसका लागि एउटा उत्सव हो। महाधिवेशनले कांग्रेस बलियो बन्दा लोकतन्त्र बलियो हुन्छ,’ उनले भने, ‘कांग्रेसलाई बलियो बनाउने नेतृत्व वडाले जन्माउनु पर्छ।’
महाधिवेशनले पार्टी भित्र ताजा अक्सिजनको सञ्चार हुन्छ हुने बताउँदै दललाई चलायमान बनाउने बताउँछन् नेता डा शेखर कोइराला। महाधिवेशनलाई उत्सवको रुपमा अथ्र्याउँदै कोइरालाले ‘गुट र गिरोह’ समाप्त गर्न महाधिवेशन सफल विश्वास लिए।
कांग्रेसको महाधिवेशन सर्दै आएकोप्रति असन्तुष्ट कोइरालाले भने, ‘महाधिवेशन विधान र संविधान भन्दा बाहिर गएर हुने परिस्थिति भविष्यमा आउन नदिने जिम्मेवारी अब हामी सवैको हो, कांग्रेसजनको हो।’ वडा पार्टी संरचना आधारभूत तह मात्रै नभएको नेता गगन थापा बताउँछन्। वडा तहको अधिवेशनले कांग्रेसलाई कुन बाटो हिँडाउने र कस्तो नेतृत्व दिने प्रवेशविन्दु भएको उनले बताए।
गाउँ/नगर वडा अधिवेशन शुक्रबारदेखि सुरु भएपछि केन्द्रीय नेताहरु जिल्लामा पुगेका छन्। आफू पक्षीय क्षेत्रीय प्रतिनिधिको माहोल बनाउन तथा अधिवेशन सम्पन्न गर्न उनीहरु जिल्ला पुगेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
