काठमाडौं- वडा अधिवेशनको पूर्वसन्ध्यामा कांग्रेस वरिष्ठ नेता रामचन्द्र पौडेल पक्षले आफ्नो समूहमा खटपट नरहेको दाबी गरेको छ। बिहीबार पौडेल पक्षले आफ्नो समूह एकढिक्का रहेको सन्देश प्रवाह गर्ने प्रयास गरेको हो।
सभापतिमा एकल उम्मेदवार चयन गर्न नसकेको उक्त समूहले आफूहरुबीच एकत्व कायम रहेको जनाएको छ। शुक्रबारबाट सुरु हुने वडा अधिवेशनलाई मध्यनजर गर्दै पौडेल पक्षका नेताहरु एउटै मञ्चमा देखिएका हुन्।
तीन तहका नेताहरु एकत्रित भएर सभापतिमा आफ्नो समूहबाट एक जनाको उम्मेदवारी पर्ने दाबी गरिएको छ। दर्जनौं बैठक बस्दा व्यक्तिका नाममा सहमति हुन नसकेपछि पत्रकार सम्मेलन गरि आफूहरुबीच एकता कायमै रहेको देखाउने प्रयास गरिएको थियो।
पौडेल पक्षमा मूलतः सभापतिमा चार जनाको दाबी छ। वरिष्ठ नेता पौडेल, महामन्त्री डा शशांक कोइराला, नेताहरु प्रकाशमान सिंह र डा शेखर कोइरालाले उम्मेदवारीबाट पछि हट्ने संकेत देखाएका छैनन्। एकले अर्कोलाई छोड्न तयार नभएका कारण पत्रकार सम्मेलन गर्नुपर्ने अवस्था आएको थियो।
१३औं महाधिवेशनमा सभापतिमा पराजित पौडेल यसपटक सोही पदका लागि स्वभाविक दाबीकर्ता हुन्। उनी पक्षीय नेताहरुलाई उनले मनाउन सकेका छैनन्। एकपटकका लागि सहयोग गर्न उनले पटकौं आग्रह गर्दा समेत अन्य नेताले उनलाई अघि सार्न तयार भएका छैनन्। सभापतिमा आफ्नो परीक्षण नभएकाले साथ दिन पौडेलको अन्य नेतासँग आग्रह छ।
कांग्रेस संस्थापक नेता बीपी कोइरालाका पुत्र डा शशांक कोइराला बाबुको विरासतमा सभापति हुने लाइनमा छन्। महामन्त्रीमा एक कार्यकाल सकाएका उनले सभापतिमा आफ्नो उम्मेदवारी स्वभाविक रहेको बताउँदै आएका छन्। संस्थापन पक्षका सभापतिका उम्मेदवार शेरबहादुर देउवालाई हराउन सक्ने सक्षम प्रत्यासी आफू मात्रै हुने कोइरालाको जिकिर छ।
पार्टीको तल्लो तहदेखि आफ्नो हैसियत बढाउँदै गएका अर्का नेता प्रकाशमान सिंह पनि पछि हट्ने पक्षमा छैनन्। सभापतिमा आफ्नो उम्मेदवारी प्राकृतिक रहेको उनको दाबी छ। जिल्ला सभापति, केन्द्रीय सदस्य, महामन्त्री हुँदै उपसभापतिको जिम्मेवारी उनले निर्वाह गरिसकेका छन्। विगतमा लामो समय देउवालाई साथ दिएका सिंह १२औं महाधिवेशनमा कोइराला क्याम्पमा आएका थिए।
उनको नेतालाई सधैं प्रश्न हुने गर्छ, ‘सभापतिमा उम्मेदवार हुन मेरो के योग्यता पुगेन? काठमाडौंको भएकै कारण सभापतिमा म लड्न नपाउने हो?’ आफ्नो विगतको पृष्ठभूमि अघि सारेर सभापतिको दाबी गरेका उनी १४औं महाधिवेशनमा उक्त पदको दाबीबाट पछि नहट्ने बताउँदै आएका छन्।
गत महाधिवेशनमा शशांकलाई महामन्त्री पद छोड्नुलाई ‘पश्चाताप’ मान्दै आएका अर्का नेता शेखर अरुलाई सभापतिको उम्मेदवार स्वीकार्ने पक्षमा छैनन्। केन्द्रीय सदस्यबाट पदाधिकारीमा सिँढि नचढेर उनी सभापतिको दाबी गरिरहेका छन्। गत महाधिवेशनपश्चात् सर्वाधिक जिल्ला पुगेका शेखर कार्यकर्तालाई भेट्ने नेतामा अग्रपंक्तिमा छन्। कार्यकर्ताको बल पाएका शेखर यसैपटक हरसम्भव सभापति बन्ने लाइनमा छन्। कार्यकर्ताका लागि अन्य नेताले भन्दा उनले नयाँ अजेण्डा पनि अघि सारेका छन्। सभापति एकपटक मात्रै बन्ने, सभापति बनेपछि प्रधानमन्त्री नबन्ने र १५औं महाधिवेशनमा नयाँ पुस्तालाई नेतृत्व हस्तान्तरण गर्ने उनको प्रतिवद्धता छ।
चार नेतामा सहमति हुन नसके सभापतिमा अन्य नेताले पनि उम्मेदवारी दिने बताएका छन्। सोही समूहबाट अर्जुननरसिंह केसी, रामशरण महत र सुजाता कोइराला पनि सभापतिको दाबी गर्दै आएका छन्।
घण्टौंका छलफलले परिणाम नदिएपछि नेताहरु बिहीबार एकत्रित भएर ‘हामी एक ठाउँ छौं’ भन्ने प्रतिवद्धता जनाएका छन्। आजको कार्यक्रमपश्चात् सभापतिमा एकमात्रै उम्मेदवार आउन सक्ने आकलन अहिले नै गर्न सकिने अवस्था देखिएको छैन। कार्यकर्तामा रहेको आशंका निवारणका लागि पौडेलले भने, ‘हामीबीच खटपट नगरी एक भई अघि बढ्छौं। हामीहरुले सभापतिमा एउटा उम्मेदवारी दिन्छौं।’
वडा तहको अधिवेशन अघि सभापतिको एक उम्मेदवार अघि सार्ने भन्दै आएको पौडेल पक्षको आजको कार्यक्रमबाट आश्वस्त बनिहाल्न सकिने अवस्था भने छैन। आजसम्म हुन नसकेको सहमति केही दिनमा कसरी हुनसक्छ? भनी गरिएको प्रश्नमा नेता अर्जुननरसिंह केसीले भने, ‘हामीहरुको आजको उपस्थितिलाई पनि सहमतिका रुपमा बुझ्नुपर्दछ।’
१५औं महाधिवेशनमा सभापतिको प्रत्यासी हुने सम्भावना नदेखेका शीर्ष तहका नेताहरु आफूबाहेक अर्कोलाई स्वीकार्ने पक्षमा छैनन्। आजको कार्यक्रममा महामन्त्रीको उम्मेदवारी घोषणा गरेका गगन थापा पनि सहभागी थिए। थापाको उपस्थितिले उनी पौडेल पक्षकै कुनै सभापतिको प्रत्यासीको प्यानलबाट महामन्त्री बन्ने सन्देश गएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
