काठमाडौं- नेपाली कांग्रेसका उपसभापति विमलेन्द्र निधिले ‘शक्ति प्रर्दशन’ सहित सम्पर्क कार्यालय खोलेका छन्। १४ औं महाधिवेशन केन्द्रीत कार्यालय सुरु गर्दा निधिले एकप्रकारको ‘तामझाम’नै गरेका छन्।
संस्थापन पक्षबाट नै सभापतिको दाबी गरेका निधिले सम्पर्क कार्यालय सञ्चालन गरेपछि मंसिरमा महाधिवेशन हुने आकलन पनि गरिएको छ। आफू निकटका नेता, कार्यकर्ता जम्मा गरे निधिले सम्पर्क कार्यालय सञ्चालनमा ल्याएका हुन्।
निधिले शुक्रबारदेखि सञ्चालनमा ल्याएको कार्यालय अन्य नेताहरुको कार्यालय भन्दा भिन्न छ। पार्टी प्यालेसलाई नै निधिले सम्पर्क कार्यालय बनाएका छन्।
थापागाउँस्थित बानेश्वर व्याङ्क्वेटमा कार्यालय आरम्भ गरिएको छ। फराकिलो कार्यकक्ष भएको उक्त स्थानमा सचिवालयसहित सातै प्रदेशका छुट्टा छुट्टै डेस्क राखिएको छ। प्रदेश अनुसार सात प्रदेशका नेता कार्यकर्तालाई छुट्टा छुट्टै भेट्न मिल्ने गरि डेस्क सञ्चालन गरिएको छ।
सम्पर्क कार्यालयमा हेल्थ डेस्क पनि राखिएको छ। सम्पर्क कार्यालयमा नितान्त नयाँ प्रयोगको रुपमा हेल्थ डेस्क राखिएको हो। कांग्रेस संस्थापक नेता महेन्द्रनारायण निधिको नाममा रहेको महेन्द्रनारायण निधि मेमोरियल अस्पतालले हेल्थ डेस्कमा सहयोग पुर्याएको छ। महेन्द्र नारायण उनका पिता हुन्।
सम्पर्क कार्यालयमा पुरुषोत्तम दाहाल, रामजी दाहाल लगायतले निधिलाई सहयोग पुर्याउने भएका छन्। निधि संयोजक रहेको नीति, अनुसन्धान तथा प्रशिक्षण प्रतिष्ठानको निर्देशकमा पुरुषोत्तम दाहाल छन्। सञ्चार संयोजकका रुपमा निधिलाई रामजी दाहालले विगतदेखि नै सहयोग गर्दै आएका छन्।
तामझामसहित सम्पर्क कार्यालय आरम्भ गर्दा संस्थापन पक्षका नेताहरु अति न्यून देखिए। संस्थापन पक्षबाट केन्द्रीय सदस्यमा लक्ष्मी परियार र महेन्द्र यादव मात्रै देखिएका थिए।
शुक्रबारको कार्यक्रम हेर्दा निधिलाई संस्थापन समूहका केन्द्रीय नेताबाट सहयोग हुने आकलन गर्न नसकिने देखिएको छ। वरिष्ठ नेता पौडेल पक्षमा रहेका केन्द्रीय सदस्य चन्द्र भण्डारी निधिलाई शुभेच्छा व्यक्त गर्न आइपुगेका थिए।
मधेसबाट कांग्रेसको लामो राजनीति गर्दै आएका निधिले सभापतिको दाबी गर्दै कार्यालय सञ्चालन गरेका हुन्। पार्टीको सर्वोच्च पदमा उनको दाबी हुँदा स्वभाविक रुपमा उक्त क्षेत्रका कार्यकर्तामा उत्साह हुन्छ। परिणामतः प्रदेश २ का कार्यकर्ताको बाक्लो उपस्थिति कार्यक्रममा थियो।
प्रदेश २ का दुई जना जिल्ला सभापति उनलाई शुभेच्छा व्यक्त गर्न आइपुगेका थिए। निधिको गृह जिल्ला धनुषाका सभापति महेशशंकर गिरी र पर्साका सभापति अजय द्विवेदी सम्पर्क कार्यालय उद्घाटनका क्रममा आइपुगेका थिए। संस्थापनइतरमा रहेका डडेल्धुराका सभापति कर्णबहादुर मल्लले पनि निधिको उम्मेदवारीलाई स्वागत गरे।
सभापतिको निर्वाचनको तयारीमा रहेका निधिले विभिन्न मन्दिरका पुजारीबाट शुभाशिष् लिएर सम्पर्क कार्यालय सुरु गरेका छन्। कार्यालय खोल्ने क्रममा निधिले पशुपतिनाथ, जानकी, दक्षिणकाली, बंगलामुखी, डोल्लेश्वर लगायत विभिन्न मन्दिरका पुजारी तथा पण्डितहरूबाट शुभाशिष् लिएका थिए।
पार्टी भित्रको धार्मिक मत बटुल्ने प्रयासका रुपमा पनि उनले मठ मन्दिरका पुजारीहरुलाई निम्त्याएको विश्लेषण गरिएको छ। धार्मिक स्वतन्त्रता कांग्रेसको सिद्धान्त रहेको उनले सम्बोधनका क्रममा बताए। ‘हिन्दू धर्मअनुसार पूजा गरेर मैले सम्पर्क कार्यालय सुरू गरें। धर्मका बारेमा धेरै बहस गर्नु जरुरी नै छैन। संविधानले आफ्नो धर्म मान्न कसैलाई रोकेको छैन’ निधिले भने।
सभापतिको उम्मेदवारीबाट पछि नहट्ने दृढता निधिले व्यक्त गरे। आगामी निर्वाचनमा तीनै तहमा नेपाली कांग्रेसलाई पहिलो पार्टी बनाउन आफू सभापतिको उम्मेदवार बन्न लागेको निधिको भनाइ थियो।
‘मेरो सम्पूर्ण ध्यान नेपाली कांग्रेसको सभापति हुने कुराको लागि हो। मेरो उद्देश्य आगामी आम चुनावमा नेपाली कांग्रेसको रुख छापलाई देशभरमा बहुमत प्राप्त गराउनका लागि हो,’ निधिले भने, ‘म कसैलाई पराजित गर्न, कसैलाई असक्षम घोषित गर्न, कसैलाई रिटायर्ड गर्नको लागि सभापतिको उम्मेदवार हुन खोजेको होइन।’
निधिले संविधान बनाएको स्वामित्व कांग्रेसले लिन नसकेको बताए।
उनले भने, ‘सभापति बनेपछि जनता र मतदाताको वीचमा गएर संघीय लोकतान्त्रिक गणतन्त्र ल्याएको कांग्रेसले हो भन्न चाहन्छु।’ निधिले पूर्व प्रधानमन्त्री केपी शर्मा ओलीको सरकार संघीयता र गणतन्त्र पक्षधर नभएको सन्देश जनता र कांग्रेस कार्यकर्ताबीच पुर्याउने बताए।
क्रियाशील सदस्यतामा युवा उमेर समूह उल्लेख्य रहेको बताउँदै निधिले युवा पुस्तालाई मिलाएर अघि बढ्ने बताए। उनले भने, ‘देश विकासको नेतृत्व युवापुस्ताले गर्न सकोस्। त्यसको लागि म सहजकर्ताको भूमिका निर्वाह गर्न म सभापतिको उम्मेदवारी दिन लागेको छु।’
संस्थापनइतर रहेका नेता चन्द्र भण्डारीले सबै पक्षलाई समेटेर अघि बढ्न निधिलाई सुझाव दिए। गुट र उपगुटबाट बाहिर निस्कने नेतृत्व चाहेको उनले बताए। निधितर्फ हेर्दै भण्डारीले भने ‘विमल दाइ, हामी सबैलाई मिलाएर अघि बढ्नुपर्छ। यसपटकलाई शीर्ष नेताहरुलाई नेता मान्नेछौं। १५ औं महाधिवेशनमा सबैलाई बिदा गरेर नयाँ नेतृत्व बनाउने छौं।’ शीर्ष तहका नेताको दायित्व आफू उठ्छु भन्ने मात्रै नभई सबैलाई साथमा लिएर अघि बढ्छु भन्ने हुनुपर्ने उनको सुझाव थियो।
पत्रकार महासंघका पूर्व सभापति होमनाथ दाहालले आफ्नो पत्रकारिता कालमा सबैभन्दा बढी लेखेको नाम निधिको भएको स्मरण गरे। २०३६ सालमा नेविसंघको नेतृत्व देउवाले निधिलाई सुम्पेको बताउँदै फेरि त्यही परिस्थिति आएको बताए। तत्कालीन समयमा नेविसंघको नेतृत्व सुम्पेका देउवाले पार्टी नेतृत्व निधिलाई हस्तान्तरण गर्नुपर्ने उनको तर्क थियो।
देउवालाई निरन्तर सहयोग गर्दै आएका निधिलाई १४ महाधिवेशनमा सभापतिले साथ दिनुपर्ने तर्क डडेल्धुराका जिल्ला सभापति कर्ण मल्लको थियो।
सभापतिमा देउवालाई जिताउन १० औं महाधिवेशनमा बिजुलीबजारमा सम्पर्क कार्यालय सञ्चालन गरेदेखि हालसम्म निधिले सहयोग गरिरहेको स्मरण गरे। सभापति बनाउन विगत २१ वर्षदेखि निधिले गरेको त्याग देउवाले सम्झनुपर्ने मल्लको धारणा थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770562345.jpg)
-1764146706.png)
