काठमाडौं- एमालेका माधवकुमार नेपाल पक्षले बुधबारदेखि सुरु गरेको राष्ट्रिय कार्यकर्ता भेलामा १० वटा टिम बनाएर छलफल गरियो। बुधबारै नेता नेपालले प्रस्तुत गरेको अवधारणा पत्र र विभिन्न सात बुँदामा केन्द्रित रहेर गरिएको छलफलपछि टिम नेताले निष्कर्ष प्रस्तुत गरे।
बुधबार सम्बोधन गरेका माधवकुमार नेपालले बिहीबार भेला सकिनुअघि पनि सम्बोधन गरेका थिए। आफ्ना दुवै सम्बोधनमा उनले प्रधानमन्त्री तथा एमाले अध्यक्ष केपी शर्मा ओलीको चर्को आलोचना गरे। उनले ओलीले व्यक्तिवादी चरित्र देखाएको, कम्युनिस्ट आन्दोलनलाई क्षति पुर्या्एको, उनी सुध्रिने सम्भावना नरहेको लगायतका धारणा व्यक्त गरे।
नेपालले बिहीबारको सम्बोधनमा आफूहरू ओलीले गर्ने कारबाहीको लागि तयार रहेको बताए। साथै, कारबाहीबाट नडराउन कार्यकर्तालाई भरोसा पनि दिए।
केके भने नेपालले?
नेपालले अहिले पार्टीमा देखिएको विवादमा नेताहरू मात्रै मिलेर कार्यकर्ता मिल्ने अवस्था नरहेको बताएका छन्। उनले तल्ला तहसम्मै विभाजनको स्थिति रहेको बताएका हुन्। 'नेताहरू मात्रै मिलेर मिल्ने सम्भावना छैन। केपी ओली पक्षले कार्यकर्ता तहमा समेत कूप्रचार गरेको छ', उनले भने।
नेपालले ओली पक्षको कूप्रचार रोकिने सम्भावना नरहेको बरु बढ्ने बताए। 'गलत समाचार सम्प्रेषण गरी उनीहरू भ्रम सिर्जना गरिरहेका छन्', उनले भने।
नेपालले ओली सच्चिने लक्षण नभएको बताए। ओलीले बोलाएको संसदीय दलको बैठकमा आफू पक्षका नेताहरू पनि सहभागी भएको सन्दर्भ उल्लेख गर्दै उनले समयमा सूचना प्रवाह नहुँदा त्यस्तो हुन गएको बताए।
'केही साथी संसदीय दलको बैठकमा पुग्नु भएछ। त्यहाँ पुग्नेले आत्मसम्मान महसुस गर्न सक्नु भएनछ। ओली सच्चिने लक्षण छैन', नेपालले भने, 'संसदीय दलको बैठकमा जाने/ नजाने कुरा भए। अन्तिममा नजाने निर्णय भयो। केहीलाई मेसेज पुगेर पनि हेर्न नपाउँदै बालुवाटार पुग्नु भएको रहेछ।'
नेपालले आफ्नो पक्षले पार्टी २०७५ जेठ २ को अवस्थामा फर्कनुपर्ने र फागुन २८ को निर्णय फिर्ता हुनुपर्ने बटमलाइन प्रस्तुत गरे। उनले फागुन २८ गते ओलीले आफू पक्षका केन्द्रीय कमिटी सदस्यहरूको भेला गरी थप गरिएका केन्द्रीय सदस्य र फेरिएका इन्चार्ज मान्न तयार नभएको उनले स्पष्ट पारे।
नेपालले ओलीले गर्ने कारबाहीका लागि तयार रहेको बताए। 'ओलीले कारबाही गर्न माथिबाट सुरु गर्न सक्छन्। उनको कारबाहीको लागि टाउको अचानो बन्न तयार छ। कम्युनिष्ट आन्दोलनबाट त हटाउन सक्दैनन् नि। मैदान छोडेर भगिन्न। ओलीलाई धुलो चटाएर छोड्छौं', नेपालले भने।
नेपालले आवश्यक परे आफूहरू पद त्याग्न तयार रहेको बताए। नेपालले जबजको जगमा केपी ओलीको प्रतिवाद गर्नुपर्ने बताए। उनले ओली प्रवृत्तिको भण्डाफोर गर्नुपर्ने उल्लेख गरे। 'नवौं महाधिवेशनमै भनेको हो- ओलीबाट पार्टी चल्दैन', नेपालले भने, 'ओली कम्युनिस्ट र लोकतन्त्रवादी होइनन् भनेर वामदेव गौतमले त्यही बेला भन्नुभएको थियो।'
नेपालले आफूहरू कुर्सीको पछि नलाग्ने स्पष्ट पारे। उनले आफूहरू ओलीसँग नतर्सिने पनि बताए।
नेपालले बालुवाटारमा बैठक बस्ने शैलीको विरोध गरे। नेकपाकालमा पनि आफू बालुवाटारमा बस्ने बैठकमा मन फुकाएर नगएको बताए। 'बालुवाटार पार्टी कार्यालय बनाउनु भयो। प्रचण्ड लुरुलुरु जानु हुन्थ्यो। म नजाऔँ भन्थे। नगए फेरि आरोप आउँथ्यो। तर, मन फुकाएर म कहिले पनि बालुवाटार गइनँ।'
नेपालले सहभागी कार्यकर्तालाई ओलीको शब्दजालमा नफस्न कार्यकर्तालाई आग्रह गरे। 'स्थानीय तहका जनप्रतिनिधिलाई उनले हटाउन सक्दैनन्। दल त्याग गरेर अर्को दलमा मात्रै हट्ने हो', उनले भने, 'हटाए पनि हामीमाथि हुनेलाई हो। जस्तो कारबाही गरे पनि भोग्न तयार छौं। हामीले पनि कानुनी उपचार बुझेका छौं। हामीलाई पनि हटाउन सजिलो छैन।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
