काठमाडौं- राष्ट्रिय स्वतन्त्र पार्टी (रास्वपा) ले पार्टीका विभिन्न तहका अधिवेशन, आन्तरिक निर्वाचन तथा सार्वजनिक निर्वाचनका लागि उम्मेदवार छनोट प्रक्रियालाई व्यवस्थित, पारदर्शी र मर्यादित बनाउन कडा निर्देशन जारी गरेको छ।
पार्टीको केन्द्रीय निर्वाचन आयोगले निर्वाचन तथा उम्मेदवार छनोट प्रक्रियामा सहभागी पार्टी सदस्य, पदाधिकारी, नेतृत्वका आकांक्षी तथा उम्मेदवारका लागि अपिल तथा निर्देशन जारी गर्दै विधि र प्रक्रियाविपरीतका गतिविधि नगर्न सचेत गराएको हो।
आयोगले निर्वाचन, अधिवेशन तथा उम्मेदवार छनोटसम्बन्धी सम्पूर्ण गतिविधि पार्टी विधान, स्वीकृत कार्यविधि र आधिकारिक निर्देशनअनुसार मात्रै सञ्चालन गर्न आग्रह गरेको छ। कुनै पनि तहमा अनधिकृत वा समानान्तर प्रक्रिया सञ्चालन गर्न नपाइने निर्देशनमा उल्लेख छ।
निर्देशनअनुसार व्यक्तिगत पहुँच, आर्थिक प्रभाव, नातावाद, गुटगत दबाब, धम्की वा अन्य अनुचित प्रभाव प्रयोग गरी निर्वाचन प्रक्रिया प्रभावित पार्न पाइने छैन। सबै योग्य सदस्य तथा नेतृत्वका आकांक्षीलाई समान अवसर सुनिश्चित गर्नुपर्ने आयोगले जनाएको छ।
स्थानीय तहको निर्वाचनका लागि उम्मेदवार छनोट प्रक्रियामा उम्मेदवारका रूपमा प्रस्तुत हुनु वा सामाजिक सञ्जाल तथा अन्य माध्यमबाट उम्मेदवारी घोषणा र प्रचारप्रसार गर्नु मात्रै उम्मेदवारीको अन्तिम सुनिश्चितता नहुने आयोगले स्पष्ट पारेको छ। नेतृत्व विकास कार्यक्रम, योग्यता परीक्षण, मूल्यांकन, प्राथमिक निर्वाचनलगायत तोकिएका प्रक्रिया पूरा भएपछि मात्रै पार्टीले अन्तिम उम्मेदवारको निर्णय गर्ने निर्देशनमा उल्लेख छ।
त्यस्तै, अधिवेशन हुन बाँकी रहेका वडा, पालिका, जिल्ला तथा प्रदेश तहका पार्टी संरचनाले अधिवेशनको तयारी र प्रक्रिया अघि बढाउँदा सम्बन्धित माथिल्लो तहका पार्टी नेतृत्व तथा विभागसँग आवश्यक परामर्श र समन्वय गर्नुपर्नेछ। अधिवेशनको आधिकारिक मिति र कार्यतालिका घोषणा नभएसम्म नेतृत्वका लागि उम्मेदवारी घोषणा वा प्रचारप्रसार गर्न नपाइने व्यवस्था गरिएको छ।
आयोगले निर्वाचन आचारसंहिता उल्लंघन गर्नेविरुद्ध कारबाहीको व्यवस्था पनि गरेको छ। आर्थिक लेनदेन, उपहार, भोजभतेर, धम्की, भ्रामक प्रचार, चरित्रहत्या वा पद र शक्तिको दुरुपयोग गरी निर्वाचन प्रभावित पार्ने कार्य निषेध गरिएको छ।
आचारसंहिता उल्लंघनको प्रकृति र गम्भीरताका आधारमा उम्मेदवारी खारेज, प्रक्रियाबाट निष्कासन, जिम्मेवारीबाट हटाउनेदेखि विधानबमोजिम निलम्बन वा पार्टी सदस्यता समाप्तिसम्मको कारबाही हुन सक्ने आयोगले चेतावनी दिएको छ।
त्यसैगरी, निर्वाचन, अधिवेशन, उम्मेदवार छनोट तथा संगठनात्मक प्रक्रियासँग सम्बन्धित आन्तरिक दस्तावेज, निर्णय, छलफल, पत्राचार, अभिलेख तथा व्यक्तिगत विवरणको गोपनीयता कायम राख्न निर्देशन दिइएको छ। आधिकारिक स्वीकृतिबिना त्यस्ता सूचना सार्वजनिक गर्ने वा अनधिकृत व्यक्तिसँग साझा गर्ने कार्य निषेध गरिएको छ।
पार्टीभित्रको लोकतन्त्र, संस्थागत मर्यादा र निष्पक्ष प्रतिस्पर्धा कायम राख्न सबै सदस्य तथा आकांक्षी उम्मेदवारलाई निर्देशन पूर्ण रूपमा पालना गर्न केन्द्रीय निर्वाचन आयोगले आग्रह गरेको छ।
निर्देशनमा आयोगका प्रमुख भुवन केसीले हस्ताक्षर गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
