इन्डोनेसियामा ३ वटा चर्चमा आत्मघाती बम विस्फोट, ९ जनाको मृत्यु, ४० घाइते

समाचार

नेपाल लाइभ आइतबार, वैशाख ३०, २०७५ ०७:४१

जाकार्ता– इन्डोनेसियाको दोस्रो ठूलो शहर सुराबायामा रहेका ३ वटा चर्चमा आत्मघाती बम विस्फोट गराइएको छ। केही समयको अन्तरमा गराइएको आत्मघाती विस्फोटका कारण ९ जनाको मृत्यु हुनुका साथै ४० जना घाइते भएका छन्।

स्थानीय टेलिभिजनहरुमा विस्फोटका कारण चर्चमा पुगेको क्षतिका दृश्यहरु देखाइएको थियो। हालसम्म कुनै पनि समूहले घटनाको जिम्मेवारी नलिएको प्रहरीले जनाएको छ। मुस्लिम बाहुल्य मुलुक इन्डोनेसियामा पछिल्ला केही महिनादेखि इस्लामिक आतंकवादी गतिविधिहरु बढ्दै गएको बताइन्छ।

स्थानीय समयानुसार आज बिहान करिब ७ः३० बजेको समयमा बम विस्फोट भएको प्रहरीले जनाएको छ। हमलाकारीले चौथो चर्चमा पनि आत्मघाती हमला गर्न खोजेको तर त्यसलाई भने असफल बनाइएको प्रहरीले दावी गरेको छ।

इन्डोनेसियाको गुप्तचर विभागले हमला इस्लामिक स्टेटबाट प्रभावित समूह जीमाह अन्सुरत दौलाहले गराएको हुनसक्ने आशंका गरेको छ।

इन्डोनेसियामा ९० प्रतिशतभन्दा बढी मुस्लिम समुदायको बसोबास छ। यसका अलावा केही प्रतिशत इसाई, हिन्दु तथा बौद्ध धर्मावलम्बीहरु पनि त्यहाँ बस्ने गर्दछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

विपक्षीसँग सत्तापक्षको विश्वास- बजेट पारित गर्नु संवैधानिक दायित्व हो, सहयोग गर्नुहुन्छ

यस्ता छन् बजेटमा स्वास्थ्यका विषय

माओवादीले जेठ २१ गतेदेखि मध्यपहाडी अभियान सञ्चालन गर्ने