पेरिस– अमेरिकी राष्ट्रपति डोनाल्ड ट्रम्पले हालै पेरिसका बारेमा गरेको एक टिप्पणीप्रति फ्रान्सले विरोध जनाएको छ।
अमेरिकी राष्ट्रपति ट्रम्पले गत शुक्रबार टेक्सासमा आयोजित एक सभालाई सम्बोधन गर्दै ‘नागरिकलाई बन्दुक राख्न दिएको भए सन् २०१५ मा पेरिसमा भएको बन्दुक हमला हुन सक्दैनथ्यो’ भनी टिप्पणी गरेका थिए।
उनले यदि फ्रान्सेली नागरिकसँग पनि बन्दुक राख्न पाउने अधिकार भइदिएको भए पेरिसमा भएको आतंककारी हमलाबाट त्यति धेरै क्षति नहुने आसयको भनाइ राखेका थिए।
राष्ट्रपति ट्रम्पले राखेको उक्त धारणा फ्रान्सेली शान्तिप्रेमी जनताको पक्षमा नदेखिएको फ्रान्सको विदेश मन्त्रालयले जनाएको हो। ट्रम्पको उक्त दावीको खण्डन गर्दै फ्रान्सेली विदेश मन्त्रालयले पीडितहरूको सम्झनाको सम्मान गर्न पनि भनेको छ। शुक्रबार टेक्सासमा आयोजना गरिएको ‘राइफल एसोसियसन’को सभालाई सम्बोधन गर्ने क्रममा ट्रम्पले सो धारणा राखेका थिए।
उक्त सम्बोधनका क्रममा राष्ट्रपति ट्रम्पले पेरिसका हमलाकारीहरुले एक–एक जनालाई छानेर गोली हानेको र पीडितहरु कसैले पनि आफ्नो सुरक्षा गर्न असमर्थ रहेको बताएका थिए।
उनले गरेको बन्दुकप्रतिको यो टिप्पणीले यहाँका नागरिकलाई न्याय नगरेको विदेश मन्त्रालयलको भनाइ छ। त्यसो त ट्रम्पले गर्ने गरेका बन्दुकसम्बन्धी टिप्पणीको अमेरिकाभित्रै पनि विरोध हुने गरेको छ।
अमेरिकामा पनि समय–समयमा बन्दुक नियन्त्रणका लागि तथा बन्दुक राख्न पाउने कानूनमा कडाइ गर्न माग गर्दै जुलुश निकाल्ने गरिएको छ।
उक्त सभामा उनले भने,‘तपाईंहरुले पनि ख्याल गर्नुभयो होला नि, निकै थोरैको संख्यामा रहेका आतंकारीहरुको समूहले पेरिसमा १ सय ३० जनाको हत्या गरेका थिए। उनीहरुले समय लिएरै र निहत्था नागरिकलाई नियन्त्रणमा लिइ हत्या गरेका थिए।’
‘म यो कुरामा निश्चित छु कि पेरिसका नागरिकसँग पनि बन्दुक भइदिएको भए यति धेरै संख्यामा त्यहाँ नागरिकको ज्यान जाने नै थिएन।’, राष्ट्रपति ट्रम्पले दावी गरे। रासस÷एएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
