न्युयोर्क– संयुक्त राष्ट्रसंघका महासचिव एन्टेनियो गुथ्रेसले मध्यअफ्रिकी गणतन्त्रका विभिन्न धार्मिक स्थल (चर्च तथा मस्जीद)लाई लक्षित गरी भएका आक्रमणप्रति चासो व्यक्त गर्दै बिहीबार सम्वद्ध सबैलाई शान्त रहन आग्रह गरेका छन्।
राष्ट्रसंघ प्रमुखले मङ्गलबार विभिन्न स्थानमा भएका आक्रमणमा कम्तिमा २४ जनाको मृत्यु भएको तथा १ सय ७० जना घाइते भएको खबरले आफू स्तब्ध बनेको बताउँदै सम्बद्ध सबैसँग हिंसा रोकी मुलुकको शान्ति र स्थायित्वका लागि समन्वय गर्न आग्रह गरेका गुथ्रेसका सहप्रवक्ता फारहन हकद्वारा जारी गरिएको विज्ञप्तिमा भनिएको छ।
विज्ञप्तिमा भनिएको छ, ‘महासचिव गुथ्रेसले सम्वद्ध पक्षलाई शान्त रहन आग्रह गर्दै मध्य अफ्रिकाका अधिकारीलाई पटक–पटक भएका यस्ता आक्रमणमा सम्लग्न व्यक्ति तथा समूहलाई कानूनी दायरामा ल्याउन अविलम्ब आवश्यक अनुसन्धान थाल्न आग्रह गर्नुभएको छ।’
मङ्गलबार स्थानीय लडाकू समूहका केही व्यक्तिले सडक अवरुद्ध गरी चर्चको प्रार्थनाको मध्यतिर धर्मगुरु तथा धर्मावलम्बीलाई अन्धाधुन्ध आक्रमण गरेपछि हिंसाले जटिल रूप लिएको थियो।
चर्चको आक्रमणको बदला लिने उद्देश्यले अर्को समूहले मस्जीदमा आगो लगाएको र मुश्लिम धर्ममा विश्वास गर्ने भनिएका २ जनाको हत्या गरिएको थियो।
विश्वमै केही अस्थिर मुलुकमध्ये एक मानिने मध्य अफ्रिकामा भएको उक्त घटनाले कतै फेरि उक्त मुलुकलाई पृथकतावादी द्वन्द्वतर्फ धकेल्ने त होइन भन्ने खतरा उब्जाएको छ। रासस/एएएफपी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
