काठमाडौं- बजार अनुगमनका क्रममा गुणस्तर परीक्षणका लागि भन्दै नमुनाका रूपमा व्यवसायीबाट लिएका बहुमूल्य धातुका गहना गायब पार्ने वाणिज्य, आपूर्ति, तथा उपभोक्ता संरक्षण विभागका तीन कर्मचारीरुद्ध मुद्दा दायर भएको छ। आइतबार अख्तियार दुरुपयोग अनुसन्धान आयोगले गुणस्तर परीक्षणका लागि लिएका सुनचाँदीका गहना तथा हिरा, हिराजवाहरात जस्ता बहुमुल्य धातु गायब पार्ने विभागका तत्कालीन ३ कर्मचारीविरुद्ध विशेष अदालतमा मुद्दा दायर गरेको हो।
विभागका तत्कालीन निर्देशकहरु लक्ष्मण श्रेष्ठ र हरिनारायण बेल्बासे तथा नायब सुब्बा रामबहादुर थापा मगरविरुद्ध विशेष अदालत काठमाडौंमा मुद्दा दायर गरेको हो। यी तीनजनाले विभागबाट विभिन्न समयमा भएका अनुगमनका क्रममा व्यापारीबाट नमुना परीक्षणका लागि भन्दै लिएको ४९ दशमलव ५२ ग्राम सुन र ७७ दशमलव ४२ ग्राम चाँदीका गहना गायब बनाएको देखिएको अख्तियारले दायर गरेको आरोपपत्रमा उल्लेख छ।
विभागका कर्मचारीले काठमाडौं उपत्यकालगायत देशका विभिन्न स्थानमा रहेका गरगहना पसलबाट अनुगमनको क्रममा नमुनाको रुपमा संकलन गरिएका सुनचाँदीका गहना तथा सामानको यथार्थ विवरण नराखी गायब बनाएको विषय नेपाल लाइभले पहिलोपटक खुलासा गरेको थियो। यो विषयमा नेपाल लाइभले श्रृङ्खलाबद्ध रुपमा समाचार प्रकाशित गरेपछि अख्तियार दुरुपयोग अनुसन्धान आयोगले अध्ययन थालेको थियो।
अख्तियारले विशेष अदालतमा आइतबार दायर गरेको आरोपपत्रअनुसार विभागका तत्कालीन निर्देशक लक्ष्मण श्रेष्ठले २०७३ माघ ७ गते न्युरोडको नोज पिन हाउस र २०७३ चैत ३० गते पोखराका विभिन्न सुनचाँदी पसलबाट लिएको नमुना सुन गायब बनाएको देखिएको छ। ‘२०७३ चैत ३० गते दल बहादुर एन्ड सुनचाँदी पसल, दि युनाइटेड ज्वेलर्स प्रालि, गोरखा एन्ड बराह ज्वेलरी इण्डस्ट्रिज प्रालि, फेवा सन्तोष सुनचाँदी दोकान र अर्जुन पुम्दी भुम्दी सुनचाँदी पसल, पोखरामा अनुगमन गरी संकलन गरिएका गहनाहरुका सम्बन्धमा जिल्ला प्रशासन कार्यालय, कास्कीबाट उल्लिखित पसलका गहना जफत हुने ठहर्छ भन्ने फैसला हुँदासमेत उक्त सरकारी सम्पत्ति सम्बन्धित कार्यालयमा फिर्ता नगरी सरुवा भएपश्चात पनि उक्त गहनाहरु नबुझाई आफ्नो साथमा राखी हिनामिना गरेको देखिन्छ,’ आरोपपत्रमा भनिएको छ।
तत्कालीन निर्देशक लक्ष्मण श्रेष्ठभन्दा अघि विभागको बजार अनुगमन शाखा प्रमुखको रुपमा काम गरेका तत्कालीन निर्देशक हरि नारायण बेल्वासेले सूर्यबहादुर एन्ड सन्स ज्वेलर्स, ओटु काठमाडौंमा अनुगमन गरी संकलन गरिएका गहना गायब बनाएको देखिएको छ। ‘काठमाडौं जिल्ला अदालतबाट अभियोग दाबी नपुग्ने गरी फैसला हुँदासमेत उक्त सरकारी सम्पत्ति आफू सरुवा भई गएपश्चात् पनि उक्त पसलमा फिर्ता नगरी आफैंले राखी हिनामिना गरेको’ अख्तियारले बेल्बासेविरुद्ध दायर गरेको आरोपपत्रमा उल्लेख छ।
त्यस्तै, विभागकै तत्कालीन नायब सुब्बा (हाल सेवा निवृत्त) रामबहादुर थापा मगरले विशालबजारको ओम ज्वेलर्स र नटराज ज्वेलर्स, न्युरोडका सम्बृद्धि ज्वेलर्स, श्री गणेशाय ज्वेलर्स र ब्लू हर्ष ज्वेलर्स प्रालि मा तत्कालीन निर्देशक लक्ष्मण श्रेष्ठको नेतृत्वमा अनुगमन गरी संकलन गरिएका नमुना गरगहना गायब बनाएको देखिएको छ। ‘स्टोरकिपरको रुपमा आफूले जिम्मा बुझेका गहनाहरु सम्बन्धित पसलमा फिर्ता नगरी सेवा निबृत्त हुँदासम्म आफ्नो साथमा राखी उक्त सुनचाँदीका गहनाहरु हिनामिना गरेको देखिएको’ आरोपपत्रमा उल्लेख छ।
यी तीनै जनाविरुद्ध भ्रष्टाचार निवारण ऐन, २०५९ को दफा १७ बमोजिमको कसुरमा हिनामिना गरेको सुनका गहनाहरु १४ दशमलव १८ ग्रामको बिगो ६६ हजार २ सय ९३ रुपैयाँ ८६ पैसा, २० दशमलव ५९ ग्रामको बिगो ८९ हजार १ सय ४५ रुपैयाँ र १४ दशमलव ७५ ग्राम सुन र चाँदीका गहना ७७ दशमलव ४२ ग्रामको बिगो ७५ हजार ०३५ रुपैयाँ कायम गरी मुद्दा दायर गरिएको छ।
थप समाचार
वाणिज्य विभागमा पूर्वकर्मचारीको फोन- अनुगमनबाट गायब बनाएको सुन मसँग छ, लिन आउनू
सुनचाँदी बजारमा ६ वर्षदेखि छैन अनुगमन, व्यापारीको चलखेल
गायब पारिएको सुनका विषयमा तीन निकायका तीनथरी कुरा, बजार अनुगमन रोक्न सुनचाँदी व्यवसायीले ‘प्रोपागान्डा’ रचे
सुनमा चाँदी मिसाउने व्यवसायी नै अनुगमन रोक्न 'लविङ'मा, जर्तीका नाममा १० प्रतिशसम्म ठगी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
