काठमाडौं– नेपाल प्रिमियर लिग (एनपीएल) सिजन २ को उद्घाटन खेलमा काठमाण्डू गोर्खाजले डिफेन्डिङ च्याम्पियन जनकपुर बोल्ट्सविरुद्ध पाँच विकेटको शानदार जीत निकालेको छ ।
जनकपुरले दिएको १३१ रनको लक्ष्य काठमाण्डूले १८ ओभरमा १२ बल बाँकी छँदै पूरा गर्दै पहिलो जीत निकाल्दै विजय यात्रा सुरु गरेको हो ।
काठमाण्डूका लागि बेन चार्ल्सवर्थले सर्वाधिक ४६ रनको योगदान दिए । २३ बलमा उनले पाँच चौका र ३ छक्का प्रहार गरे । यस्तै आकाश त्रिपाठीले ३९ रन बनाए । मिलिन्द कुमारले १९ रन बनाउँदा जोन सिम्प्सनले १३ तथा आदिल आलमले ४ बलमा एक छक्कासहित अविजित ८ रन बनाउँदै जीत दिलाए ।
बलिङमा जनकपुरका लागि किशोर महतो, अनिल साह, ललित राजवंशी, जोन निकोल लफ्टी इटन र सञ्जय कृष्णमूर्तिले एक/एक विकेट निकाले ।
त्यसअघि पहिले ब्याटिङ गरेको जनकपुरले निर्धारित २० ओभरमा ६ विकेट गुमाउँदै १३० रन मात्र बनाउन सकेको थियो । जनकपुरका लागि कप्तान आशिफ शेखले अर्धशतक बनाउँदै सर्वाधिक ५४ रन जोडेका थिए । ४१ बलमा उनले ६ चौका र एक छक्का प्रहार गरे । यस्तै मयान यादवले २९ बलमा २ चौका र एक छक्कासहित ३४ रन बनाउँदा लाहिरु समरकोनले २२ रन बनाए । अनिल साह शून्य रनमा आउट भए ।
बलिङमा काठमाण्डूका लागि मिलिन्द कुमारले सर्वाधिक ३ विकेट लिँदा करण केसी, शाहब आलम र सन्तोष यादवले एक/एक विकेट लिए । जनकपुर पहिलो सिजनको उपाधि विजेता हो भने काठमाण्डू पहिलो सिजनको पाँचौं टिम हो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
