काठमाडौं- वाणिज्य आपूर्ति तथा उपभोक्ता संरक्षण विभागका कर्मचारीले बजार अनुगमनका क्रममा नमुना परीक्षणका लागि लिएको सुन गायब प्रकरणमा विभागले विस्तृत अध्ययन नै नगरी मन्त्रालय र अख्तियारलाई प्रतिवेदन बुझाएको छ।
विभागका निर्देशक भगवानलाल श्रेष्ठको संयोजकत्वमा गठित ४ सदस्यीय छानबिन समितिले तयार पारेको प्रतिवेदन गत बिहीबार उद्योग, वाणिज्य तथा आपूर्ति मन्त्रालयलाई बुझाएको थियो। मन्त्रालय उच्च श्रोतका अनुसार उक्त प्रतिवेदन मन्त्रालयबाट अख्तियार दुरुपयोग अनुसन्धान आयोगमा पठाइएको छ। कर्मचारीले सुन लुकाएका विषयमा अहिले अख्तियारलेसमेत अध्ययन गरिरहेको छ।
विभागले आन्तरिक अध्ययन गरिरहेकै अवस्थामा सुनचाँदी व्यवसायीहरूले पनि उनीहरूले फिर्ता पाउनुपर्ने सुनको विवरण सार्वजनिक गरेका थिए। तर विभागले तयार पारेको प्रतिवेदन र व्यवसायीहरुले तयार पारेको विवरण एक आपसमा नमिल्ने देखिएपनि विभागले अधुरो प्रतिवेदन नै मन्त्रालयलाई बुझाएको विभाग श्रोत बताउँछ।
‘सुन गायब पार्न संलग्न भनिएका कर्मचारीलाई समितिले बयानका लागि बोलाए पनि ती कर्मचारीलाई कारबाही गर्ने-नगर्ने भन्ने विषयमा भने प्रतिवेदनमा केही खुलाइएको छैन। त्यस्तै प्रतिवेदन तयार पार्दा विभागका पूर्व महानिर्देशकहरूसँग कुनै सोधपुछ भए-नभएको बारे पनि प्रतिवेदनमा उल्लेख छैन,’ श्रोतको भनाइ छ।
विभागले पछिल्लो ६ वर्षयता विभिन्न समयमा सुनचाँदी बजारमा गरिएको अनुगमन सम्बन्धी केही फाइलहरू कार्यालय सार्ने क्रममा हराएको बताउँदै आएको छ। विभागका कर्मचारी र पूर्वकर्मचारीले अनुगमन सम्बन्धी फाइल मात्र नभई सुनसमेत गायब पारेको भेटिएपछि भने विभाग छानबिन समिति गठन गर्न बाध्य भएको थियो।
साबिकको आपूर्ति व्यवस्थापन तथा उपभोक्ता हित संरक्षण विभाग र वाणिज्य विभाग गाभिएपछि आपूर्ति विभागको कार्यालय भद्रकालीबाट बबरमहल सर्दा अनुगमनसँग सम्बन्धित कागजातहरु हराएको व्यहोरा अध्ययन प्रतिवेदनमा पनि खुलाइएको छ।
तर यसको जिम्मेवारी कसले लिने र कागजात गायब बनाउन को जिम्मेवार छन भन्ने कुरा प्रतिवेदन उल्लेख गरिएको छैन। कर्मचारीले केही अनुगमन मुचुल्कासमेत तयार नपारेको तर नमुनाका रुपमा सुनचाँदी गरगहना संकलन गरेर ल्याएको विषयमा पनि प्रतिवेदनमा केहि खुलाइएको छैन।
गत असोज २९ गते गठन गरिएको अध्ययन समितिलाई प्रतिवेदन तयार पार्न २ महिनाको समय तोकिएको थियो। तर महानिर्देशक नेत्र प्रसाद सुवेदीले हतार–हतारकै अवस्थामा अपुष्ट विवरणहरु संकलन गरेर प्रतिवेदन भन्दै मन्त्रालयलाई बुझाएका हुन्।
महानिर्देशक सुवेदीले भने सुन गायब प्रकरण र विभागबाट गठित अध्ययन प्रतिवेदनका सम्बन्धमा प्रतिक्रिया दिनसमेत इन्कार गरेका छन। बुधबार दिउँसो विभागमै गएर नेपाल लाइभले महानिर्देशक सुवेदीलाई यो विषयमा प्रश्न गर्दा उनले आफूसँग समय नभएको भन्दै पन्छिए। बुधबार साँझ सोही विषयमा फोनमार्फत जानकारी लिन खोज्दा विभागका प्रवक्तालाई सोध्न भने।
नेपाललाइभले प्रवक्ता नोखबहादुर बस्याललाई अध्ययन समितिले तयार पारेको प्रतिवेदनका विषयमा प्रश्न राख्दा बस्यालले आफूलाई कुनै जानकारी नभएको बताए। ‘प्रतिवेदन तयार पारेर मन्त्रालय पठाएको भन्ने सम्म सुनेको छु, यस विषयमा मलाई थप कुनै जानकारी छैन,' बस्यालले भने। प्रवक्ताले आफूलाई कुनै जानकारी नभएको बताएपछि सुवेदीले पनि प्रवक्ताले ‘जे भन्यो त्यही लेख्न’ र बाँकी आफू बोल्न नचाहेको बताए।
‘वाणिज्यदूत बन्ने पर्खाइमा महानिर्देशक : काम पनि नगर्ने, विवाद पनि नझेल्ने’
विभागको महानिर्देशकका रुपमा योगेन्द्र गौचन छँदै सुन गायब बनाएको विषयमा अध्ययन गर्न समिति गठन गरिएको थियो। तर समिति गठन भएको केही दिनमै गौचनले अनिवार्य अवकास पाए। उनको अवकास पछि सुवेदी महानिर्देशकको जिम्मेवारीमा आए।
यसअघि भरतपुर महानगरपालिकाको प्रमुख प्रशासकीय अधिकृतका रुपमा रहेका सुवेदी आफू कुनै देशका लागि वाणिज्य दुत बन्ने र त्यसका लागि वाणिज्य क्षेत्रमा केही समय काम गरेको अनुभव चाहिने भएका कारण विभागमा आएको कर्मचारीसँग बताउने गरेका छन्।
‘महानिर्देशकको प्राथमिकता ६ महिना विभागमा कार्य अनुभव लिनु मात्रै हो। खासै केही काम पनि नगर्ने र विवादमा पनि नतानिने सोच उनले राखेका कारण यो प्रकरणबाट पनि पन्छिन खोजेको हुनुपर्छ,’ विभागका एक कर्मचारीले भने।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
