काठमाडौं- वाणिज्य, आपूर्ति तथा उपभोक्ता संरक्षण विभागका कर्मचारीले विभिन्न समयमा गरेका बजार अनुगमनका क्रममा नमूना परीक्षणका लागि भन्दै संकलन गरिएका सुनचाँदीका तयारी गहना नै गायब पारेको खुलासा भएको छ।
विभागको नेतृत्वमा गएको अनुगमन टोलीले विभिन्न स्थानका २५ सुनचाँदी पसलबाट नमूना परीक्षणका लागि भन्दै सुनचाँदीका तयारी गहना औंठी, तिलहरी, लकेटदेखि मंगलसूत्रसम्म गायब पारेको पाइएको हो। यसअघि नै विभागका कर्मचारीले सुन गायब पारेको विषय बाहिरिएको थियो। तर कति संख्या र परिमाणमा नमूना गरगहना गायब पारिएको भन्ने विषय सार्वजनिक भएको थिएन।
व्यापारीको सुन गायब बनाउन वाणिज्य विभाग मात्र नभई जिल्ला प्रशासन कार्यालय बर्दियाका कर्मचारीको पनि संलग्नता देखिएको छ। नेपाल सुनचाँदी व्यवसायी महासंघले नेपाल लाइभलाई उपलब्ध गराएको विवरणअनुसार काठमाडौं, कास्की, बर्दिया र तनहुँका २५ सुनचाँदी पसलबाट नमूनाका रुपमा संकलन भएका सुनचाँदीका गरगहना फिर्ता भएका छैनन्। २०७३ सालदेखि २०७६ सालसम्मको विभिन्न समयावधिमा भएको अनुगमनका क्रममा विभागले नमूनाका रूपमा लिएको उक्त सुन फिर्ता नभएको महासंघले जनाएको छ।
यो सुनचाँदी व्यवसायी महासंघसँग आबद्ध सुनचाँदी व्यवसायीको फिर्ता हुन बाँकी गरगहनाको मात्र तथ्यांक हो। रत्न आभूषण महासंघसँग सम्बन्धित सुनचाँदी व्यवसायीको फिर्ता हुन बाँकी गरगहनाको विवरण भने यसमा समावेश गरिएको छैन।
अधिकांश सुनचाँदी पसलबाट औंठी, लकेटलगायत गरगहना नमूनाका रूपमा संकलन भएको देखिन्छ। महासंघले नेपाल लाइभलाई उपलब्ध गराएको गायब सुनसम्बन्धी विवरणअनुसार २०७५ साल चैत महिनामा काठमाडौंका विभिन्न स्थानमा भएको अनुगमनका क्रममा संकलित सुनचाँदीका गरगरहना फिर्ता भएका छैनन्।
काठमाडौंको शाक्य ज्वेलर्स, इन्द्रचोक, न्यू कुमारी ज्वेलर्स एन्ड ह्यान्डिक्राफट, भेडासिं, शुभश्री ज्वेलर्स, कालीमाटी, श्रीसूर्य बहादुर शाक्य एन्ड सन्स, वटु, आरबी. डाईमन्ड,प्युखा र आरके ज्वेलर्स विशालबजारले गहना फिर्ता पाएका छैनन्। त्यस्तै, तनहुँका २ वटा सुनचाँदी पसलले आफ्ना गहना फिर्ता पाएका छैनन्। तनहुँको सीता सुनचाँदी पसलबाट क्वाइन औंठी र प्रेम सुनचाँदी पसलबाट गितरा औंठी नमूनाका रुपमा लिइएको र फिर्ता नभएको सुनचाँदी व्यवसायी महासंघले जनाएको छ।
त्यसैगरी, २०७३ साल चैतमा कास्कीका ५ वटा सुनचाँदी पसलमा भएको अनुगमनका क्रममा लिइएका नमूना पनि वाणिज्य विभागबाट फिर्ता भएको देखिँदैन। काँस्कीको गोरखा एन्ड बराह ज्वेलरी इन्डस्ट्रिज प्रालिबाट लकेट, दल बहादुर एन्ड सन्स सुनचाँदी पसलबाट क्वाइन औंठी, अर्जुन पुम्दी-भुम्दी सुनचाँदी पसलबाट फेन्सी औंठी, फेवाताल सन्तोष सुनचाँदी दोकानबाट १ जोर टप, र दी युनाइटेड गोल्डमार्टबाट डाइस फेन्सी औंठी नमूनाका रुपमा लिइएको थियो। २०७३ साल चैतमा भएको अनुगमनका आधारमा २०७४ माघमा जिल्ला प्रहरी कास्कीले व्यवसायीहरूलाई पक्राउ गरेको भएपनि उनीहरूको सामान भने फिर्ता नभएको महासंघले जनाएको छ।
२०७५ साल असार १६ गते जिल्ला प्रशासन कार्यालय बर्दियाको टोलीले बर्दियाका विभिन्न स्थानका गरेको बजार अनुगमनका क्रममा लिईएको १० वटा पसलको गरगहना फिर्ता भएको देखिदैन। वाणिज्य विभागबाट मात्र नभई जिल्ला प्रशासन कार्यालयबाट भएको अनुगमनका क्रममा लिइएको नमूनासमेत व्यापारीले फिर्ता पाएका छैनन्।
बर्दिया गुलरियाको न्यु स्याङ्जा गुलरिया पसलबाट एउटा बेरुवा बाली र तिलहरी, गण्डकी सुनचाँदी पसलबाट मंगलसूत्र र सोली, न्यू फुलराम ज्वेलर्सबाट औंठी, लुम्बिनी सुनचादी पसलबाट तिलहरी, दंगाली सुनचाँदी पसलबाट जुली, सीता सुनचाँदी पसलबाट मुन्द्रा, गण्डकी सुनचाँदी पसलबाट तिलहरी, पोखरा सुनचाँदी पसलबाट मंगलसुत्र विभागका कर्मचारीले लगेका थिए। स्याङ्जा सुनचाँदी पसलबाट चन्द्रमा र पर्वत मनिषा सुनचाँदी पसलबाट तिलहरी अनुगमन टोलीले नमूनाका रुपमा लिएको थियो।
यसैबीच, वाणिज्य आपूर्ति तथा उपभोक्ता संरक्षण विभागले व्यापारीको सुन विभागबाट फिर्ता नभएको विषयमा अध्ययन गर्न गठन गरिएको समितिले यसै साताभित्रै अध्ययन प्रतिवेदन विभागलाई बुझाउने जनाएको छ। ‘गहना फिर्ता नभएको विषयमा अध्ययन गर्न गठित समितिले आफ्नो अध्ययन अन्तिम चरणमा पुर्याएको छ। यही हप्ताभित्रै प्रतिवेदन तयार हुन्छ,’ विभागका महानिर्देशक नेत्रप्रसाद सुवेदीले भने। विभागले गत असोज अन्तिम साता विभागका निर्देशक भगवान श्रेष्ठको संयोजकत्वमा ४ सदस्यीय अध्ययन समिति गठन गरेको थियो। अध्ययन समितिले बजार अनुगमनका क्रममा खटिएका कर्मचारीलाई विभागमा बोलाएर सोधपुछ गरेको जनाएको छ।
यस्तो छ सूची
सम्बन्धित समाचार
वाणिज्य विभागमा पूर्वकर्मचारीको फोन- अनुगमनबाट गायब बनाएको सुन मसँग छ, लिन आउनू
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
