अर्थ समाचार

वाणिज्य विभागमा पूर्वकर्मचारीको फोन- अनुगमनबाट गायब बनाएको सुन मसँग छ, लिन आउनू

हेमन्त जोशी सोमबार, मंसिर २, २०७६ १७:००

काठमाडौं- बजार अनुगमनका क्रममा सुनचाँदी व्यवसायीबाट नमूनाका रूपमा संकलन गरिएको गरगहना कर्मचारी आफैले राखेको स्वीकार गरेका छन्।

वाणिज्य, आपूर्ति तथा उपभोक्ता संरक्षण विभागका तत्कालीन निर्देशक लक्ष्मण श्रेष्ठले नमूनामा रुपमा संकलन गरिएको सुनचाँदी आफूसँग रहेको र त्यो फिर्ता लैजान विभागका कर्मचारीले रमेशकाजी श्रेष्ठलाई फोनमार्फत् जानकारी गराएका हुन्।

‘सुनका विषयमा कुरा गर्नु छ भनेर लक्ष्मण श्रेष्ठले मलाई भेट्न बोलाएका थिए। तर मैले जान मानिनँ। उनले सुन राखेका भए आफैंले विभागमा आएर त्यसको जानकारी दिनुपर्दथ्यो। मैले जाने कुरा पनि भएन,’ नेपाल लाइभसँग कुरा गर्दै रमेशकाजीले भने।

यसरी बजार अनुगमनका क्रममा गुणस्तर चेकजाँचका लागि भन्दै नमूनाका रुपमा व्यवसायीहरुबाट लिइएको सुनचाँदीका गहना तथा हिराजस्ता बहुमूल्य धातु लामो समयदेखि कर्मचारी आफैले गायब बनाएर राखेको रहस्य केही समयअघि सार्वजनिक भएको थियो।

२०७० देखि २०७५ सालसम्म ५ वर्ष अवधिमा विभागको बजार अनुगमन शाखाको प्रमुखमा हरिनारायण बेल्बासे र त्यसपछि लक्ष्मण श्रेष्ठ रहेका थिए। सुन आफूसँग रहेको बताएका श्रेष्ठ अहिले कृषि विभाग प्रशासन शाखा प्रमुख हुन्। विभागले व्यवसायीहरुलाई बुझाउनु पर्ने सुन श्रेष्ठले किन आफ्नो घरमा राखे भन्ने विषयमा नेपाल लाइभले जानकारी लिन खोज्दा श्रेष्ठ बोल्न चाहेनन्।

‘संचार माध्यममा कसले के लेखे भन्ने मलाई जानकारी छैन। म व्यस्त छु, अहिले यो विषयमा कुरा गर्न मिल्दैन,’ श्रेष्ठले नेपाल लाइभसँग भने। व्यापारीको सुन आफूसँग रहेको भन्दै कर्मचारीलाई जानकारी दिए पनि कति परिमाणमा सुन छ भन्ने खुलाइएका छैन।

विभागले २०६९ सालपछि काठमाडौंका साथै पोखरा, धरान, बर्दियालगायत मुख्य सहरका सुनचाँदी तथा गरगहना पसलमा अनुगमन भएको थियो। व्यवसायीले २४ क्यारेटको सुन भन्दै कम गुणस्तरको सुन बेच्ने गरेको, मनोमानी ढंगले ज्यालाजर्ती निर्धारण गरी उपभोक्ताबाट बढी नाफा असुलेको, गरगहना नापजाँचका लागि प्रयोग हुने ढकतराजु ठीक नरहेको भन्दै बजार अनुगमन भएको थियो।

अनुगमनमा खटिएका कर्मचारीहरुले मुचुल्कासहित सबै विवरण खुलाउनुपर्छ। तर विभागका तत्कालीन कर्मचारीले मुचुल्काबिनै वा कुनैमा मुचुल्कासहित सुनचाँदीलगायत गरगहनाको गुणस्तर जाँच्ने भन्दै नमुना संकलन गर्ने गर्दथे। त्यही नमुनाका रुपमा संकलन गरिएको सुन कर्मचारीले व्यवसायीलाई कहिल्यै फिर्ता गरेनन् भने विभागको तथ्यांकमा पनि सुन भेटिँदैन।

विभागको महानिर्देशकका रुपमा नारायण बिँडारी, शम्भु कोइराला, गोकुलप्रसाद धिताल, कुमारप्रसाद दहाल, योगेन्द्र गौचनपछि हाल नेत्रप्रसाद सुवेदी कार्यरत छन्।

विभाग उच्च श्रोतअनुसार गौचनअघिका महानिर्देशक दहालले यो विषयमा जानकारी पाएका थिए। तर दहालले आफ्नो कार्यकालभन्दा अगाडि भएको अनुगमनका विषयभन्दा पनि आफ्नो कार्यकालमा कर्मचारीले बदमासी नगरुन भनेर सुनचाँदी बजार अनुगमनमा कर्मचारीलाई पठाएनन्।

‘तत्कालीन महानिर्देशक कुमारप्रसाद दहाललाई जानकारी नै नदिई विभागका कर्मचारीहरु सुनचाँदी बजार अनुगमन गर्ने भन्दै पोखरा गएका थिए,’ उच्च श्रोतले भनेको छ। विभागका निर्देशक लक्ष्मण श्रेष्ठको संयोजकत्वमा पोखरा पुगेर उक्त टोलीले उपभोक्ता अधिकारसम्बन्धी एउटा कार्यक्रम गरेको थियो भने सोही क्रममा त्यहाँका ८ वटा पसलमा अनुगमन गरेको थियो। 'ती पसलबाट गुणस्तर चेकजाँचका लागि करिब ६ तोला सुन उक्त टोलीले ल्याएको भन्ने सुनिएको थियो,’ श्रोत भन्छ।

महानिर्देशक भएर दहाल गएको एक महिनाभित्रै विभागका कर्मचारी उनलाई बाइपास गरी पोखरा पुगेका थिए। सो विषयमा महानिर्देशक दहालले कर्मचारीलाई मौखिक रुपमा स्पष्टीकरणसमेत सोधेको श्रोतको भनाई छ। पोखरा गएका कर्मचारीहरुले अनुगमनभन्दा पनि पुरानै अनुगमनका विषयमा र थप परीक्षण गर्न गएको भन्दै दहाललाई जवाफ दिएका थिए।

तर त्यो बेला गरेको अनुगमनको कुनै प्रतिवेदन तयार पारेर विभागमा बुझाइएको विभागमा देखिएको छैन। सुनचाँदी वा गरगहना परीक्षण गर्न ल्याएको वा नमूना संकनलका लागि ल्याएको भनेर मुचुल्का तयार पारेको देखिँदैन।

सुनचाँदीलगायत गरगहनाको परीक्षण नापतौल तथा गुणस्तर विभागले गर्ने भएका कारण यो विषयमा गुणस्तर विभागका कर्मचारीको पनि संलग्नताको आशंका गरिएको छ।

विगत ७ वर्षदेखि विभिन्न समयमा सुनचाँदी बजारमा भएको अनुगमनका क्रममा लिइएको नमुना सुन विभागबाटै गायब पारिएको रहस्य बाहिरिएपछि विभागका कानुन शाखा निर्देशक भगवानलाल श्रेष्ठको संयोजकत्वमा ४ सदस्यीय समिति गठन गरेको थियो। विभागका शाखा अधिकृत दिपकराज पोखरेल, निरज खत्री र नापतौल तथा गुणस्तर विभागबाट एक जना प्रतिनिधि रहने गरी समिति गठन गरिएको थियो।

सम्बन्धित समाचार
सुनमा चाँदी मिसाउने व्यवसायी नै अनुगमन रोक्न 'लविङ'मा, जर्तीका नाममा १० प्रतिशसम्म ठगी

७ वर्षअघिदेखि बजार अनुगमनका क्रममा परीक्षणका लागि व्यवसायीहरुबाट लिइएको सुन 'गायब'