नख्खु बिस्फोटका युवकको बयान-विप्लवका अंगरक्षकले बम बनाए, मैले लगेर राखेँ

नेपाल लाइभ

नख्खु बिस्फोटका युवकको बयान-विप्लवका अंगरक्षकले बम बनाए, मैले लगेर राखेँ हेमन्तप्रकाश वलीको संलग्नता नदेखिएको उच्चको ठहर

नारायण अधिकारी शुक्रबार, माघ १७, २०७६ १८:४२

काठमाडौं- ललितपुरको नख्खुस्थित एनसेल कार्यालय अगाडि भएको बम बिस्फोटको घटनामा नेत्रविक्रम चन्द (विप्लव) नेतृत्वको नेपाल कम्युनिष्ट पार्टी (नेकपा)का स्थायी कमिटी सदस्य हेमन्तप्रकाश वलीको संलग्नता नरहेको उच्च अदालत पाटनले ठहर गरेको छ।

गत फागुन १० गते नख्खुस्थित एनसेल कार्यालयमा बम बिस्फोट हुँदा सिंहप्रसाद गुरुङको ज्यानसमेत गएको थियो। उक्त घटनामा संलग्न रहेको भन्दै महानगरीय प्रहरी अपराध महाशाखाको टोलीले गत चैत ९ गते वलीसहितका नेतालाई पक्राउ गरेको थियो।

वलीलाई जिल्ला अदालत ललितपुरले पुर्पक्षका लागि थुनामा पठाउने आदेश गरेको थियो। तर उच्च अदालत पाटनले जिल्ला अदालतको उक्त आदेश बदर गर्ने निर्णय गरेको छ।

उच्च अदालत पाटनका मुख्य न्यायाधीश नहकुल सुवेदी र श्रीकान्त पौडेलको आदेशले जिल्ला अदालतको आदेश बदर गरेको हो।

वलीसँगै नख्खु बिस्फोटको घटनामा ईश्वर परियार, माइला लामा, धिरिन्द्राकुमारी उपाध्यायको हकमा पनि जिल्लाको आदेश उच्चले बदर गरेको छ।

यी चारै प्रतिवादीविरुद्ध जाहेरी नपरेको, सोही घटनामा पक्राउ परेका अन्य व्यक्तिले समेत उनीहरुको संलग्नता नरहेको भनेर इन्कारी बयान दिएको, घटनास्थलमा उनीहरुको उपस्थिति नदेखिएको, घटना विवरणको कागज गर्ने व्यक्तिले समेत उनीहरुको बारेमा केही नखुलाएकाले बिस्फोटमा उनीहरुको संलग्नता रहेको भन्न नमिल्ने उच्चको आदेशमा उल्लेख छ।

नेता वलीले पनि आफूलाई लागेको आरोपमा समेत इन्कारी बयान दिएका छन्। उनले अदालत समक्ष भनेका छन्- ‘आफ्नो क्षेत्रभित्र घटना भएकाले सामाजिक सञ्जालमार्फत् जिम्मा लिएको र अन्तर्वार्ता दिएको हुँ। तर उक्त घटना गराउन मैले निर्देशन दिएको छैन। अन्य कुनै माध्यमबाट सहयोग पनि गरेको छैन।’

सोही घटनामा संलग्न भनेर पक्राउ परिएका व्यक्तिले समेत वलीको संलग्नता नरहेको बयान दिएपछि उच्च अदालतले नख्खु बिस्फोटको घटनामा उनको संलग्नता नरहेको ठहर गरेकाे हो।

हातहतियारमा जिल्लाकै आदेश सदर

नख्खु बिस्फोटमा संलग्नता नरहेको उच्च अदालतले आदेश दिए पनि वलीसहितका केही नेता भने रिहा हुन बाटो खुलेको छैन। वलीसहितका विप्लवका नेताविरुद्ध बिस्फोटक पदार्थ, कर्तव्य ज्यान, ज्यान मार्ने उद्योग, राज्यविरुद्धको अपराध, हातहतियार तथा खरखजना र संगठित अपराधको मुद्दा चलाइएको थियो।

कर्तव्य ज्यान र ज्यान मार्ने उद्योगमा भने हेमन्त वलीसहितका नेता साधारण तारेखमा छुटेर मुद्दा लड्न पाउने भएका थिए। तर उनीहरुमाथि लगाइएको अन्य आरोपमा भने उच्च अदालतले थुनामै राखेर मुद्दाको कारबाही प्रक्रिया अगाडि बढाउनु पर्ने जिल्ला अदालतको आदेश सदर गरेको छ।

हेमन्तप्रकाश वली, लोकेन्द्रबहादुर खड्का, बुद्धबहादुर सिंहको साथबाट पेस्तोल, गोली, म्याग्जीन, डेटोनेटर लगायतका हातहतियार बरामद भएको, उनीहरुकै रोहबरमा यी बस्तुको मुचुल्का तयारी पारिएको, बरामद पदार्थ, हतियार, बिस्फोटक पदार्थ भएको भन्ने प्रयोगशालाबाट समेत परीक्षण भएको प्रतिवेदन आएकाले हातहतियार तथा खरखजाना मुद्दामा जिल्लाकै आदेश उच्च अदालतले सदर गरेकाे छ।

‘हतियार बरामद भएको गाडीका चालक धर्मराज राजवाहकको घटना विवरण कागजात र अन्य प्रमाणका आधारमा उनीहरु कसुरदार होइनन् भन्न सक्ने अवस्था नआएकाले जिल्ला अदालतकै आदेश सदर गरिएको छ’ उच्च अदालतको आदेशमा उल्लेख गरिएको छ।

‘विप्लवका अंगरक्षकले बम बनाए, मैले लगेर राखेँ’

नख्खु बिस्फोटकै घटनामा जिल्ला अदालतको आदेशले पुर्पक्षमा कारागार रहेका शिव धमला भन्ने शिव धिमाल, दयाङ भन्ने डिकेन्द्र राई, विप्लवका अंगरक्षक सूर्य भुजेल, दोर्जी शेर्पा र वीरबहादुर कडायतविरुद्ध भने जिल्ला अदालतकै फैसला उच्चले सदर गरेको छ।

२०७५ फागुन १० गते भएको नख्खुस्थित एनसेल अफिसमा भएको बिस्फोटमा आफूहरुको संलग्नता नरहेको भनेर उनीहरुले बताए पनि विभिन्न प्रमाणले उनीहरु संलग्न रहेको देखाएको उच्च अदालतले जनाएको छ।

जुम्ली भन्ने वीरबहादुर कडायतले माथि उल्लेखित प्रतिवादीहरुकै योजनामा बम बिस्फोट गराएको बयान दिएका छन्।

उनको बयान अनुसार विप्लवका अंगरक्षक सूर्यले बम बनाएका थिए। ‘डिकेन्द्रले मोटरसाइकल चलाए। मैले पछाडि बसेर बम बोकेँ। पछि-पछि सूर्य, रामकृष्ण, शिव अन्य दुई वटा मोटरसाइकलमा आए’, वीरबहादुरले अदालतसमक्ष भनेका छन्, ‘नख्खुस्थित एनसेल अफिसमा अगाडि पुगेपछि मैले बम राखेँ, र हामी भाग्यौं।’

वीरबहादुरले अदालतमा दिएको बयानमा समेत डिकेन्द्रको मोटरसाइकलमा गएर बम राखेको कुरा बताएका छन्। अन्य प्रतिवादीले समेत वीरबहादुरसँग बिस्फोट गराउनु पूर्व र बिस्फोट भएपछि पटक-पटक फोन सम्पर्क गरेको कल डिटेल देखिएको, मिसिलमा संलग्न सिसीटिभी फुटेजबाट समेत वीरबहादुरले बयानमा भनेका कुरा मेल खाएको र तीन वटा मोटरसाइकलमा ६ जना व्यक्ति गएर बम राखेर भागेको देखिएकाले उनीहरुलाई भने जिल्लाकै आदेशअनुसार पुर्पक्षमा राखेर अनुसन्धान गर्नुपर्ने भएकाले जिल्लाको आदेश सदर गरिएको उच्चले जनाएको छ।

उता घटना विवरण कागज गर्ने एनसेलका सुरक्षागार्ड झुपबहादुर रोकायाले समेत सूर्यको हुलिया सनाखत गरेका थिए। एनसेलकै ‘चिफ सेक्युरेटी एडिमिन्सिट्रेशन अफिसर’ महेन्द्रकुमार भट्टचन, घाइते प्रतिक्षा खड्काको बयान र अन्य प्रमाणबाट उनीहरु बिस्फोटमा संलग्न रहेको देखिएले पुर्पक्षमै राखेर अनुसन्धान गर्नुपर्ने उच्चको आदेश छ।

माइला लामासहित तीन जना रिहा हुने

विप्लव नेकपाका पोलिटब्यूरो सदस्य माइला लामा, धिरेन्द्राकुमारी उपाध्याय (भृकुटी), नवीन विश्वकर्मा (हितमान) भने रिहा हुने भएका छन्। उनीहरुको नख्खु बिस्फोटमा संलग्नता नदेखिएको उच्च अदालतले जनाएको छ।

उनीहरुको साथबाट कुनै बिस्फोटक पदार्थ, हातहतियार बरामद नभएकाले उक्त कसुरमा समेत उनीहरुको संलग्नता नदेखिएको उच्चको आदेशमा उल्लेख गरिएको छ। पक्राउ परेका अन्य व्यक्तिले समेत उनीहरुको संलग्नताबारे इन्कारी बयान दिएकाले साधारण तारेखमा राखेर मुद्दाको पुर्पक्ष गर्न उच्च अदालत पाटनले आदेश जारी गरेको छ।

तर अहिलेसम्म उनीहरु भने नख्खु जेलमै रहेको नख्खु कारागार स्रोतले जानकारी दियो। ‘थुनामुक्त हुने पत्र नआएसम्म हामीले छाड्न मिल्दैन अहिले उहाँहरु कारागारमै हुनुहुन्छ’ कारागारका एक अधिकारीले नेपाल लाइभसँग भने।

माइला लामासहित तीन जना रिहा हुने भए पनि हेमन्त वलीसहित अन्यको हकमा भने एउटा मुद्दामा उच्चले साधरण तारेखमा रहने आदेश जारी गरे पनि अरु कसुरमा जिल्लाकै आदेश सदर गरेकाले उनीहरु पुर्पक्षमा नै कारागार रहने छन्।

विप्लव नेकपाका नेताहरुको तर्फबाट बरिष्ठ अधिवक्ता एकराज भण्डारी, अधिवक्ताहरु कान्तिराम निरौला, खिमानन्द अधिकारी, बासुदेव सिग्देल, सन्तोष कोइराला, चुडाबहादुर निरौला, कपिलचन्द्र पोखरेल, रामकृष्ण भण्डारीले बहस गरेका थिए।

यो पनि

नख्खु बम विस्फोटमा संलग्न भएको आरोपमा विप्लव समूहका नेता पक्राउ