काठमाडौं– लोकदोहोरी गायिका दिलमाया सुनार मृत्यु प्रकरण रहस्यमय बन्दै गएको छ। आफ्नै कोठाको ओछ्यानमा मृत अवस्थामा फेला परेकी सुनारको अनुसन्धानमा खटिएको प्रहरी टोलीले नयाँ नयाँ तथ्य फेला पारेपछि घटना थप रहस्यमय बन्दै गएको हो।
शनिबार बिहान करिब ११ बजे सुनार मृत अवस्थामा भेटिएको जानकारी आएपछि प्रहरी वृत्त बालाजु, जिल्ला प्रहरी परिसर काठमाडौं र काठमाडौं उपत्यका प्रहरी अपराध अनुसन्धान कार्यालयले घटनाको अनुसन्धान गरिरहेका छन्।
अनुसन्धानका क्रममा सुनारको हत्या नै भएको हो भन्ने खुलिसकेको छैन। प्रहरीको प्रारम्भिक अनुसन्धानका क्रममा सुनारले आत्महत्या गरेको हुनसक्ने र आत्महत्या दुरुत्साहनमा उनकै प्रेमी सूर्य भनिने खिलबहादुर श्रेष्ठको भूमिका रहेको हुनसक्ने विश्लेषण छ।
जब मध्यराति गायिकाले फेसबुकमा लेखिन् –बाँचेर पनि दिनदिनै मर्न सकिनँ, मलाई माफ गर
गायिका सुनारले गत शुक्रबार मध्यराति फेसबुकमा एउटा स्टाटस लेखिन्। बाँचेर पनि दिनदिनै मर्नु परेको कुरा उनले स्टाटसमा उल्लेख गरिकी थिइन्। उनमा मानसिक तनावमा आएको हुनसक्ने प्रहरी विश्लेषण छ। ‘अब म बाँच्न सक्दिन यो दुनियाँ धेरै स्वार्थी छ। मैले आफ्नै इच्छाले यो कदम उठाएकी छु। कसैलाई दोष नलगाउनू’ फेसबुकमा सुनारले लेखेकी छन्। अझ अघि उनले लखेकी छन् ‘जीवनमा धेरै उतारचढाव आए। कसैको माया पाउन जति धेरै कोशिस गर्दा पनि पाइनँ।’
फेसबुकमा यस्तो स्टाटस लेखेको देखेपछि सुनारकै साथीले उनका घरेबेटीलाई सम्पर्क गरेर उक्त कुराको जानकारी गराएका थिए। शनिबार बिहान करिब १० बजेतिर घरबेटीले जानकारी पाएपछि सुनारको कोठामा गएर हेर्दा उनी आफ्नो बेडमा उत्तानो अवस्थामा मृत भेटिएकी थिइन्। त्यसपछि गायिका सुनार मृत अवस्थामा भेटिएको जानकारी प्रहरीले पाएको थियो।
सँगै बसेर मदिरा सेवन, मृत्युपछि प्रेमी फरार
गायिका सुनार मृत भेटिएको भन्ने जानकारी आएपछि अनुसन्धानमा खटिएको प्रहरी टोलीले नयाँ नयाँ तथ्य फेला पारेको छ। अनुसन्धानको क्रममा प्रहरीले उनका प्रेमी सिन्धुपाल्चोक साँगाचोकगढीका सूर्य भन्ने खिलबहादुर श्रेष्ठलाई शनिबार नै नियन्त्रणमा लिएर सोधपुछ गरिरहेको छ।
श्रेष्ठलाई काठमाडौं उपत्यका अपराध अनुसन्धान कार्यालयको टोलीले बालाजुबाट पक्राउ गरेको हो। सुरुमा श्रेष्ठले आफूलाई सुनारको मृत्यु प्रकरणबारे केही जानकारी नै नभएको प्रहरीलाई बताएका थिए। तर प्रहरीले सुनार बस्ने नेपालटारस्थित कोठा आसपासका सिसी टिभी फुटेजबाट श्रेष्ठ सुनार बस्ने घरमा गएको दृश्य देखाएपछि भने उनले घटनाबारे बताएको एक अनुसन्धान अधिकृतले नेपाल लाइभलाई जानकारी दिए।
‘सुरुमा श्रेष्ठले इन्कार गरेका थिए। पछि हामीले प्रमाण जुटाएपछि उनी बोल्न बाध्य भए’ अनुसन्धान अधिकृतले भने। अनुसन्धानको क्रममा प्रेमी श्रेष्ठ र गायिका सुनार शुक्रबार रातिसँगै सुनारको डेरा/कोठामा बसेको खुलेको छ।
सुरुमा इन्कारी बयान दिँदै घटनाबारे आफू जानकार नै नभएको दाबी गरेका श्रेष्ठ त्यसरात सुनारकै कोठामा रहेको मोबाइल लोकशनबाट समेत खुलेको छ। मोबाइल लोकशन हेर्दा सुनार र श्रेष्ठको एकै ठाउँ देखाएको प्रहरी अधिकारीको भनाइ छ।
उनीहरुले त्यसरात सँगै लोकल मदिरा पिएको पाइएको छ। सुनारको कोठाबाट लोकल मदिरा समेत प्रहरीले बरामद गरेको छ।
‘उनीहरुबीच पहिल्यैदेखि सम्बन्धमा बेलाबेलामा दरार आएको हुनुपर्छ। त्यसदिन पनि केही खटपट भएको होला। फेसबुकमा स्टाटस लेखेको केही समयपछि नै सुनार मृत्यु भएको देखिन्छ’ अनुसन्धान अधिकारीको भनाइ छ।
यता पक्राउ परेका श्रेष्ठले आफूले सुनारको हत्या नगरेको दाबी गरेका छन्। उनका अनुसार मदिरा सेवन गरेपछि आफू केही समय निदाएको र ब्युझिएपछि हेर्दा सुनार घाँटीमा सलको पासो लगाएर झ्यालको ग्रिलमा झुण्डिएको अवस्था देखेको बताएका छन्।
महाराजगञ्जमा भेटिएको सुनारको सल
त्यसपछि आफूले सल फुस्काएको तर त्यतिन्जेलमा सुनारको मृत्यु भइसकेको श्रेष्ठ बताएको प्रहरीले जनाएको छ। सुनारले आत्महत्या गरेपछि आफू फस्न सक्ने भन्दै पासो लगाएको सल लिएर भागेको श्रेष्ठको भनाइ छ। उक्त सल श्रेष्ठकै बयानका आधारमा प्रहरीले महाराजगञ्जस्थित इन्भेष्टमेन्ट बैंक अगाडिको नालीबाट बरामद गरको छ।
१५ महिनादेखि ‘लिभिङ टुगेदर’मा
सुर्खेत घर भएकी गायिका सुनार श्रीमानसँग सम्बन्ध बिच्छेद गरेर नेपालटारमा बस्दै आएकी थिइन्। उनका एक छोरा सुर्खेतमै बस्दै आएका छन्। यता प्रहरीले पक्राउ गरेका व्यक्ति श्रेष्ठ भने गोठाटारमा सुन पसल सञ्चालन गर्दै आएका छन्। उनीहरुबीच विगत १४/१५ महिनादेखि सम्बन्ध रहेको देखिएको छ। सुनार र श्रेष्ठ लिभिङ–टुगेदर जसरी नै बस्दै आएको पाइएको प्रहरीको भनाइ छ। घरबेटीले पनि श्रेष्ठ सुनारको कोठामा आइराख्ने व्यक्ति भएको बताएका छन्।
'लिभिङ–टुगेदर रिलसन'मा रहेका उनीहरुबीच बेलाबेलामा खटपट हुनु र सोही कारण सुनारले आत्महत्या गरेको हुनसक्ने अनुमान गरिएको छ। यद्यपि पोष्टमार्टम रिपोर्ट आइनसकेकाले अहिले नै आत्महत्या हो भन्ने सक्ने अवस्था छैन।
अझै फेला परेन मोबाइल
मृत गायिका श्रेष्ठको मोबाइल भने प्रहरीले अहिलेसम्म फेला पार्न सकेको छैन। मृत्यु हुनु केही समय अघि मात्रै फेसबुकमा लामो ‘सुसाइड नोट’ लेख्नु तर मोबाइल भने फेला नपर्नुले घटनालाई थप शंकास्पद बनाएको अपराध अनुसन्धान कार्यालयका एसएसपी वसन्त कुँवरले बताए।
यता पक्राउ परेका श्रेष्ठले पनि मोबाइल बारे आफू जानकार नभएको दाबी गरेका छन्। ‘मोबाइल फेला परेको अवस्था धेरै कुराहरु खुल्थे होलान्। तर अहिलेसम्म मोबाइल फेला पार्न सकिएको छैन। हामी प्रयास गरिरहेका छौं’ एसएसपी कुँवरले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
