काठमाडौं– संयुक्त राष्ट्र संघको शान्ति मिसनमा जान लागि नेपाल प्रहरी लिने आन्तरिक प्रि–स्याट प्रश्नपत्र लिक प्रकरणमा छानबिन समितिले सिफारिस गरेका प्रहरी अधिकारीमाथि कारबाही गरिएको छ। समितिले कारबाही सिफारिस गरेका १४ जनालाई नै कारबाही गरिएको हो।
प्रहरी प्रधान कार्यालय स्रोतका अनुसार परीक्षा सञ्चालन समितिका एसपी वेद विष्टलाई ध्यानाकर्षण गराइएको छ। युएन शाखाका प्रमुख एसपी अनुपम शमशेर राणालाई सचेत गराइएको छ। उनीहरुलाई रेकर्डमा रहने गरी सचेत र ध्यानाकर्षण गराइएको स्रोतले नेपाल लाइभलाई जानकारी दियो।
त्यसैगरी डिएसपी रुपेश खड्का र सुगन्ध श्रेष्ठलाई निसियत दिइएको छ। डिएसपी श्रेष्ठकै योजना अनुसार साइबर ब्यूरोका हवल्दार कुमार शाहले प्रश्नपत्र चोरी गर्न लगाएको समितिले निष्कर्ष निकालेको थियो।
कारबाही सिफारिसमा परेका इन्सपेक्टर इश्वरी भण्डारी, सई केदार तिमल्सिना, सई सुनिल भण्डारी, सई केशव कार्की, असई अशोक कार्की, जवान सुनिता नेपालीलाई पनि नसिहत दिइएको स्रोतले जानकारी दियो।
३ जनालाई बर्खास्तका लागि प्रक्रिया सुरु
चोरी प्रकरणमा प्रत्यक्ष संलग्न भएको भन्दै तीन जनालाई सेवाबाट बर्खास्तीका लागि प्रक्रिया अघि बढाइएको छ। जसमा युएन शाखामै कार्यरत रहेका परिचर सुरेश बम, साइबर ब्यूरोमा कार्यरत हवल्दार कुमार शाह र सई जनक थापालाई बर्खास्तको प्रक्रिया अघि बढाइएको छ।
छानबिन समितिको सिफारिसमा यसअघि उनीहरुलाई निलम्बन गरिएको थियो। प्रश्नपत्र चोरी प्रकरणमा उनीहरुको प्रत्यक्ष संलग्नता रहेको खुलेको थियो। बमले एसपीको घर्राबाट प्रश्नपत्र चोरी गरेका थिए। उनले हवल्दार शाहको योजनामा उक्त काम गरेको बताएका थिए। हवल्दार शाहले आर्थिक आर्जनकै लागि प्रश्नपत्र चोरी गर्न लगाएको निष्कर्ष समितिले निकालेको थियो।
यसअघि पनि आर्थिक आर्जनकै लागि प्रश्नपत्र बाहिरिने घटना हुने गरेको समितिले निष्कर्ष निकालेको थियो। हवल्दार शाह ८ वर्षसम्म युएन शाखामा कार्यरत रहेका बेला उनले यसअघि पनि प्रश्नपत्र चोरी गरि आउट गरेको समितिको निष्कर्ष थियो।
गएको १६ साउनमा लिइएको परीक्षाको प्रश्नपत्र बाहिरिएको थियो। प्रश्नपत्र लिक भएपछि प्रहरी प्रधान कार्यालयले प्रहरी महानिरीक्षक शैलेश थापा क्षेत्रीको सचिवालयका प्रहरी नायब महानिरीक्षक (डीआईजी) वसन्तकुमार लामाको संयोजकत्वमा ६ सदस्यीय छानबिन समिति गठन गरेको थियो।
समितिले चारवटै सिफट्को प्रश्नपत्र आउट भएको निष्कर्ष निकाल्दै प्रतिवेदन बुझाएको थियो। यस प्रकरणमा संलग्न भएको आरोपमा १४ जनालाई कारबाहीका लागि सिफारिस पनि गरेको थियो। सोही अनुसार प्रहरी प्रधान कार्यालयले उनीहरुलाई कारबाही गरेको हो। प्रश्नपत्र लिक भएपछि रद्द गरिएको उक्त परीक्षा पुन: भदो १७ गते हुने प्रहरी प्रधान कार्यालयले जानकारी गराइसकेको छ।
सम्बन्धित समाचार :
प्रि–स्याट प्रश्नपत्र ‘लिक’ घटना : ११९ परीक्षार्थीसम्म पुगेको निष्कर्ष, यी हुन् कारबाही सिफारिसमा परेका प्रहरी
प्रि–स्याट अनुसन्धान प्रतिवेदन : चार वटै सिफ्टको प्रश्नपत्र बाहिरिएको निष्कर्ष, एसपीसहित ३५ जनालाई कारबाही सिफारिस
प्रहरीमा प्रि–स्याट परीक्षाको प्रश्नपत्र ‘लिक’ प्रकरणमा परिचरदेखि डीएसपीसम्मको संलग्नता !
प्रहरीमा शान्ति मिसनको परीक्षाको प्रश्नपत्र लिक भएको आशंका, छानबिन समिति गठन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
