सुरक्षा/अपराध

प्रहरीमा प्रि–स्याट परीक्षाको प्रश्नपत्र ‘लिक’ प्रकरणमा परिचरदेखि डीएसपीसम्मको संलग्नता !

नारायण अधिकारी बिहीबार, साउन २१, २०७८ १९:४१

काठमाडौं– संयुक्त राष्ट्रसंघको शान्ति मिसनमा जाने प्रहरीका लागि प्रहरी प्रधान कार्यालयले आन्तरिक रुपमा लिएको ‘प्रि–स्याट परीक्षा’को प्रश्नपत्र ‘लिक’मा प्रहरी प्रधान कार्यालयका परिचरदेखि प्रहरी नायब उपरीक्षक (डीएसपी)सम्मको संलग्नता रहेको खुलेको छ।

प्रश्नपत्र लिक भएको विषय सार्वजनिक भएपछि गठन भएको छानबिन समितिले यसमा परिचरदेखि डीएसपीसम्मको संलग्नता रहेको 'तथ्य' फेला पारेको हो।

प्रश्नपत्र लिक भएको सार्वजनिक भएपछि प्रहरी महानिरीक्षक शैलेश थापा क्षेत्रीको सचिवायलयका प्रहरी नायब महानिरीक्षक (डीआईजी) वसन्तकुमार लामाको संयोजकत्वमा ६ सदस्यीय छानबिन समिति गठन भएको थियो।

समितिले गरेको अनुसन्धानका क्रममा प्रश्नपत्र लिक गर्ने कार्यमा प्रहरी प्रधान कार्यालयको युएन शाखाका परिचर र डीएसपीको संलग्नता खुलेको हो। ‘अहिलेसम्म उच्च तहका अधिकृतमध्ये डीएसपीसम्मको संलग्नता रहेको देखिन्छ। अनुसन्धान जारी रहेकाले थप तथ्य खुल्दै जाला,’ समितिका एक प्रहरी अधिकृतले नेपाल लाइभसँग भने।

प्रहरी प्रधान कार्यालयको युएन शाखामै रहेका परिचर सुरेश बमबाटै प्रश्नपत्र लिक भएको देखिएको समिति स्रोतले जानकारी दियो। बमबाट उक्त प्रश्नपत्र प्रहरीको केन्द्रीय साइबर ब्यूरोमा कार्यरत हवल्दार कुमार शाहसम्म पुगेको थियो। त्यसपछि उक्त प्रश्नपत्र एक डीएसपीसम्म पुगेको छानबिन समिति स्रोतले जानकारी दियो।

‘अहिलेसम्म धेरै पिक्चर आइसकेको छ। अब यसलाई पूर्णता दिने काम अन्तिम चरणमा पुगेको छ,’ समितिका एक अधिकृत भन्छन्।

कार्यालय समय सकिएर सबै जना घर गइसकेपछि परिचर बमले उक्त प्रश्नपत्र युएन शाखाका एसपी अनुपम शमशेर राणाको कोठाबाट निकालेको पाइएको छ। प्रश्नपत्र लिकमा प्रत्यक्ष रुपमा परिचर बम र हवल्दार शाहको संलग्नता देखिएपछि उनीहरुलाई प्रहरी प्रधान कार्यालयमै रहेको १ नम्बर गणमा राखेर अनुसन्धान गरिएको छ।

परीक्षामा नै संलग्नता नहुने परिचर बमले किन प्रश्नपत्र चोरे, त्यसपछि प्रि–स्याटको परीक्षामा नै संलग्नता नभएको हवल्दार शाहलाई किन त्यो प्रश्नपत्र दिइयो ? हवल्दारबाट उक्त प्रश्नपत्र कहाँ–कहाँ गयो भन्नेबारे प्रहरीले अनुसन्धान जारी राखेको छ।

‘अचम्म के छ भने प्रि–स्याट परीक्षामा नै संलग्नता नहुनेहरुबाट प्रश्नपत्र लिक भएको देखियो। परिक्षामा सहभागी नहुने परिचारले परीक्षा नै नदिने व्यक्तिलाई उक्त प्रश्नपत्र फवार्ड गर्नुले यसमा केही विषय अझै अनुसन्धान गर्नुपर्ने देखिएको छ,’ समितिका अधिकारी भन्छन्।

प्रश्नपत्र लिक हुनुमा विभिन्न व्यक्तिको विभिन्न खाले भूमिकाहरु देखिएका छानबिन समितिका अधिकृतको भनाइ छ। 'कोही व्यक्तिको प्रत्यक्ष संलग्नता रहेको देखिन्छ भने कोहीको सामान्य भूमिका देखिएको छ,' छानबिन समितिका ती अधिकृत भन्छन्।

छानबिन समितिका अधिकृतका अनुसार प्रत्यक्ष चोरीमा तल्लो दर्जाका प्रहरीको भूमिका देखिएको छ भने डीएसपीसम्मका अधिकारीको भूमिका बाह्य रुपमा देखिएको छ। तल्लो दर्जाका कर्मचारी डीएसपी तहका अधिकारीबाटै परिचालित भएको हुनसक्ने विश्लेषण गरेर अनुसन्धान जारी राखिएको समितिका अधिकृतको भनाइ छ।

अनुसन्धान अन्तिम चरणमा
छानिबिन समितिका संयोजक लामाका अनुसार अनुसन्धान अन्तिम चरणमा पुगेको छ। आइतबार वा सोमबारसम्म छानबिन सकेर प्रतिवेदन बुझाइने लामाले जानकारी दिए।

शान्ति मिसनमा जाने प्रहरी कर्मचारीको छनौटका लागि प्रहरी प्रधान कार्यालयले दुई चरणमा परीक्षा लिने गर्छ। पहिलो चरणमा प्रि–स्याट परीक्षा लिइन्छ। प्रि–स्याटमा उत्तिर्ण हुने प्रहरी कर्मचारीले मात्रै स्याट परीक्षा दिन पाउँछन्।

स्याट परीक्षा संयुक्त राष्ट्रसंघका प्रतिनिधिको राहेबरमा लिनुपर्ने हुन्छ। त्यसका लागि अन्तिम परीक्षा लिनु अगावै प्रहरी प्रधान कार्यालयले प्रि–स्याटमा पास भएकाहरुको सूचि पठाउनु पर्ने हुन्छ।

आउँदो अक्टोबरमा अन्तिम परीक्षा हुने भएकाले त्यो अगाडि नै प्रि–स्याटमा पास हुनेको विवरण पठाउनु पर्नेछ। स्याट परीक्षाका लागि प्रि–स्याट पास हुनेको विवरण पठाउन धेरै समय नभएकाले पनि प्रश्नपत्र लिक भएको घटनाका सन्दर्भमा चाँडो निष्कर्षमा पुग्ने गरी अनुसन्धानलाई तीव्र पार्दै अन्तिम चरणमा लगिएको प्रहरी प्रधान कार्यालयले जनाएको छ।

यदी पुनः परीक्षा सञ्चालन गर्नु भएको अवस्थामा पनि चाँडै अनुसन्धान सकेर प्रतिवेदन बुझाउँदा सहज हुने भएकाले तीव्र रुपमा अनुसन्धान गरी अन्मित चरणमा पुर्‍याइएको समितिले जनाएको छ।

प्रि–स्याट उत्तिर्ण हुनेको सूचि पाएपछि युएनले स्याटको अन्तिम परीक्षा विभिन्न लटमा लिनेगर्छ।

प्रश्नपत्र लिक भएको विषय सार्वजनिक भएपछि छानबिनमा समितिले काठमाडौं उपत्यका बाहिरका प्रहरीलाई समेत बोलाएर उक्त विषयमा सोधपुछ गरिरहेको छ।

शंकास्पद केही व्यक्तिलाई भने नियन्त्रणमै राखेर अनुसन्धान गरिएको छ भने केहीलाई सोधपुछ गर्दै छाडिएको छ।

प्रहरी प्रधान कार्यालयले गत शुक्रबार र शनिबार प्रि–स्याटको परीक्षा लिएको थियो। ती मध्ये शनिबारको एक सिफ्टको प्रश्नपत्र आउट भएको पाइएको हो।