नयाँ दिल्ली– भारतको कर्नाटक राज्यमा सरकार निर्माणका लागि सर्वोच्च अदालतले अनुमति दिएपछि भारतीय जनता पार्टी(भाजपा)को नेतृत्वमा सरकार बन्ने निश्चित भएको छ।
आफूसँग बहुमत रहेकोले सरकार बनाउन पाउनुपर्ने भन्दै भारतीय राष्ट्रिय कंग्रेसले आफ्नो पक्षमा सरकार निर्माण गर्न दिन माग गर्दै सर्वोच्चमा रिट हालेको थियो।
तर सर्वोच्च अदालतले भने कंग्रेसको उक्त रिट खारेज गर्दै भारतीय जनता पार्टीलाई नै सरकार निर्माणका लागि अनुमति दिएको हो।
हालै सम्पन्न भएको दक्षिण भारतीय राज्य कर्नाटकको विधान सभाको निर्वाचनमा पनि कंग्रेसले आफ्नो पहिलेको अवस्थालाई कायम राख्न सकेन। उसले यसअघि १ सय २२ स्थानमा विजय हासिल गरेकोमा त्यसमा ह्रास आई अहिले भने जम्मा ७८ स्थानमा सिमीत भएको थियो।
उक्त राज्यमा जम्मा २ सय २४ स्थानका लागि चुनाव भएको थियो। तर१ सय ४ स्थानमा विजयी हुँदै भाजपा सबैभन्दा ठूलो दल बनेको हो।
सरकार निर्माणका लागि भने १ सय १३ सिट चहिन्छ। आवश्यक बहुमत प्राप्त नभएपछि भाजपा र कंग्रेस दुवैले नै सरकार निर्माणका लागि दावी गरेका थिए।
भारतीय जनता पार्टीले सरकार निर्माण गर्ने निश्चित भएको र आजै मन्त्रीहरुले पनि सपथ ग्रहण गरेका बताइएको छ। तर पनि उसका सामु आगामी १५ दिनभित्रमा विश्वासको मत लिने प्रावधान रहेको छ र त्यो भने चुनौतीपूर्ण रहेको बताइन्छ।
भाजपाले सांसद किन्यो : कंग्रेस
उता भारतीय राष्ट्रिय कंग्रेसले भने कर्नाटकमा भारतीय जनता पार्टीले कंग्रेसका सांसद किनेर सरकार बनाएको भन्दै त्यसको विरोध गरेको छ।
आफ्नो पार्टीमा फुट ल्याएर र आफ्नो पार्टीका सांसद किनेर भाजपाले सरकार निर्माण गरेको भन्दै कंग्रेसले आरोप लगाएको छ।
तर सो आरोप भाजपाले भने अस्वीकार गरेको छ। यसलाई भाजपाले भने निराधार आरोप भनेको छ। भाजपाले प्रत्येक सांसदलाई डेढ करोड भारतीय रुपैयाँ पैसा दिएर सरकार बनाउन किनेको कंग्रेसले आरोप लगाएको छ।
त्यहाँ भारतीय कंग्रेसले भने तेस्रो ठूलो दल जनता दल सेक्युलरसँग मिलेर सरकार बनाउने र मुख्यमन्त्री पनि सोही दललाई दिने सहमति गरेको थियो। तर पनि उसको दलका सदस्यहरुले नै भाजपाले किनिदिएको आरोप लगाएको थियो। उक्त दलले यहाँ ३७ स्थानमा विजय हासिल गरेको थियो।
‘प्रजातन्त्रको हत्या भयो’
यसैबीच भारतीय कंग्रेसले यस घटनालाई प्रजातन्त्रको हत्याको संज्ञा दिएको छ। बिहीबार बिहान ९ बजेका लागि सरकारको सपथ कार्यक्रम राखिएको थियो।
सोहीकारण कंग्रेसले राति नै अदालतमा रिट हालेको थियो। राति १२ बजे रिट हालेको र तत्कालै सुनुवाई सुरु भएको थियो। अदालतमा राति ३ बजेसम्म सुनुवाइ भएको थियो। तीन घन्टा निरन्तर लामो सुनुवाइपछि फैसला भने भाजपाकै पक्षमा भएको थियो।
यस घटनालाई कंग्रेसले प्रजातन्त्रमाथिको हत्याको संज्ञा दिएको छ। उसले भनेको छ, ‘यस्तो हत्या अदालतबाटै भएको छ। राता–रात अदालतले गरेको फैसलाले देशमा प्रजातन्त्रकै हत्या गरेको छ।’ रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
