कुमार पौडेलका परिवारको ‘विप्लव’लाई प्रश्न- ‘हामीलाई कसरी न्याय दिन्छौं?’

समाचार

दुर्गा दुलाल शुक्रबार, फागुन २१, २०७७ २०:२१

कला पोडेल।

काठमाडौं- काठमाडौंको राष्ट्रिय सभा गृहमा प्रधानमन्त्री केपी शर्मा ओलीले तामझामका साथ नेत्रविक्रम चन्द 'विप्लव'सँग तीन बुँदे सहमति सार्वजनिक गर्दै गर्दा प्रहरी 'इन्काउन्टर'मा मारिएका कुमार पौडेलको परिवार भने 'विप्लव'निकट नेकपासँग अब कुनै सम्बन्ध नरहेको भनिरहेको थियो।

राष्ट्रिय सभा गृहमा सहमति सार्वजनिक कार्यक्रममा 'विप्लव'ले पनि आफूहरूका विषयमा केही नबोलेको पीडित परिवारको गुनासो छ। आन्दोलनका नाममा अघि सारेर मर्न बाध्य बनाएको तर, त्यसको सम्झना नगरेको भन्दै पौडेल परिवारको मन दुखेको हो।

नेपाल लाइभसँग टेलिफोनमा कुरा गर्दै पौडेलकी श्रीमती कलाले आफ्नो श्रीमान गुमाएकोमा भन्दा अहिले पार्टीले वेवास्ता गरेकोमा धेरै दु:ख लागेको बताइन्। ‘जुन पार्टी र सिद्धान्तमा लाग्दा समातेर हत्या गरियो। अनि, मुठभेडमा मारिएको गलत आरोप लगाइयो। अहिले पार्टीले शान्ति प्रक्रियामा आउँदा एक शब्द पनि कतै सम्झेन’, कलाले भनिन् ‘हामीले अभिभावक गुमायौं तर, अरुले राजनीतिक अवसर पाए।’

कलाले 'विप्लव'सँग सहमति हुँदैछ भन्ने बिहीबार नै सञ्चारमाध्यमबाट जानकारी पाएकी रहिछन्। शुक्रबार बिहान नेपाल लाइभले सम्पर्क गर्दा कलाले भनेकी थिइन्- ‘खै, हामीले पनि त्यही सुनेको हो। उहाँको पार्टी शान्ति प्रक्रियामा आउँदैछ रे ? प्रधानमन्त्रीसँग हस्ताक्षर गरेर सार्वजनिक हुँदैछ रे?’

कुमार पौडेलका भाइ हरिकृष्ण प्रसाद पौडेलले पनि 'विप्लव'ले आफ्ना दाजुलगायत ज्यान गुमाएकाहरूका बारेमा केही नबोलेको भन्दै आक्रोश पोखे। ‘हामी न्याय पाउन अहिले सर्वोच्च अदालतमा धाइरहनु परेको छ’, पौडेलले भने, ‘उहाँका पार्टीका नेताहरू सार्वजनिक भएर हस्ताक्षर त गरे तर एकशब्द पनि विगतमा ज्यान गुमाउनेहरूका बारेमा बोलेनन्।’

पौडेलका परिवारले दायर गरेको रिटमा आउँदो चैत ५ गते पेशीमा रहेको छ। उक्त दिनमा न्याय दिने आस रहेको उनले बताए। ‘जिल्लामा दर्ता नगरेपछि हामी सर्वाेच्च धाएका छौं’ पौडेलले भने, ‘मानव अधिकार आयोगले पनि १० जनालाई दोषी भएको र दोहोरो भिडन्त भएको छैन भनेकाले न्याय पाउने आस छ।’ पार्टीले अप्ठारो परेको समय विज्ञप्ति निकालेर मात्र भएपनि सहयोग नगरेको परिवारको गुनासो छ।

‘पार्टीप्रति हामी जोडिएका छैनौं। पार्टीहरूले हामीलाई कहिल्यै सम्झेन’ कलाले भनिन् ‘विप्लवको कार्यकर्ता बारेमा बोल्न पर्थ्यो होला नि। विज्ञप्ति मात्र निकालेर भएपनि सरकारलाई हाम्रो बारेमा दबाब दिनुपर्थ्यो।’

हत्याको बारेमा पार्टीले यसरी बिर्सेकोमा दु:ख लागेको उनले बताइन्। बिहान खड्ग बहादुर विश्वकर्मा 'प्रकाण्ड'ले सम्बोधन गर्दा समेत कुमार पौडेल मारेको कुरा नै नगरेकोप्रति परिवारलाई धेरै दु:ख लागेको उनले बताइन्। शिक्षक हत्या, ऐनसेलको टावर विस्फोटन जस्ता प्रश्न आउँदा कुमार पौडेल हाम्रो कार्यकर्ताको पनि सरकारले हत्या गर्‍यो नि भन्न सक्नु भएन’, कलाले भनिन् ‘कार्यकर्ता र अन्याय भएको महसुस भएको भयो भन्नुहुन्थ्यो होला।’

सरकारले मारेको भन्नु पर्नेमा नभनेको र एक शब्द पनि नलिकालकोमा दु:ख लागेको उनको भनाइ छ। भाइ हरिकृष्ण प्रसादको पनि यही गुनासो छ। ‘पार्टीले केही गर्ला भन्ने आस गरेका छैनौं, हामीले आस मारेका छौं’ उनले भने ‘भोलिका दिनमा हामी न यो पार्टीसँग जोडिनेछौं न त अपनत्व नै हुन्छ।’

तर, विप्लवले पौडेलको हत्या सुकुम्वासीको समस्याका कारण भनेकाले उक्त समस्या समाधान गर्न भने उनले आग्रह गरे। दोहोरो भीडन्तमा मारिएका भनिएका सर्लाही जिल्ला इन्चार्ज पौडेलको परिवारले नियोजित रुपमा नियन्त्रणमा लिएर हत्या गरिएको दाबीमा अझै अडिक रहेको बतायो। २०७६ असार ५ गते सर्लाहीको लालबन्दी नगरपालिका–१ लखनदेही खोलाको छेउमा पौडेलको हत्या भएको थियो।

प्रहरीसँग मुठभेड नभई निर्देशनको आडमा प्रहरीले नियन्त्रणमा लिएर हाँतखुट्टा भाँचेर, दाँत झारेर गोली हानेको आरोप परिवारको छ। मानव अधिकार आयोगको अनुसन्धानको टोलीले पनि दोहोरो भिडन्त नभई हत्या गरिएको भन्दै कारबाहीको सिफारिस गरेको थियो।

सादा पोशाकमा रहेका प्रहरीले दाजुको हत्या गरेको र चार ठाँउमा भाँच्चिएको हात नजिकै हतियारसहित फोटो राखेको भाइ हरिकृष्ण प्रसादको आरोप छ। उनले सागरनाथ वन विकास परियोजनाअन्तर्गत रहेको सुकुम्वासीको विषयलाई उठाएका कारण दाइको हत्या भएको भएकाले यसको जिम्मा अब विप्लवहरूले लिनुपर्ने उनले बताए।

उनीहरूले छानविन समिति बनाएर वास्तविकता बाहिर ल्याइदिएपनि आफूहरू पार्टीसँग खुशी हुने कलाको भनाई छ। सरकारले स्वतन्त्र छानबिन गरेर आफ्नो श्रीमानको हत्यारालाई कानुनी दायरामा ल्याउनुपर्ने उनको माग छ।

दोषीलाई कानुनी कारबाही गरे मात्रै आफूहरूले न्याय पाउने उनको भनाइ छ। परिवारले पोष्टमार्टम गर्नुअगाडि प्रहरी प्रशासनले आफूहरूलाई जानकारी नदिएकोप्रति असन्तुष्टि जनाए। 'हत्यापछि पोष्टमार्टम गरियो तर हामीलाई जानकारी गराइएन?’ कलाले भनिन् ‘म सरकारलाई सोध्न चाहन्छु। हामीलाई शव कुहिएको अवस्थामा किन दिइयो?’ उनले 'विप्लव' नेकपा वा सरकार जसले भएपनि न्याय दिनुपर्ने बताइन्।

सम्बन्धित समाचार

‘विप्लव’लाई धनकुमारीको प्रश्न- ‘कुन क्रान्तिका लागि मेरो श्रीमानलाई मार्‍यौ?’

कुमार पाैडेल इन्काउन्टर : सरकारकाे निवेदन आयाेगद्वारा खारेज

कुमार पौडेल हत्या प्रकरण : बयान दिन आएनन् लेखनदास, पोस्टमार्टममै आयोगलाई शंका

९ राउन्ड गोली हानी कुमार पौडेलको हत्या नै भएको निष्कर्ष, गोली हान्ने प्रहरीलाई कारबाही गर्न निर्देशन

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।