काठमाडौं- चार्टर्ड उडानमार्फत् गत असार २ गते त्रिभुवन अन्तर्राष्ट्रिय विमानस्थलमा ओर्लिएका गण्डकी प्रदेशका महेश अधिकारीसँग कोरोना परीक्षणको आरडिटी वा पिसीआर परीक्षणको रिपोर्ट केही पनि थिएन। उनीसँगै फर्किएका १५४ मध्ये ७ जनासँग मात्रै पिसीआर परीक्षणको रिपोेर्ट थियो। बाँकीसँग सम्बन्धित गन्तव्य मुलुकले उपलब्ध गराएको ‘फिट फर ट्राभल’ रिपोर्ट मात्रै थियो।
१५४ मध्ये पिसीआर परीक्षणको रिपोर्ट भएका ७ जनालाई छुट्टै राखेर होम क्वारेन्टाइन पठाइयो भने फिट फर ट्राभल रिपोर्ट भएका बाँकीलाई होटल क्वारेन्टाइन पठाइयो।
युएईबाट फर्किएका शिवलाल चौधरीसँग पिसीआर परीक्षणको नेगेटिभ रिपोर्ट थियो। उनीसहित १६८ जना एयर अरेबियाको जहाजमा फर्किएका थिए। उनीहरु मध्ये कतिपयसँग पिसीआर परीक्षण र केहीसँग आरडिटी परीक्षणको नेगेटिभ रिपोर्ट थियो भने कोरोना परीक्षण नै नगराई फर्किएकाहरु पनि थिए।
एउटै उडानमार्फत् आएका ३ किसिमका व्यक्तिहरुमध्ये पिसीआर रिपोर्ट नेगेटिभ भएकाहरुलाई होम क्वारेन्टाइन पठाइयो। चौधरी आफू र पिसीआर रिपोर्ट नेगेटिभ भएका अन्य साथीहरुलाई होम क्वारेन्टाइनमा पठाइएको बताउँछन्। बाँकी कोरोना परीक्षण नगराई फर्किएका तथा आरडिटीमात्र गरेर फर्किएकाहरुलाई अन्य स्थानीय तथा प्रदेशस्तरीय क्वारेन्टाइनमा पठाइएको थियो।
इपिडिमियोलोजी तथा रोग नियन्त्रण महाशाखाका निर्देशक डा बासुदेव पाण्डे यसरी कोरोना परीक्षणको पिसीआर रिपोर्ट नेगेटिभ भएका, आरडिटी रिपोर्टमात्र भएका वा रिपोर्ट नै नभएकाहरु सबैलाई एउटै उडानमार्फत् फर्काउँदा जोखिम हुने बताउँछन्। सबैलाई सँगै ल्याउनुपर्ने अवस्था भएमा सम्बन्धित गन्तव्य मुलुकमा कोरोना परीक्षणको पिसीआर नेगेटिभ भएकाहरुले स्वदेश फर्किएर पनि पुनः परीक्षण गराउनुपर्ने उनको भनाइ छ।
‘पिसीआर रिपोर्ट नभएकासँगै एउटै उडानमार्फत् फर्किएपछि पिसीआर रिपोर्ट नेगेटिभ हुनेहरु पनि ढुक्क हुने अवस्था रहँदैन। उहाँहरुमा पनि कोरोना संक्रमणको जोखिम हुन्छ,’ डा पाण्डेले नेपाल लाइभसँग भने। यस्तो अवस्थामा पिसीआर रिपोर्ट नेगेटिभ भएकाहरुलाई पनि सिधै होम क्वारेन्टाइनमा नपठाएर तोकिएको क्वारेन्टाइनमा राखि पुनः कोरोना परीक्षण गरेरमात्रै घर पठाउनुपर्ने उनको भनाइ छ।
जोखिमपूर्ण हवाई उडानमार्फत् फर्किए २८ हजार बढी
कोरोनाका कारण विदेशमा समस्यामा परेका २८ हजार जनाभन्दा बढी नेपालीहरु जोखिमपूर्ण हवाई उद्धार उडानमार्फत् स्वदेश फर्किसकेका छन्। बिहीबारसम्म हवाई उडानमार्फत् स्वदेश फर्किएका २८ हजार ७ सय ११ मध्ये अधिकांश कोरोना परीक्षण नगराई फर्कनेहरु छन्।
ओमान तथा म्यानमारलगायत केही मुलुकबाट मात्रै एउटै उडानमार्फत् फर्कनेहरु सबैले एकै किसिमको (पिसीआर) परीक्षण गराएर फर्किएका थिए। बाँकी अधिकांशलाई भद्रगोल तरिकाबाट जोखिमपूर्ण यात्रा गराइएको पाइएको छ।
स्वास्थ्य प्रोटोकलमा पिसीआर रिपोर्ट नेगेटिभ भएका, आरडिटी नेगेटिभ भएका तथा यी दुवै परीक्षण नगराएकाहरुलाई छुट्टाछुट्टै उडानमार्फत् फर्काउनुपर्ने व्यवस्था भएपनि सबैलाई एकै उडानमार्फत् स्वदेश फर्काइएको पाइएको हो। त्रुटिपूर्ण उद्धारकै कारण यसबीचमा कोरोना संक्रमण दरसमेत बढेको थियो। विदेशमा कोरोना नेगेटिभ भएकाहरु नेपाल फर्किएपछि कोरोना पोजिटिभका थुप्रै घटनाहरु बाहिरिएका थिए।
विदेशबाट फर्किएकाहरुमा अहिले पनि कोरोना पुष्टि भएका, आशंका भएका तथा अन्य गरी ४९ जना विभिन्न अस्पतालमा उपचाररत छन्। यसअघि कोरोना पुष्टि भएका कतिपय कोरोनामुक्त भइसकेका छन्।
छुट्टाछुट्टै उडानमार्फत् फर्काइएको सिसिएमसीको दाबी
कोरोना संकट व्यवस्थापन केन्द्र (सिसिएमसी)का सचिव महेन्द्र गुरागाइँ एउटा उडानमार्फत् कोरोना परीक्षणको एउटै किसिमको रिपोर्ट भएका व्यक्तिहरुलाई मात्रै स्वदेश फर्काइएको दाबी गर्छन्।
‘हामीले पिसीआर र आरडिटी नेगेटिभ भएकालाई एउटै उडानमा मिसाएर नपठाउन सम्बन्धित नियोगहरुलाई निर्देशन दिएका छौँ। जुन देशमा जस्तो परीक्षणको व्यवस्था छ, सबैले सोही किसिमको परीक्षण गराएर फर्कनुभएको छ,’ गुरागाँइले नेपाल लाइभसँग भने। कोरोना परीक्षणको व्यवस्था नभएका मुलुकहरुबाट फिट फर ट्राभल डकुमेन्टका आधारमा उनीहरुलाई छुट्टै फर्काइएको सिसिएमसीले दाबी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
