सुन्दर फोक्सुण्डोको अनेक रूप [फोटो फिचर]

फिचर

ऋग्वेद शर्मा/शिव बोहरा मंगलबार, कात्तिक ५, २०७६ १५:१७

काठमाडौं- कर्णाली प्रदेशको डोल्पा जिल्लामा रहेको फोक्सुण्डो तालसम्म पुग्न जति सकस छ, पुगिसक्दाको आनन्द त्योभन्दा धेरै बढी लाग्छ। आकाशको प्रतिबिम्ब जस्तो देखिने गाढा निलो फोक्सुण्डो मध्यान्हमा हावाको गतिसँगै चलमलाउन थाल्दा अझ सुन्दर देखिन्छ।

शे गुम्बाको नामसँग जोडिएर रहेको शे–फोक्सुण्डो राष्ट्रिय निकुञ्जभित्र पर्ने फोक्सुण्डो ताललाई धेरैले शे–फोक्सुण्डोकै नामले समेत चिन्छन्। शे–फोक्सुण्डो गाउँपालिकाकै रिग्मो गाउँमा पर्छ फोक्सुण्डो ताल।

भौगोलिक विकटताबीचको प्राकृतिक सुन्दरता हेर्न पछिल्लो समय स्थानीय पर्यटकको संख्या बढीरहेको छ। नेपालगञ्जबाट डोल्पाकै जुफालसम्म विमानमा र त्यहाँबाट दुई दिनको पैदलबाट फोक्सुण्डो पुग्न सकिन्छ। तर विमानको टिकट पाउनै मुस्किल हुनाले धेरै पर्यटक रुकुमको राडीज्यूला बजार हुँदै ६ वटा जिप परिवर्तन गरेर डोल्पा सुलिगाड पुग्छन्। र, सुलिगाडबाट दुई दिन हिँडेर फोक्सुण्डो।

चट्टानी पहाडको बीचमा घेरिएको फोक्सुण्डो समुद्रि सतहबाट ३ हजार ९ सय ९० मिटर उचाइमा रहेको छ। नेपालकै गहिरो तालको रुपमा मानिने फोक्सुण्डोको लम्बाइ ५.९३ किलोमिटर र चौडाइ १.८० किलोमिटर रहेको छ।

ताल ४.९५ वर्ग किलोमिटर क्षेत्रफलमा फैलिएको छ। फोक्सुण्डो तालबाट १६७ मिटर तल झरेको सुलिगाड झरना पनि हेर्नलायक छ।