काठमाडौं- राष्ट्रपति विद्यादेवी भण्डारीले म्यानमार भ्रमणका क्रममा समकक्षी विन मिन्त, मानव अधिकारवादी नेतृ आङ सुकीदेखि नेपाली मुलका समुदायसम्म भेट गरेकी छिन्।
भण्डारीले बिहीबार म्यानमारका राष्ट्रपति विन मिन्तसँग शिष्टाचार भेटवार्ता गरिन्। सो क्रममा भण्डारीले आफ्नो म्यानमार भ्रमणले दुई देशबीचको सम्बन्धलाई अझ माथि उठाउने बताइन्। राष्ट्रपति भण्डारी र नेपाली प्रतिनिधिमण्डलको सम्मानमा बिहीबार म्यानमारको राजधानी नेपितस्थित प्रेन्सिडेन्सियल हाउसमा राष्ट्रपति मिन्तले राजकीय भोजको आयोजना गरे।
राष्ट्रपति मिन्तले यस भ्रमणबाट आपसी विश्वास, समझदारी तथा धार्मिक सांस्कृतिक सामिप्यता झन् बढ्ने विश्वास व्यक्त गरे। दुई देशबीचको निकट ऐतिहासिक पृष्ठभूमि, सांस्कृतिक समानता र आपसी समझदारीले दुई देशबीचको मित्रताको परम्परागत सम्बन्ध कायम राखिरहेको पनि उनको भनाइ थियो।
उनले आफू नेपाल भ्रमण आएको सम्झना समेत भेटमा गरेका थिए। सन् २०१८ को राजकीय भ्रमण र गौतम बुद्धको जन्मभूमि भ्रमण गरेको स्मरण गर्दै उनले नेपालसँग म्यानमारको संयुक्त प्रयासले व्यापार, लगानी, पर्यटन, यातायात, उद्योग र संस्कृतिका क्षेत्रमा उपलब्धि हासिल गर्ने विश्वास व्यक्त गरे। क्षेत्रीय तथा बहुपक्षीय क्षेत्रहरु बिम्स्टेक, द एसिया कोअपरेसन डायलग, संयुक्त राष्ट्र सङ्घका क्षेत्रमा निकट समन्वय र सहयोग बढिरहेको बताउँदै उनले नेपालसँग क्षेत्रीय र अन्तर्राष्ट्रिय मञ्चमा मिलेर काम गर्ने प्रतिवद्धता व्यक्त गरे।
उनले नेपाली मूलका बर्मेलीहरु स्थानीय समुदायसँग मिलेर बसेको तथा सामाजिक आर्थिक विकासमा योगदान गरिरहेको बताए। उनले म्यानमारको बगानका प्राचीन मन्दिर र यांगुनको आकर्षक स्वेदागोन पेगोडाले नेपाली प्रतिनिधिमण्डललाई म्यानमार र नेपालका लुम्बिनीजस्ता बौद्ध तीर्थस्थलहरुबीच सम्बन्ध गाँस्न नयाँ विचार उत्पन्न हुने विश्वास गरे।
नेपाल र म्यानमारबीचको सम्बन्धको ६०औँ वार्षिकोत्सव र नेपाल भ्रमण वर्ष २०२० को सफलताको कामना पनि उनले गरे।
राष्ट्रपति भण्डारीले प्रत्युत्तर मन्तव्यका क्रममा आफूले गौतम बुद्धको जन्मभूमिबाट न्यानो माया र शुभकामना लिएर आएको बताउँदै बुद्धका सन्देशले मानिसको जीवन पद्धतिलाई नै मार्ग निर्देशन गरेको स्पष्ट पारिन्। बौद्ध दर्शनको उद्गमस्थल लुम्बिनीको विकासमा संयुक्त राष्ट्र सङ्घका महासचिव उ थान्तमनर्फत ‘म्यानमार’को योगदानको प्रशंसा गर्दै उनले लुम्बिनीप्रति म्यानमारको सहयोग र सद्भाव रहने विश्वास राष्ट्रपति भण्डारीले व्यक्त गरिन्।
राष्ट्रपति भण्डारीले दुई देशको विकासका आकांक्षा र चुनौती समान रहेकाले दुई देशबीच सहयोग आदानप्रदान हुनुपर्नेमा जोड दिइन्। उनले व्यापार, पर्यटन, लगानी र संस्कृतिका क्षेत्रमा सहकार्य गरेमा महत्वपूर्ण उपलब्धि हासिल हुने विश्वास व्यक्त गर्दै बिम्स्टेकमा अझ बढी सहकार्य गर्न सकिने मत राखिन्। उनले जलवायु परिवर्तनमा अनुकूलन प्राप्त गर्न दुवै देशले काम गर्नुपर्ने बताउँदै सन् २०२० अप्रिलमा नेपालमा हुने सगरमाथा संवादमा म्यानमारबाट उच्चस्तरीय सहभागिताको आशासमेत व्यक्त गरिन्।
राष्ट्रपति भण्डारीले नेपाली मूलका म्यानमारलीको योगदानप्रति प्रशंसा गर्दै तिनको संरक्षण गरेकामा म्यानमार सरकारप्रति कृतज्ञता व्यक्त गरिन्।
सो अवसरमा दुवै राष्ट्रपतिबीच उपहार आदानप्रदान गरिनाका साथै सांस्कृतिक कार्यक्रम पनि प्रदर्शन गरिएको थियो। दुवै राष्ट्रपतिले प्रदर्शनमा सहभागीलाई फूलको माला दिएर सम्मान गरेका थिए।
यसअघि राष्ट्रपति भण्डारीलाई प्रेसिडेन्सियल हाउस परिसरमा म्यानमारको सेनाले सम्मान गारथ (गार्ड अफ अनर) प्रदान गरेको थियो।
सुचीसँगको भेट र समझदारीपत्रमा हस्ताक्षर
राष्ट्रपति मिन्तसँगको भेटपछि राष्ट्रपति भण्डारीले म्यानमारकी स्टेट काउन्सिलर आङ साङ सुचीलाई भेटिन्। बिहीबार नै भएको उक्त भेटपछि दुवै देशका प्रतिनिधमण्डलबीच द्विपक्षीय भेट वार्ता भयो। उक्त भेटमा पर्यटन र संस्कृतिका क्षेत्रमा सहयोगसम्बन्धी समझदारीपत्रमा हस्ताक्षर समेत भएको थियो।
प्रेसिडेन्सियल हाउसमा भएको वार्तापछि परराष्ट्रमन्त्री प्रदीपकुमार ज्ञवाली र म्यानमार सरकारका अन्तर्राष्ट्रिय सहयोगमन्त्री क्य तीनबीच दुई समझदारीपत्रमा हस्ताक्षर भई आदानप्रदान भएको हो।
राष्ट्रपति भण्डारीले भेटिन् म्यानमारका सेना प्रमुख
राष्ट्रपति विद्यादेवी भण्डारीसँग म्यानमारका सेना प्रमुख मिन आङ ह्यलिङले बिहीबार राजधानी नेपितमा शिष्टाचार भेट गरिन्।
भेटमा परराष्ट्रमन्त्री प्रदीपकुमार ज्ञवाली, परराष्ट्र सचिव शङ्करदास वैरागी, राष्ट्रपति कार्यालयका सचिव डा हरि पौडेल, राष्ट्रपतिका प्रमुख स्वकीय सचिव डा भेषराज अधिकारी, परराष्ट्र मन्त्रालय र राष्ट्रपति कार्यालयका उच्चपदस्थ अधिकारी, नेपालका लागि म्यानमारका राजदूत भीमकृष्ण उदासलगायत सहभागी थिए।
.jpg)
असोज २९ देखि कात्तिक ३ गतेसम्मका लागि म्यानमारको राजकीय भ्रमणमा रहेकी उनले सेनाप्रमुखलाई भेटेकी हुन्।
सहकार्यका विविध विषयमा मिलेर अगाडि बढ्ने समझदारी : परराष्ट्रमन्त्री
परराष्ट्रमन्त्री प्रदीपकुमार ज्ञवालीले लामो समयदेखि नेपालबाट राष्ट्रप्रमुख तहबाट म्यानमारको राजकीय भ्रमण नभएका परिप्रेक्ष्यमा राष्ट्रपति भण्डारीको भ्रमण भएको स्पष्ट पारेका छन्। म्यानमार भ्रमणबाट दुई देशका जनस्तर तथा सांस्कृतिक सम्बन्ध एवं ६० वर्ष लामो दौंत्य सम्बन्ध प्रगाढ बनाउने उद्देश्य रहेको स्पष्ट पारे।
राष्ट्रपति भण्डारीको गणतन्त्र म्यानमार सङ्घका राष्ट्रपति विन मिन्त र स्टेट काउन्सिलर आङ साङ सुचीसँगको भेटपछि मन्त्री ज्ञवालीले यस भ्रमणले सम्बन्धलाई अझ उच्च बनाउने विश्वास व्यक्त गरे।
म्यानमारली राष्ट्रपति र स्टेट काउन्सिलरसँग भेटमा जलवायु परिवर्तन, पर्यटन, अन्तर्राष्ट्रिय मञ्चहरुमा सहकार्य, व्यापार र लगानी विषयमा छलफल भएको जानकारी दिँदै मन्त्री ज्ञवालीले विकासको उस्तै गतिबाट गुज्रेका दुई देशबीच सहकार्यका अनेकौँ विषय हुनसक्ने भएकाले आगामी दिनमा मिलेर अगाडि बढ्ने समझदारी भएको स्पष्ट पारे।
‘सांस्कृतिक विषयमा आदानप्रदान गर्ने, दुवै देशका सांस्कृतिक सम्पदा विश्वमा परिचित गराउने, भ्रमण टोलीहरुको आदानप्रदान गर्ने तथा संस्कृतिको रक्षाका लागि मिलेर काम गर्ने विषयमा छलफल भयो,’ उनले भने।
संस्कृति, पर्यटनजस्ता विषयमा सहकार्य अझ बढ्ने विश्वास पनि उनले व्यक्त गरे। नेपाली मूलका म्यानमारली उल्लेखनीय रुपमा म्यानमारमा रहेको र तिनले म्यानमारको अर्थतन्त्र तथा अन्य बहुपक्षीय विषयमा सम्बर्द्धन गर्न योगदान गरेको पनि उनले स्मरण गरे।
वर्षेनी करीब ४५ हजार म्यानमारलीले नेपाल भ्रमण गरेको र लुम्बिनी पनि तिनको गन्तव्य बनेकामा सन्तोष व्यक्त गर्दै परराष्ट्रमन्त्री ज्ञवालीले भैरहवास्थित गौतमबुद्ध विमानस्थल निर्माण पूरा भएपछि म्यानमारलीको पहिलो गन्तव्य बुद्ध जन्मभूमि लुम्बिनी बन्ने विश्वास व्यक्त गरे।
म्यानमारली राष्ट्रपति र स्टेट काउन्सिलरले नेपाल भ्रमण वर्षलाई सघाउन सकभर नियमित र त्यसो हुन नसकेमा व्यावसायिक तथा धेरैभन्दा धेरै चार्टर उडान गरिने विश्वास दिलाएका परराष्ट्रमन्त्री ज्ञवालीले जानकारी दिए।
राष्ट्रपति भण्डारी म्यानमारका राष्ट्रपति मिन्तको मैत्रीपूर्ण निमन्त्रणामा बुधबार साँझ म्यानमारको राजधानी नेपित पुगेकी थिइन्। (राससको सहयोगमा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
