काठमाडौं- गजल सन्ध्या पोखरा नेपालले प्रदान गर्दै आइरहेको गजल प्रतिभा सम्मान यस वर्ष सुदूरपश्चिमकी गजलकार श्रेष्ठ प्रिया 'पत्थर'लाई प्रदान गरिने भएको छ।
सुदूरपश्चिममा रहेर लामो समयदेखि नेपाली गजलको श्रीवृद्धि र उन्नयनमा सक्रिय पत्थरलाई सम्मान गर्न लागिएको गजल सन्ध्या पोखराका सचिव कृष्ण अधिकारी 'त्रुपक'ले बताए। अधिकारीका अनुसार आगामी कात्तिक ९ गते पोखरामा एक समारोहका बीच पत्थरलाई सम्मान गरिनेछ।
गजल प्रतिभा सम्मान कवि ढाका थापाले स्थापना गरेको २ लाख रुपैयाँको अक्षयकोषबाट प्रदान गर्न लागिएको गजल सन्ध्याका अध्यक्ष मोहन भण्डारीले जानकारी दिए। भण्डारीका अनुसार २१ हजार १ सय ११ रुपैयाँ नगद, सम्मानपत्र र दोसल्ला ओडाइ पत्थरलाई सम्मान गरिनेछ।
सुदूरपश्चिम क्षेत्रमा रही पछिल्लो करिब ३ दशकदेखि नेपाली गजल लेखन तथा संस्थागत गति दिन अनवरत लागिरहेकी पत्थरलाई उनको योगदानलाई कदर गर्दै गजलकार दीपक समीपको संयोजत्वमा बनेको प्रतिभा छनोट समितिले सम्मानका लागि छनोट गरेको हो। समितिमा गजलकारहरु रुपिन्द्र प्रभावी, मन क्षेत्री, उदीपराज ढुंगाना, अमृत सुवेदी सदस्य तथा सन्ध्याका अध्यक्ष भण्डारी र सचिव अधिकारी सदस्य सचिवको रुपमा थिए।
नेपाली गजलको पुनर्जागरण काल मानिने ३० को दशकपछिको समयकी गजल लेखनमा प्रभावशाली पत्थर नेपाली गजलमा प्रथम महिला कृतिकार हुन्। उनका ३ गजल संग्रहसहित १६ कृति प्रकाशित छ। नेपाली साहित्यमा दिएको योगदानकै बावजुद उनी दर्जनौं पुरस्कार तथा सम्मानबाट सम्मानित भइसकेकी छिन्।
नेपाली गजलको विकास, विस्तार र गुणस्तरीय लेखनमा सक्रिय गजलकारमध्येबाट गजल सन्ध्याले गजल प्रतिभा सम्मान प्रदान गर्दै आएको छ। यसअघि प्रत्येक वर्ष गजल प्रतिभा पुरस्कार र सम्मान छुट्टाछुट्टै श्रष्टालाई एकै समयमा प्रदान गर्दै आइएकोमा गत वर्षदेखि कोषको व्यवस्थापन गरी एक वर्ष पुरस्कार र अर्को वर्ष सम्मान दिन थालिएको सन्ध्याका निवर्तमान अध्यक्ष अमृत सुवेदीले बताए।
गत वर्ष गजल प्रतिभा पुरस्कार प्रदान गरिएकोमा यस वर्ष सम्मान अर्पण गर्न लागिएको उनको भनाइ छ। 'गत वर्ष गजल सन्ध्यालाई आर्थिक रुपले पनि सबल बनाउनुपर्छ भनेर संस्था लागेको थियो। जसको फलस्वरुप कोषको व्यवस्था भएपछि हामीले त्यसैको ब्याजबाट पुरस्कार र सम्मान प्रदान गर्ने निर्णय गरेका हौं,' सुवेदीले भने।
यसअघि ज्ञानुवाकर पौडेल, ललिजन रावल, लक्ष्मण थापा, कृष्ण उदासी, दिलीप दोषी, सरस्वती श्रेष्ठ 'सरु', प्रकट पगेनी शिव, आरबी फ्लेम, ईश्वरमणि अधिकारी, घनश्याम न्यौपाने 'परिश्रमी' गजल प्रतिभा सम्मानबाट सम्मानित भइसकेका छन्।
गजल सन्ध्याले पछिल्लो एक दशकभन्दा लामो समयदेखि पोखरालाई केन्द्र बनाएर नेपाली गजलको क्षेत्रको उन्नयनमा नेतृत्वदायी संस्थाको रुपमा योगदान दिँदै आएको छ। जसअन्तर्गत साताव्यापी कार्यक्रम, पुस्तक प्रकाशन, विमोचन तथा परिचर्चादेखि राष्ट्रिय स्तरका वाचनका कार्यक्रमसमेत गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
