भैरहवा- हिन्दु धर्मावलम्बीहरुको मुख्य पर्व दसैं सुरु भइसकेको छ। दसैंसँगै नेपाली समुदायमा एकएक गर्दै चाडपर्वसमेत भित्रिन्छन्। दसैं, तिहार, छठलगायत पर्वहरु आउने क्रममा घर, बजार र सडक सबै गुल्जार हुन्छन्। मानिसको चहल-पहल व्यापक हुन्छ। चाडपर्वको यो अवसरमा लत्ताकपडा, खाद्यान्न, माछामासु र सवारी साधनको बिक्री अत्याधिक हुने गर्दछ।
प्रदेश ५ को अस्थायी मुकाम रुपन्देहीको बुटवल तथा भैरहवामा दसैंका लागि किनमेलको चहलपहल बढेको छ। खासगरी अहिले बजारमा लत्ताकपडा र नयाँ सवारी किन्नेको भीडभाड बढेको छ।
व्यवसायीले दसैंलाई लक्षित गरेर भारत, चीन तथा तेस्रो मुलुकबाट मालसामान आयात बढाएका छन्। अन्य सिजनमा धेरै मात्रामा औद्योगिक कच्चा पदार्थ भित्रने भैरहवा भन्सार कार्यालय बेलहियामा अहिले खाद्यान्न, फलफूल, लत्ताकपडा, मरमसला तथा सवारी साधन बोकेका सवारी लाममा छन्। यो नाकाबाट दसैं, तिहारका लागि एक अर्बभन्दा बढीको लत्ताकपडा आयात हुने गरेको भन्सार कार्यालयले जनाएको छ।
भैरहवा भन्सार कार्यालयका सूचना अधिकारी कलिराम पौडेलले चाडपर्वका लागि साउन, भदौ र असोजमा लत्ताकपडाको आयात बढी मात्रामा हुने बताए। भैरहवाबाट साउनमा ३० करोड ७४ लाख रुपैयाँको सुती तथा तयारी कपडा आयात भएको थियो। भदौ र असोजमा क्रमशः ३५ र ४० करोड रुपैयाँ बराबरको लत्ताकपडा आयात भएको सूचना अधिकारी पौडेलको भनाइ छ।
विशेषगरी तयारी, सटिङ-सुटिङ तथा सारी, कुर्तासुरुवाल र सुती कपडा यहाँबाट भित्रिने गर्दछ। भारतको बैंगलोर, लखनउ, मेरठ, गुजरात, मद्रास, वनारस, गोरखपुरजस्ता स्थानबाट नेपालमा जेन्स तथा लेडिज कपडा आयात हुने सिद्धार्थ उद्योग वाणिज्य संघका अध्यक्ष कुलप्रसाद न्यौपानेले बताए।
पछिल्लो समय सस्तो र फरक-फरक डिजाइनमा आउने भएकाले चिनियाँ कपडाको खपत र आयात दुवै बढेको पनि अध्यक्ष न्यौपाने बताए। यसबाहेक तेस्रो मुलुक हङकङ, दक्षिण कोरिया, थाइल्यान्ड, अमेरिकाबाट समेत दसैंलाई लक्षित गरेर तयारी कपडा नेपाल भित्रने न्यौपानेले जानकारी दिए।
विदेशबाट सामानको आयत बढेसँगै व्यापार घाटा पनि बढ्दै गएको छ। अधिकांश विदेशी ब्रान्डका कपडा काठमाडौं, पोखरा, नारायणगढ, बुटवल, भैरहवा, तानसेनजस्ता सहरमा खपत भए पनि भारतीय तथा चिनियाँ कपडा आधाभन्दा धेरै पहाडी जिल्लाहरु गुल्मी, पाल्पा, अर्घाखाँची, प्युठान, रोल्पा, स्याङ्जा र दाङसम्म पुग्ने गरेको व्यवसायीहरु बताउँछन्।
दसैंकै लागि भैरहवा नाकाबाट फलफूल भित्रने क्रम पनि ह्वात्तै बढेको छ। स्याउ, केरा, भुइँकटहर, अनार लगायतका फलफूल यस नाकाबाट बढी मात्रामा भित्रने गर्दछ। साउन, भदौमा दैनिक ५० देखि ७५ गाडी फलफूल भित्रिने यो नाकाबाट असोज लागेसँगै दैनिक एक सयभन्दा बढी फलफूल बोकेका गाडी नेपाल भित्रिरहेको भन्सार कार्यालयले जनाएको छ।
यो नाकाबाट भित्रिने फलफूल बुटवलको थोक बजार केन्द्र हुँदै पहाडी जिल्लासहित चितवन, पोखरा र काठमाडौंसम्म पुग्ने गर्दछ। अन्य समयमा फलफूल खपत तराइका जिल्लामा बढी हुन्छ। तर, चाडपर्वका बेला भने भारतीय स्याउ र केराले पहाडी जिल्लाको बजार धान्ने फलफूलका थोक व्यापारी बृजेश यादव बताउँछन्।
चाडपर्वकै लागि अहिले खाद्यान्नको आयात पनि तुलनात्मक रुपमा बढेको छ। भन्सार कार्यालयका अनुसार मरमसला, तेल, पिठो, मैदा, मसिनो तथा बासनादार चामल लगायतको आयातसमेत बढेको छ।
दसैंमा लत्ताकपडासँगै मसिनो तथा बासनादार चामल, दाल, तेल, मैदा, घर सजावटका सामानको माग पहाडी जिल्लामा बढी हुने गरेको सिद्धार्थ उद्योग वाणिज्य संघका महासचिव नेत्र प्रसाद आर्चायले बताए। दसैंमा तराइमा अन्य सामानका साथै इलेक्ट्रोनिक र सवारी साधनको पनि बिक्री बढी मात्रामा हुने गरेको छ।
चाडपर्व लक्षित गरेर व्यापारीहरुले गत साउनदेखि नै सवारी साधनको आयात बढाएका छन्। भैरहवा नाकाबाट वार्षिक साढे २३ अर्ब रुपैयाँ बराबरको सवारी साधन आयात हुन्छ। आयातको झन्डै ४० प्रतिशत कारोबार दसैंतिहारको समयमा हुने अटो व्यवसायी तथा जगत मोर्टस् प्रालिका प्रबन्ध निर्देशक रिश्चल थापाले जानकारी दिए।
दसैं र तिहारको बेलामा उपभोक्ताले नयाँ गाडी किन्ने भएकाले यो समयमा गाडीको बिक्री अन्य समयमा भन्दा बढी हुने गरेको उनको भनाइ छ। बिक्रीलाई मध्यनजर गर्दै विभिन्न सवारी खरिदमा व्यवसायीले छुटसमेत दिने गरेका छन्।
दसैं, तिहार लक्षित बजारका लागि भैरहवा नाकाबाट करिब ५ अर्ब रुपैयाँभन्दा बढीका जिप, कार, भ्यान र मोटरसाइकल आयात हुने गरेको भन्सार कार्यालयले जनाएको छ। दसैंमा बुटवल, भैरहवाजस्ता ठूला सहरमा चारपाँग्रे गाडीको बिक्री ह्वात्तै बढ्ने गर्दछ। दसैंमा देवीदेवताका मूर्ति, इलेक्ट्रोनिक सामानहरु टिभी, क्यामेरा, झल्लर लाइट, मोबाइलजस्ता सामानको बिक्रीसमेत बढ्ने गर्दछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773729220.png)
-1773728847.png)
-1764146706.png)
-1773643707.png)
