पुँजीगत लाभकर बढ्न सकेन, गत आर्थिक वर्षभरिमा भएको कारोबार पछिल्लो ४५ दिनमै!
काठमाडौं- दोस्रो बजारमा कारोबार रकम बढेअनुसार पुँजीगत लाभकर भने बढ्न सकेको छैन। चालु आर्थिक वर्षको पहिलो ६ महिनाको अवधिमा लगानीकर्ताले २४ करोड रुपैयाँ पुँजीगत लाभकर सरकारलाई बुझाएका छन्।
गत आर्थिक वर्ष २०७५/७६ मा लगानीकर्ताले ६४ करोड १३ लाख रुपैयाँ पुँजीगत लाभकर बुझाएका थिए। उक्त रकम चालु आर्थिक वर्षको पहिलो ६ महिनाको तुलनामा आधाभन्दा कम हो।
चालु आर्थिक वर्षको ६ महिनामा शेयर बजार ११०० को लाइनमा सीमित थियो। तर माघयता शेयर बजार सुधार हुने क्रममा छ। सूचकमा सुधारसँगै कारोबार रकम पनि बढिरहेको छ।
पछिल्लो ४५ दिनमा सेयर बजारमा भएको कारोबार र गत आर्थिक वर्षभरमा भएको कारोबार बराबर छ। माघयता दोस्रो बजारमा एक १ खर्ब ४ अर्ब रुपैयाँको कारोबार भएको छ। गत आर्थिक वर्ष २०७५/७६ मा एक खर्ब १० अर्ब रुपैयाँको कारोबार भएको थियो। पछिल्ला एक सातामा हरेक दिन दोस्रो बजारमा अधिकतम कारोबारको रेकर्ड बन्दै आएको छ। यस सातामा मात्रै १४ अर्ब १६ करोड रुपैयाँको कारोबार भएको छ।
पछिल्लो ४५ दिनमा भएको कारोबारले भने गत आर्थिक वर्षभन्दा दोब्बरले पुँजीगत लाभकर उठ्ने देखिएको छ। यस अवधिमा सूचकमा सुधार भएको हुँदा नाफामा तिर्नुपर्ने कर बढ्ने छ। करबाहेक ब्रोकरले पनि यसै अवधिमा राम्रो पैसा कमाएका छन्। एउटा ब्रोकर कम्पनीलाई दैनिक एक करोड रुपैयाँ कारोबार भएमा सञ्चालन खर्च पुग्छ। तर पछिल्लो समय एउटै ब्रोकरले ३० करोड रुपैयाँभन्दा माथिको कारोबार गरेको पाइन्छ।
नेपाल स्टक एक्सचेन्जले चालु आर्थिक वर्षको ६ महिनाको अवधिमा १९ करोड ४३ लाख रुपैयाँ आम्दानी गरेको छ। साथै कुल खर्च भने ३ करोड ६४ लाख रुपैयाँ छ।
शेयर बजारमा पछिल्लो तीन वर्षदेखि गिरावट आउदा नेप्सेको आम्दानीमा भारी गिरावट आइरहेको छ। तर केही समयदेखि बढिरहेको बजारले नेप्सेको आम्दानीलाई पनि बढाउने देखिएको छ। साथै सूचक बढ्दा सरकारको पनि पुँजीगत लाभकर पनि बढ्ने छ।
.JPG)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
