काठमाडौं- काठमाडौंको नागढुंगादेखि धादिङको नौबिसे जोड्ने सुरूङमार्ग निर्माणका लागि सम्झौता आगामी सामेबार हुने भएको छ। सम्झौता गर्न जापानी कम्पनी हाज्मारआन्दो जेभीका प्रतिनिधि काठमाडौं आइसकेका छन्। सम्झौता भएपछि सुरुङमार्ग निर्माणको काम मंसिर पहिलो साता (नोभेम्बर तेस्रो) बाट थालिने भएको छ।
गत असारमै शिलान्यास गरेर निर्माण सुरु गर्ने लक्ष्य राखिएको भए पनि ६ महिना ढिला निर्माण थालिने भएको छ। आउँदो सोमबारसम्ममा ठेक्का सम्झौता गर्ने र नोभेम्बरबाट काम सुरु गर्ने हुने नागढुंगा–नौबिसे सुरुङमार्ग आयोजना प्रमुख श्यामप्रसाद खरेलले बताए।
‘जापानी टोली काठमाडौं आइसकेको छ। सम्झौता पत्रमा देखिएका केही त्रुटि सच्याउने काम भइसकेको छ,’ उनले भने, ‘यी सबै काम सोमबारसम्ममा सकिएपछि सम्झौताको तयारी भएको हो।’
बैंक ग्यारेन्टीसहित प्रक्रिया सकेर जापानी कम्पनी नेपाल आइसकेको छ। आयोजनाका अनुसार सुरुङमार्ग निर्माण गर्न जापानी कम्पनी हाज्मारआन्दो जेभीसँग सम्झौता हुँदैछ।
ठेक्का सम्झौता भएपछि निर्माण कम्पनीले साईटमा क्याम्प बनाउने, मेसिनको व्यवस्था गर्नेलगायतका तयारीका काम गर्ने आयोजना प्रमुख खरेलले जानकारी दिए। सरकारले नोभेम्बरसम्ममा साइट खाली गरिसक्नु पर्छ। त्यसका लागि काठमाडौं र धादिङतर्फ मुआब्जा वितरणको काम सक्नु पर्ने चुनौती सरकार सामु छ।
काठमाडौंतर्फ मुआब्जा वितरण टुंगिएको भएपनि धादिङतर्फ बाँकी रहेको खरेलको भनाइ छ। व्यक्तिका नाममा रहेको जग्गामा समस्या नभएपनि गुठी र लालपुर्जा नभएको जग्गामा समस्या देखिएको खरेलले जानकारी दिए।
मुआब्जाका विषयमा निर्णय भएको र निवेदन आउने क्रममा रहेको छ। धादिङतर्फ सुरुङ मार्गका लागि १ सय ७ रोपनी जग्गामध्ये ४४ रोपलीको मात्र मुआब्जा दिनुपर्ने देखिएको आयोजना प्रमुख खरेलले बताए।
‘गुठी र लालपुर्जा नभएका जग्गाहरुको हकमा केही निर्णय मन्त्रिपरिषद्बाट गराएर अघि बढ्नु पर्ने देखिएको छ,’ उनले भने, ‘त्यसका लागि आयोजनाले आवश्यक तयारी गरि रहेको छ।’
करिब ६ अर्ब रुपैयाँ मुआब्जा वितरणमा खर्चनु पर्ने र १६ अर्ब निर्माण लागत भएकाले सरुङमार्ग तयार हुँदा करिब २२ अर्ब पुग्नेछ। जसमा १६ अर्ब जापानको सहुलियत ऋण सहयोग हुनेछ भने बाँकी ६ अर्ब रुपैयाँ नेपाल सरकारको व्यहोर्ने छ। जापान सरकारको आर्थिक र प्राविधिक सहयोगमा आयोजनाको विस्तृत आयोजना प्रतिवेदन तयार पारिएको थियो।
नागढुङगा–नौबिसे सडकखण्डको किसिपिढी खोल्सीदेखि सिस्नेखोलासम्म करिब २.७ किलोमिटर सुरुङमार्ग निर्माण गर्न सम्झौता हुन लागेको हो।
जापानी कम्पनी हाज्मारआन्दो जेभीले सम्झौतापछि निर्माण थालेको ४२ महिनामा सुरुमार्ग तयार पारेर नेपाल सरकारलाई हस्तान्तरण गर्नुपर्ने गरी सम्झौता गर्ने तयारी भएको छ। अप्रिल २०२३ सम्ममा आयोजना सक्ने लक्ष्य लिइएको छ। -सांकेतिक तस्बिर
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
