काठमाडौं- माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहालले दिवंगत छोरा प्रकाशलाई दागबत्ती दिएर पशुपति आर्यघाटमा अन्त्येष्टि गरेका छन्। छोरालाई दागबत्ती दिँदै गर्दा आँसु थाम्न नसकेका प्रचण्डले एक मात्र छोरा प्रकाशको मलामी पुगेका हजारौंलाई हात उठाएर धन्यवाद दिएका थिए। प्रकाशको अन्त्येष्टिमा पशुपति आर्यघाटमा माओवादी केन्द्रका शीर्ष नेतासहित कार्यकर्ता, अन्य पार्टीका नेता, कलाकारदेखि सर्वसाधारणको भीड लागेको थियो।
आइतबार बिहान लाजिम्पाट स्थित घरमै अचेत भएका प्रकाशलाई सहयोगीहरुले ५ बजेर ५० मिनेटमा नर्भिक अस्पताल पुर्याएका थिए। तर, अस्पताल पुगेको ९ मिनेट भित्र नै चिकित्सकहरुले प्रकाशलाई मृत भइसकेको अनौपचारिक जानकारी परिवारलाई दिएको थियो। परिवार स्रोतका अनुसार सधैं मर्निङ वाक जाने प्रकाश ढिलो उठेपछि आमा सीताले उनलाई बोलाएकी थिइन्। निकैबेर नउठेपछि आमा सीताले गएर प्रकाशलाई उठाउँदा उनी अचेत भइसकेका थिए। त्यसपछि उनलाई सहयोगीका साथमा नर्भिक अस्पताल लगिएको थियो।
झापामा चुनावी प्रचारमा हरेका प्रचण्ड १२ बजे नर्भिक अस्पताल आइपुगेका थिए। त्यसपछि पत्रकार सम्मेलन गरी अस्पताल प्रशासनले प्रकाशको निधन आकस्मिक हृदयघाताबट भएको औपचारिक घोषणा गर्यो।
कञ्चनपुरमा चुनावी प्रचारमै रहेकी प्रकाशकी श्रीमती बिना मगर पनि खबर पाउनासाथ काठमाडौं आइपुगेकी थिइन्। रुँदै र दौडँदै नर्भिक अस्पताल छिरेकी बिनाले त्यहाँ उपस्थित सयौं शुभेच्छुकलाई भावविह्वल बनाएकी थिइन्।
यस्तै, छोराको निधनको खबरसँगै आमा सीता पनि बेहोस भएपछि नर्भिकबाट चिकित्सकको टोली उनको स्वास्थ्य अवस्था बुझ्न लाजिम्पाट पुगेको थियो।
प्रकाशको पार्थिव शरीरलाई दिउँसो १ बजेदेखि ४ बजेसम्म पार्टी कार्यालय पेरिस डाँडामा श्रद्धाञ्जलीका लागि राखिएको थियो। श्रद्धाञ्जली सभामा प्रचण्डले छोरा प्रकाशलाई रुँदै कम्युनिस्ट पार्टीको झन्डा ओढाइदिएका थिए। प्रकाशका दिदीहरु गंगा र रेणु पनि प्रकाशको शवमा अँगालो हालेर रुँदा नजिक बसेका सबैका आँखा रसाएका थिए। राष्ट्रपति विद्यादेवी भण्डारीले प्रचण्ड निवास लाजिम्पाट पुगेर शोकाकूल परिवारलाई समवेदना व्यक्त गरेकी थिइन् भने उपराष्ट्रपति नन्दकिशोर पुन पासाङदेखि गोरखामा रहेका नयाँशक्तिका नेता बाबुराम भट्टराई, विभिन्न पार्टीका नेता, आफन्त र शुभचिन्तकले पेरिस डाँडा पुगेर प्रकाशलाई श्रद्धाञ्जली दिएका थिए।
प्रकाशको पार्थिव शरीर पेरिस डाँडादेखि पशुपति आर्यघाट पुर्याउँदा त्यहाँ हजारौंको संख्यामा मानिसहरु पुगिसकेका थिए। पशुपति आर्यघाटको २ नम्बर घाटमा ३५ बर्से छोरा प्रकाशको शवलाई प्रचण्डले हिन्दू विधिअनुसार दागबत्ती दिएर अन्त्येष्टि गरेका हुन्।
पशुपति आर्यघाटमा प्रकाशको अन्त्येष्टिका केही तस्बिर
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
